Astanadaǵy Memlekettik qyzmet salasyndaǵy óńirlik hab «Memlekettik qyzmet kórsetý máseleleri boıynsha «teń-teńimen» qaǵıdasyna saı tájirıbe almasý» atty semınar ótkizdi. Oǵan Kanada, Ázerbaıjan, Grýzııa, Qazaqstannyń memlekettik qyzmet kórsetý ortalyqtarynyń ókilderi men halyqaralyq sarapshylar qatysty.
Semınardy Astanadaǵy Memlekettik qyzmet salasyndaǵy óńirlik hab basqarýshy komıtetiniń tóraǵasy Álıhan Baımenov, Qazaqstan Prezıdenti janyndaǵy Memlekettik basqarý akademııasynyń rektory Bolatbek Ábdirásilov, Aqparat jáne kommýnıkasııalar vıse-mınıstri Sáken Sársenov sóz sóılep ashty.
Jıynda Ekonomıkalyq yntymaqtastyq jáne damý uıymy (EYDU) damý máselelerindegi yntymaqtastyq jónindegi dırektoratynyń memlekettik basqarý jónindegi keńesshisi Anna Pıchınnı «teń-teńimen» pishimindegi tıimdi ınstıtýttar platformasynyń ádistemesiniń maqsattary jóninde áńgimelep berdi. Is-shara barysynda Ázerbaıjan («ASAN» qyzmet kórsetý ortalyǵy), Grýzııa (Public Service Halls), Qazaqstan («Úkimet azamattar úshin» memlekettik korporasııasy) jáne Kanada (Azamattarǵa baǵyttalǵan qyzmet kórsetý ınstıtýty (ICCS) memlekettik qyzmet kórsetý ortalyqtarynyń damý tájirıbeleri tanystyryldy. Qatysýshylar halyqqa qyzmet kórsetý kezinde týyndaıtyn máselelerdi jáne olardy sheshýdiń ınnovasııalyq joldaryn talqylady. Jıynda, sondaı-aq, habtyń qatysýshy elder arasyndaǵy tájirıbe almasý joldary anyqtaldy.
Shara habqa múshe elderdiń sarapshylary «teń-teńimen» qaǵıdasyna saı tájirıbe men bilim almasý úshin platforma jasaý maqsatynda ótkizildi. Bul platforma halyqqa qyzmet kórsetý salasyndaǵy ózekti máselelerdi, ınnovasııalyq tásilder men trendterdi jáne odan ári tájirıbe men bilim almasý maqsatynda praktıkterdiń alıansynyń qurý múmkindikterin talqylaýǵa jol ashady. Áriptester jelisi retinde alıansty engizý «bir tereze» reformasyn júzege asyrýdy jaqsartyp, habtyń múshe elderiniń arasyndaǵy yntymaqtastyqty nyǵaıtady.
Hab Qazaqstan bastamasymen BUU Damý baǵdarlamasymen birlese otyryp, 25 múshe el jáne 5 halyqaralyq uıym arqyly quryldy. Qazirgi tańda Hab 34 múshe elden turady, uıym geografııasynyń Soltústik Amerıka men Eýropa, TMD elderi, Kavkaz ben Ortalyq Azııa memleketterinen ASEAN elderine deıin keńeıýi memlekettik qyzmetti jetildirýdegi áriptestik asa qajet ekenin kórsetedi.
«Egemen-aqparat»