«Astana» velokomandasynyń kapıtany Vınchenso Nıbalı jeksenbi kúni «Djıro d’Italııa» kópkúndiginiń jeńimpazy atandy. Osy arqyly ol Halyqaralyq velosıpedshiler odaǵynyń Álemdik týry reıtıngisinde 4-shi satyǵa kóterildi.
Qazaqstan veloshabandozdarynyń lıderi burnaǵy kúni jarystyń sońǵy kezeńin 6-shy bolyp aıaqtaǵanymen, sonyń aldyndaǵy 20-shy kezeńdegi alǵa sýyrylyp shyqqandaǵy artyqshylyǵyn saqtap qaldy. Bul ony jeńiske jetkizdi. Osynyń nátıjesinde álemdik reıtıngide 231 upaımen 42 saty ilgeri jyljyp, 46-orynnan 4-orynǵa bir-aq sekirdi.
Italııanyń taýly-tasty jondarymen jortýda Nıbalı shapqan ústine órledi. Onyń qarqyny máre syzyǵy jaqyndaǵan saıyn arta tústi. Jarystyń 20-shy kezeńinen keıin kósh tizginin qolyna tıgizgesin, sol úzdik kórsetkishinen aıyryla qoımady. Veloshabandoz buǵan deıingi kezeńderde kósh bastap kele jatqan Orica GreenEDGE komandasynyń sportshysy Esteban Chavesti 52 sekýndqa artqa tastap ketti. Al, jarystyń 20-shy kezeńinde «Katıýsha» komandasynyń veloshabandozy Reın Taaramıae jeńiske jetti. Ekinshi orynda Darvın Atapýma (BMC Racing), úshinshi bolyp AQSh sportshysy Djozef Dombrovskı (Cannondale) keldi. Atalǵan kópkúndiktiń sońǵy saıysy dástúr boıynsha «dostyq kezeńi» dep atalyp, barlyq velosportshylar máre syzyǵyn birge kesip ótti. Sondyqtan Nıbalı «Djıro d’Italııa» grand-týrynyń 2016 jylǵy jeńimpaz boldy.
Tegi ıtalııalyq veloshabandoz óziniń sportshylyq mansabynda osymen ekinshi ret «Djıronyń» jeńimpazy bolyp otyr. Buǵan deıin ol 2013 jyly osy kópkúndikte aldyna jan salmap edi. Al 2014 jyly «Týr de Fransty» utty. Osynyń arqasynda «Týr de Frans», «Djıro d’Italııa» jáne «Výelta Ispanııa» atty úsh Grand-týrda da jeńiske jetken tarıhtaǵy altynshy veloshabandoz atandy. Al 2015 jyly Italııa birinshiliginde eki ret top jardy. Ol sol chempıonatta Lenıano men Sýperga taýlarynyń arasyndaǵy 219 shaqyrymdy alǵashqy bolyp baǵyndyrdy. Sondaı-aq, osy jyldyń aqpan aıynda ótken «Oman týry» velokópkúndiginde 130 shaqyrymdy 2:25:25 júrip ótip, jarys qorytyndysy boıynsha jeńimpaz boldy.
Endi Vınchenso Nıbalı jaıly qysqasha toqtalyp ótsek, ol 1984 jyly Italııanyń Messına qalasynda týǵan. «Akýla» degen laqap atqa ıe sportshy. 2013 jyldan beri «Astana» velokomandasynyń sapynda óner kórsetip keledi.
Talǵat RAIYMBEK,
«Egemen Qazaqstan»