TALDYQORǴAN. 2 maýsym. Almaty oblysynda álemdegi jabaıy almalardyń jartysyna jýyǵy ósedi. Bul týraly 7sunews.kz aqparyna súıengen egemen.kz tilshisi habarlady.
Munyń jaıyn oblystyq óńirlik kommýnıkasııalar qyzmetinde ótken brıfıngte sheteldik mamandar málim etti. Olardyń málimetinshe, Qazaqstannyń jabaıy almalary - álemdegi almalardyń qoldan ósiriletin mádenı túrleriniń túp atasy. Munda «Sıvers almasy» ataýly jabaıy alma ósedi. Oǵan HVIII ǵasyrda Orta Azııaǵa sapary barysynda jabaıy almalardy alǵash zerttegen nemis ǵalymy Ioganna Sıverstiń esimi berilgen. Keıin ǵylymı zertteýdi jalǵastyrǵan qazaq akademıgi Aımaq Janǵalıev «Sıvers» almasynyń 40 túrin anyqtap, ǵylymı sıpattama bergen.
Fransııanyń bas konsýly Patrık Renar, Ile jáne Jońǵar Alataýy qoryqtaryndaǵy alma baqtarynda zertteý júrgizgen fransııalyq belgili bıolog-ǵalym, óz elindegi «Alma» qaýymdastyǵynyń prezıdenti Ketrın Peks, «Benneton» qorynyń dırektory Marko Tomaro (Italııa) jabaıy almalardy zertteý barysyndaǵy jetistikterin ortaǵa saldy.
Kezdesýde sheteldik meımandar sondaı-aq jýrnalısterge jabaıy almalar kóleminiń 48 paıyzy ornalasqan aıryqsha aımaq - Jetisý ólkesindegi genetıkalyq qordyń saqtalýy, ony damytý týraly jáne tabıǵattyń bul baılyǵyn paıdalana otyryp, týrıstik áleýetti kóterý joldaryn áńgimelep berdi.
Nurbol Áldibaev.
Derek, foto: 7sunews.kz.