Án baıqaýy márege jetti

Elordadaǵy Oqýshylar saraıynda 1 maýsym – Balalardy qorǵaýdyń halyqaralyq kúnine ári «Shalqar» ulttyq radıosynyń – 50, Qazaq radıosynyń – 95 jáne el Táýelsizdiginiń 25 jyldyǵyna oraı balalar arasynda uıymdastyrylǵan «Shalqar ánim» atty respýblıkalyq án baıqaýynyń qorytyndysy jarııalandy. Bir aıdan astam ýaqyt ishinde Kórkemdik keńestiń qaraýyna 5-12 jas aralyǵyndaǵy balalardan 50-ge jýyq jumys kelip tústi. Olardyń arasynan qorytyndy kezeńge 15 qatysýshy iriktep alyndy. Mereıtoılyq sharada óner kórsetken tanymal ánshiler arasynda Altynaı Jorabaeva, Marjan Arapbaeva, Dımash Qudaıbergen, Aısáýle Beısenhan jáne aǵaıyndy Júginisovter bar. Konsertte búldirshinder elimizdiń estrada ónerpazdarymen qosylyp án shyrqady. Qorytyndy nátıjesinde, baıqaýdyń Bas júldesin elor­dalyq úmitker Qab­dyl Nu­raıym ıelendi. Jeńim­pazǵa júldeni «Ádemi-aı» kompa­nııasynyń dırektory Bahargúl Tólegenqyzy tabystady. I oryn halyq áni «Haláýlimdi» oryndap, kópshilik yqylasyna bólengen Astana qalasynyń kishkentaı turǵyny Aıarý Rahatqa buıyrdy. II oryndy Maǵjan Jumabaevtyń sózine jazylǵan Kákim Erdibaevtyń «Sur qulyn» ánimen elordadaǵy №54 mektep-lıseıiniń oqýshysy Aıdyn Mádethan jeńip aldy. Jeńimpazǵa marapatty Qazaq radıosy dırektorynyń orynbasary – «Shalqar» radıosynyń dırektory Bolatbek Tólepbergen tabys etti. Sondaı-aq, talantty baldyrǵandar arasynan úsh birdeı III oryn ıegeri anyqtaldy. Olar: astanalyq úmitker Aısha Erlan, Emıl Janádilov jáne Batys Qazaqstan oblysynan kelgen Álisher Súndetov. Al III dárejeli dıplom astanalyq Tolǵanaı Esilbaıǵa berildi.  Júldegerlerge marapatty Qazaq radıosy baǵdarlamalar bóliminiń basshysy Ońǵarbek Quralov, «Shalqar» radıosynyń bas redaktory Serik Seıitman jáne «Baq orda» kompanııasynyń dırektory Mádı Manatbek tapsyrdy. Baıqaýdyń ózge qatysýshylary I, II, III dárejeli dıplom jáne baǵaly syılyqtarmen marapattaldy. Shara sońynda búldirshinderge ar­naıy ázirlengen tátti tort úles­ti­rildi. Keshti «Shalqar» radıo­sy­nyń jýrnalısteri Muhtar Tur­taıuly men Baǵdagúl Rahmetqyzy júrgizdi. Jaımashýaq jaz aıymen jarysa kelgen bul mereke balǵyn balalardyń qııalyna qanat bitirgendeı boldy. Raýshan SÚLEIMENOVA, «Egemen Qazaqstan»