AQSh-ta Sten Larkın esimdi 25 jastaǵy jigit 17 aı boıy júreksiz ómir súrip kelgen eken. Dárigerler mańyzdy organnyń ornyna arnaıy apparat qoıǵan. Pasıent ony sómkesine salyp arqalap júripti.
Osydan 10 jyl buryn aǵasy ekeýine «otbasylyq kardıomıopatııa» degen dıagnoz qoıylǵan. Ol – tuqym qýalaıtyn mıokard derti. Adamnyń 10-20 jas aralyǵynda júregi syr berip, jumys isteýin toqtatady. 2014 jyldyń jeltoqsan aıynda Larkınniń osy organyn alyp tastapty. Mamandar onyń ornyna jasandy júrek qoıyp, salmaǵy 6 kılo bolatyn SynCardia Freedom Portable Driver apparatyna jalǵaǵan. Ol adam aǵzasynda qan aınalym júıesin qamtamasyz etedi.
Osy aǵzaǵa baılanysty aıyqpas dertke shaldyqqandar úshin bul – taptyrmas qurylǵy. Júrektiń qyzmetin tolyǵymen atqara alady. SynCardia Freedom Portable Driver 2014 jyly búkil klınıkalyq synaqtardan sátti ótken. Al sol jyly Avstralııada hırýrg mamandary dúnıejúzinde alǵashqy bolyp jasandy júrekti úsh adamǵa qoıypty. Bári sátimen júzege asqany ǵalymdardy eriksiz tańǵaldyrdy. Jańa tehnologııalar organdardy aýystyrý kezinde adam ómirin kem degende 30 paıyzǵa deıin saqtaıdy.
Qazirgi tańda álemde kóptegen adam organ aýystyrýdan qıyndyq kórýde. Málimetter boıynsha, bir ǵana AQSh-ta transplantasııa úshin 121 myń adam kezekte tur. Al bul isti der kezinde júzege asyra almaýdyń saldarynan kúnine ortasha eseppen 22 adam qaıtys bolady eken.
Aıan ÁBDÝÁLI,
«Egemen Qazaqstan»