Ásen áńgimeni ákesinen bastady. Ishimiz jylyp qaldy. Kókshe atyraby Dýlat Jaqsylyqovty jaqsy bilýshi edi. Namys jetegindegi jigit anaý bir jyldardaǵy daǵdarysty kezeńde jumysy qojyraı bastaǵan sút zaýytynyń tizginin qolǵa alǵan bolatyn. Dýlattyń iskerligi kóz aldymyzda. Zaýyt ónimderin turǵyndar áli kúnge aıryqsha suranyspen satyp alady. Azamattyń artynda iz qaldy, qurmet degenimiz osy ǵoı. Átteń, ómirden erte ketti.
Dýlat úsh ulyn da elimizge erekshe qajet kásipke tarta bilgen eken. Búgingi kúni úlkeni Qýanysh zaýyttaǵy ınjenerlik-tehnıkalyq qyzmetke, kishisi Ersaıyn saýda-monıtorıng salasyna, sondaı-aq, jıeni Qýanysh mal sharýashylyǵy men eginshilik isine basshylyq jasaıdy. Atyrapqa aty shyqqan jigitter.
Biz búgin ortanshy ul Ásen jaıly sóz qozǵamaqpyz. Munyń jóni bar. Eńbek jolyn sút zaýytynda slesar bolyp bastaǵan ol kókiregine kóp nárseni túıip júripti. О́ndiristen qol úzbeı-aq, joǵary bilim alǵan. Osydan on segiz jyl buryn, ákesi kenetten qaıtys bolǵanda, ujym qoıarda-qoımaı Dýlattyń dırektorlyq taǵyna otyrǵyzǵan. Erteńgi tirshilik pen kásiporyn bolashaǵyn oılaǵan kóregendik desek te jarasady buny.
«Áke kórgen oq jonar» demekshi, qazirgi kúni zaýytta Dýlat baýyrymyzdyń oı-armandaryn Ásenniń komandasy jańasha sıpatta órbitip otyrǵanyna rıza bolamyz. Zaýyt Kókshetaý qalasynan 250 shaqyrymdyq aýmaqtaǵy aýyldardan sút daıyndaıdy. Jer-jerde 8 arnaıy beket jasaqtalǵan. Tipti, Soltústik Qazaqstan oblysynyń Aıyrtaý aýdanynda sút ónimderin óńdeıtin shaǵyn seh jumys istep tur. Jalpy, álgi aýmaqtaǵy aýyl turǵyndarynyń 80 paıyzy ónimderin osy zaýytqa tapsyrady eken. Bul el ishine qolaıly ári qolma-qol esep aıyrysatyny kóńilden shyǵady. Osynyń nátıjesinde kúnine 30 tonna ónim jetkizilip otyr. Al, jaz aılarynda onyń kólemi 50 tonnaǵa jetetin kórinedi.
«Kókshetaý sút zaýyty» AQ ónimniń 14 túrin shyǵarady. Basqasyn aıtpaǵanda, syrdyń shujyq, burym jáne balmuzdaqtyń jemis-jıdektik, fransýzdyq túrindegileri jas kásipkerdiń izdenimpazdyǵyn tanytady. О́nimniń barlyǵy tabıǵı shıkizattan daıyndalatyndyqtan, sapasy da joǵary. Kókshe ónimderi elimizdiń jeti oblys ortalyǵyna, Reseıdiń Omby qalasyna shyǵarylady.
– Memlekettiń keń kólemdi qoldaýyna súıene otyryp, óndiristi ártaraptandyrý, bylaısha aıtqanda, klasterlik qadamdarǵa den qoıýdamyz, – deıdi zaýyt dırektory Ásen Jaqsylyqov. – Zerendi aýdanyndaǵy Prırechnoe aýylynda taýarly-sút fermasyn quryp, onda 100 bas saýyn sıyryn ustaýdamyz. Jaqyn jyldary onyń sanyn eki ese arttyrsaq degen oıdamyz. Sondaı-aq, 49 jylǵa jalǵa alǵan 800 gektar jerimiz bar. Munda ekpe shóptiń úsh túri egiledi. Bıyl súrlemdik júgeri ósirý nıetindemiz. Iаǵnı, jem-shópten taryqpaımyz degen oıdamyn. Ujymdaǵy 140 adamnyń barlyǵy óz isine berilgen adal jandar. Azdy-kópti tabysymyz osylardyń arqasynda tolyǵýda. Mundaı kisilermen jaqsy josparlar túzýge bolady.
Bul kúnderi tabysty tulǵa deńgeıine kóterilgen Ásen Dýlatulynyń keńsesi qabyrǵalary túrli deńgeıdegi alǵys hattar men gramotalarǵa, sertıfıkattarǵa toly. Kóp jyldar boıy qalalyq máslıhat depýtaty bolyp kelgen ol bıyl oblystyq máslıhattyń depýtaty bolyp saılandy. Memlekettik marapattary da barshylyq. Osynyń ózi Máńgilik Eldiń irgesi Ásen sııaqty eljandy azamattardyń eńbegimen nyqtalatyndyǵyn aıǵaqtaı túsedi.
Baqbergen AMALBEK,
«Egemen Qazaqstan»
Aqmola oblysy