Elordada qylmystyq kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq toptyń XXIV jalpy otyrysy ótti.
Elimiz EAT kelisimine qol qoıǵaly, ıaǵnı 2011 jyldan beri atalǵan toptyń plenarlyq otyrysy bizdiń respýblıka aýmaǵynda birinshi ret ótkizildi. Sharaǵa Eýrazııalyq topqa múshe memleketter men baqylaýshy mártebesine ıe 15 el men 18 halyqaralyq uıymdar ókilderi qatysty. Eýrazııa keńistiginde terrorızmdi qarjylandyrý jáne aqshany jylystatýdyń tıpologııalyq shemalary, sonymen qatar, qylmystyq kiristerdi jylystatýmen baılanysty qarjylyq aǵyndardy saraptaý jáne IGIL (Qazaqstanda tyıym salynǵan) terrorıstik uıymyn qarjylandyrýmen kúresýdegi FATF ǵalamdyq júıesiniń ókilderi qoldanatyn jalpy sharalar jıyntyǵy talqy bolǵan otyrysty Premer-Mınıstrdiń birinshi orynbasary Baqytjan Saǵyntaev ashty. Ol óz sózinde lańkestiktiń jańa syn-tegeýrinderiniń paıda bolýy jahandyq qoǵamǵa ózara is-qımyldyń jańa tıimdi joldaryn izdeýdi talap etetinin jetkizdi. Sondaı-aq, kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi EAT músheleri men baqylaýshylarynyń ár jańa kezdesýi uıymnyń tarıhyna jańa paraq qosatynyn qadap aıtty. Bul bizdi FATF jahandyq jelisiniń mańyzdy jáne ajyramas bóligi etedi, EAT-tyń basty mindeti – senimdilik pen qarjy uıymdarynyń qaýipsizdigine jaýap berý, memleketter arasynda ıntegrasııalyq yntymaqtastyq ornatý, qylmystyq kiristerdi zańdastyrýǵa jáne terrorızmdi qarjylandyrýǵa qarsy is-qımyldy birge júrgizý bolyp tabylady, dedi Úkimet basshysynyń birinshi orynbasary.
Sonymen qatar, atqarylyp jatqan jumystardyń transshekaralyq qylmystardyń aldyn alýǵa múmkindik beretinine toqtalyp, álemdegi sońǵy oqıǵalar ózgeshe sharalar qarastyrýǵa májbúrleıtinin nazarǵa aldy. Onyń aıtýynsha, Qazaqstan turaqtylyqty saqtaý, qaýipsizdikti qamtamasyz etý, adamzat pen álemge tóngen qaýip-qaterge qarsy áreket etý barysynda barlyq qajetti sharalardy qoldanýda. Osy rette birinshi vıse-premer ulttyq zańnamalardyń jańartylǵan halyqaralyq standarttarǵa sáıkestigin baǵalaýdyń ekinshi raýndy EAT-ǵa múshe elderiniń aldyna jańa mindetter qoıatynyn basa aıtty. Jáne de EAT-tyń XXIV jalpy otyrysy aqshanyń jylystaýymen jáne terrorızmdi álemdik deńgeıde qarjylandyrýmen kúreste biryńǵaı tásil ázirleý úderisinde salmaqty úles qosatynyna senim bildirdi.
Qazirgi tańda EAT-qa múshe memleketter úshin Irak pen Lıvannyń Islam memleketi (Qazaqstanda tyıym salynǵan) dep atalatyn terrorıstik uıymynyń is-áreketimen kúreske baǵyttalǵan birikken sharalardy kúsheıtý máselesi negizgi basymdyqqa ıe bolyp otyr. Esirtki saýdasyn, qylmys pen terrorızmdi qarjylandyrý jáne quqyqtyq máselelerdiń qorytyndylary jasalǵan otyrys aıasynda EAT tóraǵasy, Reseı Federasııasynyń qarjylyq monıtorıngi boıynsha Federaldyq qyzmetiniń dırektory Iýrıı Chıhanchın sóz aldy. Osydan birneshe kún buryn oryn alǵan qaıǵyly oqıǵaǵa baılanysty Qazaqstan turǵyndaryna kóńil aıta kele, Iý.Chıhanchın búgingi kúnniń kún tártibinde turǵan ózekti máselelerdiń biri de osy terrorlyq is-qımylǵa qarsy kúres pen lańkestik áreketterdi qarjylandyrýǵa qarsy baǵytta ekendigin aıtty. Bul rette ol Qazaqstannyń halyqaralyq alańǵa óte belsendi qatysyp, lańkestikpen kúresýde basym baǵyttardy qolǵa alyp otyrǵanyn jetkizdi.
Elmıra MÁTIBAEVA,
«Egemen Qazaqstan»