ASTANA. 1 maýsym. Búgin álemniń barlyq elinde halyqaralyq balalardy qorǵaý kúni merekesi keń kólemde atap ótiledi. Bul týraly egemen.kz tilshisi habarlady.
Tarıhqa kóz salsaq, 1 maýsym – balalardy qorǵaý kúni merekesi 1950 jyldan bastap toılanyp keledi. Bul meıramdy ótkizý jóninde sheshim 1949 jyldyń qarasha aıynda halyqaralyq demokratııalyq áıelder federasııasynyń arnaıy sessııasynda qabyldanǵan. Al BUU atalǵan bastamany qoldap, balalardyń ómirin, quqyǵyn, densaýlyǵyn qorǵaýdy óz qyzmetiniń basty baǵyttarynyń birine aınaldyrǵan.
Merekeniń negizgi maqsaty – balalardyń ómirin soǵystan qorǵaý, densaýlyǵyn saqtaý, sapaly bilim men sanaly tárbıe berý. Sonymen qatar, olarǵa barlyq jaǵdaı jasaı otyryp, adamgershilikke, ádiltikke tárbıeleý bolyp tabylady.
Búgingi tańda BUU saýalnama júrgizip, álemde árbir onynshy bala úlkender tarapynan zorlyq pen zombylyqqa ushyraıtynyn anyqtap otyr. Sondaı-aq, jasóspirimder arasynda nashaqorlar sanynyń ósýi, olardyń jartysynan astamy ishimdik ishýge beıim ekeni anyqtaldy. Sondyqtan da atalǵan mereke aıasynda dýmandatyp toılaýmen qatar, bolashaqqa baǵdar jasaıtyn mańyzdy sharanyń biri.
Talǵat Raıymbek.
Derek: egemen.kz.
Foto: astana.gov.kz.