Almatyda Q.Qojamııarov atyndaǵy memlekettik respýblıkalyq uıǵyr mýzykalyq komedııa teatrynda uıǵyrdyń tanymal aqyn qyzy, fılologııa ǵylymdarynyń kandıdaty, Memlekettik stıpendııanyń ıegeri Patıgúl Mahsatovanyń qazaq tilinde shyqqan «О́zińe senem» atty óleńder jınaǵynyń tusaýkeseri ótti. Kitapty qazaqsha sóıletken – Túrki dúnıesi aqyndary jyr músháıralarynyń birneshe dúrkin júldegeri, túrik, ázerbaıjan, qyrǵyz, uıǵyr aqyndaryn qazaq oqyrmandaryna tanytyp júrgen belgili aqyn Dáýletbek Baıtursynuly.
Uıǵyrdyń aqyn qyzynyń qazaq tilindegi tuńǵysh kitabynyń saltanatyna eki halyqtyń oqyrmandary kóp jınaldy. Jıyndy Qazaqstannyń eńbek sińirgen qaıratkeri, Halyqaralyq «Alash» syılyǵynyń, «Qurmet» ordeniniń ıegeri, Jazýshylar odaǵyndaǵy uıǵyr ádebıeti keńesiniń tóraǵasy Ahmetjan Ashırı ashyp, Qazaqstan Jazýshylar odaǵynyń basqarma múshesi, onnan astam jyr jınaqtarynyń avtory, uıǵyr ádebıeti boıynsha birneshe oqýlyqtyń, ádistemelik quraldardyń, dıdaktıkalyq materıaldardyń, dıktant jınaqtarynyń avtory, óleńderine júzden astam án jazylǵan aqyn qyzdaryn jaqynyraq tanystyryp, onyń adamı qasıetterine toqtaldy.
– Patıgúldi qazaq tiliniń mamany desek te bolady, – dedi baıandamashy. – О́te saýatty qyz. Patıgúldi erekshe qadirleıtinim, ári basqaǵa uqsamaıtyn jeri, onyń shyǵarmalary «Qazaq ádebıeti» gazetinde, «Juldyz», «Prostor», «Lıteratýra Kazahstana», «Álem ádebıeti» jýrnaldary men t.b. basylymdarda jarııalanǵandyqtan oqyrmandar jaqsy tanıdy. Ásirese, Járken Bódesh aýdarǵan óleńderi ádebı jyl qorytyndylarynda atalyp jatady. Osy ýaqytqa deıin shyǵarǵan on bes kitabynyń negizgi taqyryptary adamılyq, adamgershilik qundylyqtary, birlik, dostyq jaıynda. Bul – qazaq pen uıǵyr halqynyń erteden bastalǵan tarıhı dostyǵynyń zańdy jalǵasy.
Búgingi qazaq tiline aýdarylǵan kitabyna kelsek, Dáýletbek uıǵyr tilin ǵana emes, onyń salt-dástúrin, tabıǵatyn, názik tustaryn jaqsy bilgendikten meıirimmen, júrekpen aýdarǵan. Biz soǵan qýanyshtymyz. О́ıtkeni, jaqsy shyǵarma halyqtyń murasy, halyqtyń qazynasy, baılyǵy, memlekettiń dáýleti. Mine, sony Dáýletbek máshhúr qazaq oqyrmandaryna jetkizdi. Sol úshin aýdarmashy, birinshi dárejeli halyqaralyq Ilham syılyǵyna ıe bolǵan.
Odan keıin elordadan jetken qýanyshty habardy «An-Arys» baspasynyń dırektory, belgili aqyn Kádirbek Qunypııauly jetkizip, aqyn qyzǵa shyǵarmashylyq tabys tiledi.
«Qurmetti Patıgúl Mahsatova! Joldaǵan hatyńyz ben qoltańba jazyp syılaǵan «О́zińe senem» dep atalatyn jyr jınaǵyńyz Memleket basshysy Nursultan Ábishuly Nazarbaevqa tanystyryldy. Prezıdent jyly lebizderge toly hatyńyz ben syı-qurmetińiz úshin sizge alǵysy men izgi tilekterin jetkizýdi tapsyrdy. Elbasymyz sizge zor densaýlyq pen baqyt, shyǵarmashylyq izdenister, tabystar tileıdi. О́leńderińiz oqyrmandar oıynan shyǵa bersin. Syılaǵan kitabyńyz Elbasy kitaphanasynyń qorynda saqtalatyn bolady.
Qurmetpen, Mahmut Qasymbekov».
