Anglııanyń Grınvıch ýnıversıtetiniń stýdenti, 21 jasar aqtóbelik qyz Áıgerim Ismaǵulova kútpegen jerden Ulybrıtanııa patshaıymy Elızaveta II-niń 90 jasqa tolýyna baılanysty ótetin toıǵa shaqyrý bıletin aldy. Bolashaq qarjyger buǵan mereıtoı qarsańynda oınalǵan shaqyrý bıletin utyp alý arqyly qol jetkizdi. Osynyń arqasynda ol patshaıymnyń ata-tektik saraıynda úsh kún boıy toılanatyn ulan-asyr toı qonaqtarynyń biri bolǵaly tur.
Shekteýli mólsherde bólingen toıǵa shaqyrý bıleti negizinen koroldik azamattary arasynda oınalǵan. Oǵan, sondaı-aq, tilek bildirgen kez kelgen adam, sonyń ishinde syrttan kelip oqyp jatqan stýdentter de qatysa alǵan. Mine, osyndaı múmkindik týǵan kezde ony Áıgerim paıdalanyp qalǵan.
«Men bıletti sýyryp alǵanda, tilden aıyrylyp qalǵandaı kúı keshtim. Munshalyqty sáttilik bolady dep kútken emes edim. Mundaı bılet múldem satylmaıtyn edi», – deıdi qýanyshtan kóńili shalqyp turǵan qazaq qyzy.
Patshaıym Elızavetanyń 90 jyldyq mereıtoıyna kileń lordtar men joǵary qaýym músheleri qatysady. Onyń baǵdarlamasynda túski as, baldyq bı keshi, patshaıym atty gvardııasynyń saltanatty sherýi sekildi kóptegen qyzyqty sharalar bar.
Elızaveta II 21 sáýirde týǵan. Biraq resmı toılaýdy maýsym aıyna qaldyrǵan bolatyn. О́z týǵan kúninde patshaıym jubaıymen birge Vındzor parkindegi «Patshaıym soqpaǵyn» resmı túrde ashady. Onyń boıynda Joǵary mártebeliniń ómirindegi 63 mańyzdy oqıǵamen tanysýǵa bolady. Osydan soń patshaıym bıyl 90-ǵa tolyp otyrǵan otandastarymen birge shaı ishedi. Keshke qaraı Vındzor zamogynda otbasy sheńberinde keshki as beriledi. Osy kezde búkil elde aspanǵa otshashý atylady.
Murat AITQOJA