«Nur-Shahtyń» sándi kıimderine suranys kóp

Aqtaýlyq sánger Nurjamal Nur­peıisova – qazaqtyń ulttyq kıimderin zamanaýı jetistiktermen sabaqtastyra damytyp kele jatqan sheber ári sánger. Sán áleminde ózindik ornyn qalyptastyryp úlgergen onyń buıymdaryna – kıimderi men áshekeılerine shetelden de tapsyrystar túsýde. Nurjamaldyń sán álemi tabal­dyryǵynan attaǵanyna 15 jyldan asyp barady. Ulttyq oıý-órnekterdi zaman talabyna saı damyta qoldanǵan dızaınerdiń batyl qadamy men bastamasy saladaǵy jańalyq boldy. Nátıjesinde ol jetekshilik etetin sán úıiniń ataýymen elimizde «Nur-Shah» atty otandyq brend qalyptasty. – Sán álemine kelgendegi birinshi maqsatym – ulttyq oıý-órnekti kúndelikti turmysqa engizý boldy. Ásirese, Mańǵys­taý­dyń ózindik naqyshtaryn tanyt­qym keldi. Al tabystyń kilti eńbek pen únemi izdeniste bolýda dep bilemin, – deıdi N.Nur­peıisova. «Nur-Shah» sán úıinde 50-den astam qyz-kelinshek eń­bek etedi. Sypaıy, óz isiniń she­ber­lerin tań­dap alǵan kásipker muqtajdarǵa demeý jasaýdy esten shyǵarmaıdy, múmkindigi shekteýli jandardy jumyspen qamtyp otyr. Al qyz­metkerler bolsa, Nurjamaldyń adal, jaýapty basshy ekenin rızashylyqpen jetkizedi. Aıyna 300-den astam týyndy daıyndap shyǵaratyn sán úıiniń ónimderine Dýbaıdan, Reseıden suranys túsýde. Budan birneshe aı buryn «Sakýra» atty jańa toptamasyn usynǵan «Nur-Shah» sán úıi qazir ekinshi kıimder jeli­sin shyǵara bastady. Endi jappaı shyǵarylymdaǵy kıimder óndir­isi jolǵa qoıylyp, halyqqa qol­jetimdi baǵada satylatyn bolady. Gúlaıym ShYNTEMIRQYZY, «Egemen Qazaqstan» Mańǵystaý oblysy