Sondaı-aq tanystyrylymda belgili aqyn, Memlekettik syılyqtyń laýreaty, «Juldyz» jýrnalynyń bas redaktory Ulyqbek Esdáýlet «Teńizdiń dámin tamshydan bilesiń» degen, jaqsy aýdarmalardyń arqasynda Patıgúldiń osy kitaptaǵy birqatar óleńderi «Juldyz» jýrnalynda da jarııalanǵanyn, tutas túrik ádebıetin alatyn bolsa, uıǵyr ádebıeti sonyń bir butaǵy, shyn mánindegi irgeli ádebıet ekenin, sonymen qatar, uıǵyr ádebıetiniń arǵy klassıkterin aıtpaǵannyń ózinde, Zııa Sámedı, Hızmet Abdýllın aqsaqaldardyń kózin kórgenin, Jameletdın Bosakov aǵaımen kórshi tursa, Turǵan Tohtamov aǵasymen «Jazýshy» baspasynda birge qyzmet istegenin, Shaıım Shavaev aǵalarmen jaqyn syılasyp júrgenin de tilge tıek ete kele, estelikke uly Abaı babamyzdyń músinin tapsyrdy.
Aýdarmashy Dáýletbek Baıtursynuly bolsa jalpy uıǵyr halqynyń talantty aqyn qyzy Patıgúl Mahsatovanyń bul eńbegi uıǵyr aqyndarynyń, uıǵyr halqynyń tabıǵatyna tán jazylǵan dúnıe ekenin, qazaq oqyrmandary oqyǵanda eshqandaı kedir-budyry bolmasyn, qazaqtyń bir aqyn qyzy retinde qabyldasyn dep bar kúshin salyp aýdarǵanyn jetkizdi. Sondaı-aq, avtordyń shyǵarmashylyǵy jaıly «Qazaq ádebıeti» gazetinde, «Juldyz» jýrnalynda jaqsy aıtylyp, «Egemen Qazaqstan» gazetinde Qorǵanbek Amanjoldyń aqyn Patıgúlmen ádemi suhbaty jarııalanǵanynan da habardar etti.
О́z kezeginde Patıgúl tusaýkeseri ótkizilip jatqan eńbegin Qazaqstannyń 25 jyldyq Táýelsizdiginiń toıyna tartý retinde usynǵanyn, onyń ústine, bıyl Prezıdenttiń pármenimen Memlekettik stıpendııanyń ıegeri atanyp, sol aqshany osy kitabyna jumsap, qazaq halqyna degen dostyqtyń kórinisi, qos ulttyń ádebıetinde kópir bolsyn degen nıette shyǵarǵanyn tebirene jetkizdi.
Táńirdiń bir qudireti bolýy kerek, meniń bul kitabym elimizde tuńǵysh ret toılanyp otyrǵan 1 naýryz – Alǵys kúniniń dál aldynda jaryq kórdi. Sosyn oılanyp, osy eńbegimniń shyǵýyna Memlekettik stıpendııa arqyly qoldaý kórsetken Prezıdentimizge nege alǵysymdy aıtpasqa dep, jyly lebizimdi bildirip, qoltańbamdy qoıyp Astanaǵa salyp jibergenmin. Biraq hatyma jaýap kele me, kelmeı me degen eki oıda boldym. Elbasynyń uıǵyr halqyna degen qurmeti bolýy kerek, Prezıdent ákimdiginen hat kelgen soń, Memleket basshysy tanysqan kitapty nege halqyma tanystyrmasqa dep, búgin tanystyrylym rásimin jasap otyrmyn. Maǵan kómektesken qazaqtyń belgili aqyny Dáýletbek Baıtursynuly kitapty kóńilimdegideı aýdardy. Bizdiń dostyǵymyz tek sóz júzinde emes, Elbasynyń saıasatyn, Qazaqstan úshin atqaryp jatqan osynshama qyrýar eńbegine osyndaı is sharalarymyz arqyly jaýap berip, basqa ulttarǵa, halyqtarǵa nasıhattaımyz dep oılaımyn. Sondyqtan, kitaptyń tusaýkeserine kelgen qazaq, uıǵyr halqyna rızashylyǵymdy bildiremin. Bul – eki halyqtyń ejelden kele jatqan dostyǵynyń búgingi kórinisi dep bilemin. Qazaqstannyń gúldenýi úshin shyǵarmashylyq adamdary óleńderimiz, kitabymyz arqyly qolymyzdan kelgenshe úles qosamyz dep oılaımyn, – dedi aqyn inisi Dáýletbekke shapan jaýyp, qurmet kórsetken aqyn qyz.
Sondaı-aq, tanystyrylymda jazýshylar Dýrnám Mashýrova, Avýt Másimov, kitapqa alǵysóz jazǵan belgili jazýshy, «Juldyz» jýrnalynyń bólim redaktory Dildar Mamyrbaeva, M.Áýezov atyndaǵy ádebıet jáne óner ınstıtýtynyń bas ǵylymı qyzmetkeri, fılologııa ǵylymdarynyń doktory Gúljahan Orda, tanymal kásipker, mesenat Dılmýrat Kýzıev, «Uıǵyr avazı» gazetiniń jaýapty hatshysy Muhtarjan Jumarov, t.b. aqynnyń ómirdiń ózindeı shynaıy jyrlary jaıly sóz etti.
Gúlzeınep SÁDIRQYZY,
«Egemen Qazaqstan»