Saıası qýǵyn-súrgin qurbandaryn eske alý kúniniń qarsańynda Shet aýdanynyń ortalyǵy Aqsý-Aıýly kentine jol tústi. Sol sapar barysynda ólke tarıhynyń joqshysy, tunyp turǵan shejire qart Kámel qajy Júnistegimen emin-erkin otyryp áńgimelesýdiń sáti túsken edi.
Zady, jazýshy Kámel Júnistegin ǵumyr boıy mazalap kele jatqan taqyryptyń biri – sonaý zulmat zamanda naqaqtan oqqa ushqan jazyqsyz jandardyń talaıly taǵdyry. Jasy seksenge taıap qalǵan Kámekeń qarǵys atqyr kezeńniń qurbandary top-tobymen jerlengen tustardy bes saýsaǵyndaı biledi. Solardyń basyna belgitas qoıyp, búgingi mamyrajaı tirliktiń tynyshtyǵy men toqtyǵy terbegen pende balalarynyń esine salyp otyrý – ol kisiniń óz moınyna sanaly túrde alǵan boryshy.
Osydan onshaqty jyl buryn-aý deımin, Shet aýdanynyń ortalyǵy Aqsý-Aıýly kentinde saıası qýǵyn-súrgin qurbandaryna arnalyp eskertkish ornatylǵan bolatyn. Ol kezde bul eskertkish eńseli hám ásem-aq tuǵyn. Qara granıtpen qaptalǵan tuǵyrdyń ústine shanshylǵan ýyqtar shańyraqty kóterip turǵan.
Bul kúnde sol eskertkishten joba joq, jurnaq qana qalǵan. Dalanyń doly jeli eskertkishtiń ýyqtaryn qıratyp, shańyraǵyn ortasyna túsirip ketken. Tuǵyrdyń tysy granıtpen qaptalǵan dep júrsek, onysy qytaıdyń arzanqol plıtkasy bolyp shyqty. Sol shirkinder ár-ár jerden shytynaı synyp, jerge qırap túsip jatyr...
«Bul qalaı ózi?» dep aýdandyq ákimdikke barǵanymyzda, aýdannyń taǵaıyndalǵanyna bir aıdyń ǵana júzi bolǵan ákimi Marat Jandáýletov jınalys ótkizip jatyr eken. Túske deıin de, odan keıin de ákim myrzaǵa, ol kisiniń Azamat Ábildın degen orynbasaryna jolyǵýdyń múmkindigi túspeı-aq qoıǵany.
Álbette, ákimniń álgi jınalysta eskertkishti qalpyna keltirý jóninde másele qozǵap jatpaǵany belgili edi. О́ıtkeni, sol kúnniń erteńi, ıaǵnı 31 mamyr – Saıası qýǵyn-súrgin jáne asharshylyq qurbandaryn eske alý kúni-tuǵyn. Ákim túnde aı jaryǵymen birdeńeni amaldamasa, úlgermeıtini anyq edi...
Aıtpaqshy, toz-toz bolǵan tuǵyrdyń ústinde jatqan jalǵyz azagúldi kórdik. Aza tutyp, taǵzym etken ákimniń isi shyǵar dep topshyladyq...
Qaırat ÁBILDINOV,
«Egemen Qazaqstan»
Qaraǵandy oblysy,
Shet aýdany