Keshe Ulttyq murajaı ujymynyń uıymdastyrýymen Balalardy qorǵaýdyń halyqaralyq kúnine oraı «PERSONA plus» art-ortalyǵynyń «Ashyq alaqan» qaıyrymdylyq kórmesi ashyldy.
«Kórmege art-ortalyq stýdentteriniń eń úzdik kórkem týyndylary qoıylyp, olardy murajaıǵa kelýshilerdiń satyp alýyna múmkindik berildi. Barlyq túsken qarjy «Balam-Aı» QQ múmkindigi shekteýli balalar men jastardy áleýmettik qoldaý ortalyǵyna jiberiledi. Jas sýretshilerdiń shyǵarmashylyǵy kómekke muqtaj balalarǵa meıirim men qamqorlyq jasaýǵa baǵyttalǵan», deıdi sharapatty sharany uıymdastyrýshylar.
«PERSONA plus» art-ortalyǵy 2008 jyly tamyz aıynda Astana qalasynda ónerdiń dańǵyl jolyna túsip, shyǵarmashylyq múmkindikterin ári qaraı damytýdy kózdeıtin sýretshilerdi óz stýdııasyna biriktirý maqsatymen ashylǵan. Ortalyqtaǵy úıretý baǵdarlamasy akademııalyq beıneleý óneri mektebiniń jáne oqytýshylardyń avtorlyq josparlarynyń negizinde qurylǵan. Sonymen qatar, «PERSONA plus» balalar shyǵarmashylyǵyn dáripteýge baǵyttalǵan jobalarǵa qatysyp, ártúrli kórmeler uıymdastyrady. Beıneleý jáne sándik qoldanbaly óner, dızaın boıynsha sheberlik-synyptaryn ótkizedi.
Art-ortalyqtyń stýdentteri «Balalar beıbitshilikti salady» (Qazaqstan, 2009, 2010), «О́z jerińde» (Mınsk, 2012), «Kosta Brava sulýlyǵy» (Ispanııa, 2010), «Bul – meniń ómirim» (Japonııa, 2011), «Planeta balalary dos» (Belarýs, 2013), «Balalar beıbitshilikti salady» (Ortalyq Azııa, 2013-2014), «Neva boıaýlary» (Sankt-Peterbýrg, 2015) sekildi balalar shyǵarmashylyǵynyń halyqaralyq jáne respýblıkalyq baıqaýlaryna qatysyp, elimizdiń abyroıyn asyryp júrgenin maqtanyshpen aıtýǵa bolady.
Qaıyrymdy qoǵamdy qalyptastyrýda mundaı sharalardyń mańyzy zor. Sondyqtan da, jurt bolyp jumylyp, bir adamdaı birigip, qaıyrymdylyq sharasynan qalys qalmaı, árbir adam óz úlesin qossa, arqadaǵy júktiń aýyrlyǵy sezilmeıtini sózsiz.
Kórmeniń ashylý saltanatynda osyndaı ıgi bastamany júzege asyrýǵa qolushyn bergen ata-analar men demeýshilerge murajaı atynan alǵys hattar tabys etildi.
Raýan Qaıdar,
«Egemen Qazaqstan»