Táýelsizdiktiń tátti jemisin eshqandaı qundylyqtar almastyra almaıdy. О́z memlekettik rámizderi, óz jeri joq, halqy bosqyn bolyp qańbaqtaı kóship júrgen, erteńgi kúnine alańdaýly halyqtardyń eń úlken armany óz qotyryn ózi qasıtyn jeke memleket bolý ǵoı.
Elimizdiń táýelsizdigin uǵyný úshin álgindeı halyqtardyń taǵdyryna bir úńilip qoısa bolady.
Ońtústik Qazaqstan oblystyq sotynyń tóraǵasy Nurserik Sháripovtiń uıytqy bolýymen ótken jyly Ordabasy taýyndaǵy «Birlik» monýmentine sýdıalar velosıpedpen júrip ótken edi.
Sol dástúr bıyl da qaıtalandy. Oblys ákimi, oblystyq máslıhat jáne oblystyq sottyń uıymdastyrýmen ótken «Bılerge taǵzym» velosherýi Táýelsizdiktiń 25 jyldyǵyna arnaldy.
Shymkent qalasyndaǵy Báıdibek bı eskertkishiniń aldynda ótken is-sharaǵa oblystyq sottyń tóraǵasy Nurserik Sháripov bastaǵan 30 sýdıa, oblys ákiminiń orynbasary Ulasbek Sádibekov bastaǵan 25 basqarma basshylary men oblystyq, qalalyq, aýdandyq máslıhattardyń 20 depýtaty jáne sporttyq uıymdardyń 30 ókili, barlyǵy 105 velosıpedshi qatysty.
Tańǵy saǵat jetide ershikke qonǵan azamattar Ordabasy taýyna deıingi 43 shaqyrymdy túske taman basyp ótip, márege jetti. Olardy taý bókterinde aýdan halqy saltanatpen kútip aldy. Eldiń yntymaǵy men birligine arnalǵan merekelik sherýde oblys ákiminiń orynbasaryn Ú.Sádibekov, oblystyq sottyń tóraǵasy О́.Sháripov jáne Ordabasy aýdanynyń ákimi A.Mamytbekov, oblystyq máslıhattyń depýtaty Á.Isabaev sóz alyp, velosherýshilerdiń eńbeginiń mánin taratyp, barsha aǵaıyndy quttyqtady.
Táýelsizdiktiń qadirin bilý, kózdiń qarashyǵyndaı ardaqtaý, kerek bolsa, qasyq qany qalǵansha qorǵaý úshin ásheıin aıtyla salǵan tátti sóz emes, naqty is-áreket kerek. Ershikke saıahat úshin emes, táýelsizdiktiń baıandylyǵyn uqtyrý úshin qonǵan azamattarymyzdyń eńbegin osylaı baǵalaýǵa bolady.
Barsha qazaq Ordabasyda bas qosyp, ata jaý jońǵardyń belin syndyrǵan qasıetti taýda babalar rýhyna quran baǵyshtalyp, ári qaraı konserttik baǵdarlamaǵa ulasty.
Baqtııar TAIJAN,
«Egemen Qazaqstan»
Ońtústik Qazaqstan oblysy