Almaty qalasynda Parlament Májilisiniń Zańnama jáne sot-quqyqtyq reforma komıteti músheleriniń qatysýymen «100 naqty qadam» Ult Josparynyń 27-qadamynyń sheńberinde «Jeke sot oryndaýshylyq ınstıtýty jáne ony damytý» taqyrybynda kóshpeli otyrys bolyp ótti.
Otyrysta jeke sot oryndaýshylar ınstıtýtyn jetildirý máselesi talqylanyp, búgingi tańda sot oryndaýshylar qyzmeti aıasynda kezdesetin túrli máseleler qozǵaldy. Eki bólimnen turatyn dóńgelek ústel otyrysyna Parlament depýtattarymen qatar, «Nur Otan» partııasy janyndaǵy Quqyqtyq keńes músheleri, ádilet, quqyq qorǵaý organdarynyń ókilderi, Jeke sot oryndaýshylardyń respýblıkalyq palatasynyń jaýapty adamdary men sarapshy mamandar qatysty.
Kóshpeli otyrysty ashqan Parlament Májilisiniń Zańnama jáne sot-quqyqtyq reforma komıtetiniń tóraǵasy, «Nur Otan» partııasy janyndaǵy Quqyqtyq keńestiń tóraǵasy Nurlan Ábdirov Memleket basshysy Nursultan Nazarbaev mindettegen «100 naqty qadam» Ult josparynyń 27-qadamynda qamtylǵan jeke sot oryndaýshylar ınstıtýtynyń qyzmet etý aıasynda atqarylar sharalar men ózekti máselelerdi ońtaılandyrý, elimizdegi jeke sot oryndaýshylar qyzmetin jetildirý isinde eskerilýi tıis mańyzdy tustarǵa erekshe nazar aýdarý qajettigine toqtalyp ótti.
Alǵashqy baıandama jasaý mártebesine ıe bolǵan Qazaqstan Respýblıkasy Ádilet mınıstriniń orynbasary Janat Eshmaǵanbetov jeke sot oryndaýshylyq negizderi taqyrybyn tereń qaýzap, quqyqtyq qyzmettiń bul salasynda kezdesetin mańyzdy máseleler barysyn sóz etti. Budan ózge, kóshpeli otyrystyń basqosý jıynyna arnaıy qatysqan Jeke sot oryndaýshylardyń respýblıkalyq palatasynyń tóraǵasy Sergeı Lı, Parlament Májilisi Zańnama jáne sot-quqyqtyq reforma komıtetiniń depýtattary Berik Dúısenbınov, Muhtar Tinikeev, Qanat Mýsın, Balaıym Kesebaeva, Magerram Magerramov, Narıne Mıkaelıan, Snejana Imasheva, Svetlana Bychkova elimizdegi zań aıasynda osy ýaqyt aralyǵynda jeke sot oryndaýshylardyń atqarǵan eńbekteri men onyń el damýyna qosqan úlesin, shırek ǵasyr aýqymynda sot oryndaýshylyq qyzmettiń qol jetkizgen jetistikteri men keleshek damý úderisi jóninde óz oı-pikirleri men ustanymdaryn kópshilik talqysyna saldy.
Sharaǵa qatysqan qalalyq prokýratýra, sot jáne ishki ister organdary qyzmetiniń ókilderi, qarjygerler qaýymdastyǵy men Almaty qalalyq Ádilet basqarmasy, Almaty jáne Astana qalalary men barlyq oblystardyń óńirlik jeke sot oryndaýshylary, Almaty oblystyq ádilet basqarmalarynyń jetekshileri dóńgelek ústel qonaqtary men qatysýshylaryna óz saýaldaryn joldap, taqyryptyq pikir almasý sheńberinde ótken kóshpeli otyrys jumysy jemisti boldy.
Qanat ESKENDIR,
«Egemen Qazaqstan»
ALMATY