Osy zamanǵy medısına men bıologııa ǵylymdary barynsha damyp otyrsa da, qaterli isikke qarsy daýa taba almaýda. Sonyń kesirinen dúnıejúzinde mıllıondaǵan adam týǵan-týystaryn qan jylatyp, jyl saıyn ómirmen erte qoshtasady. Bizdiń elimizde de solaı. Onkologııalyq aýrýlardy anyqtaý men onyń aldyn alýǵa qanshama áreketter jasalyp jatqanymen, onyń sany azaıar emes. Tipti, sońǵy jyldary onyń 9 paıyzǵa artqandyǵy málim bolyp otyr. Dástúrli túrde jasalatyn hırýrgııalyq ota, hımııalyq sáýleler arqyly isiktiń tamyryn joıý ádisteri de qalaǵan nátıjelerimizge qol jetkizbeýde.
Al damyǵan shetelderde bul náýbetke qarsy kúres únemi jetildirilip, emdeýdiń jańa tásilderi ashylyp otyrady. Innovasııalyq tehnologııalardy engizýdiń bizdegi sylbyr deńgeıi aldyńǵy qatarly sondaı tásilderdi meńgerýge de múmkindik bermeýde. Alaıda, aýyzdy qý shóppen súrte berýge de bolmaıdy. «Onkologııa jáne transplantologııanyń ulttyq ortalyǵy» AQ 2012 jyldan bastap, onkologııalyq dertterdi emdeýdiń jańa tásilderin meńgerýde. Ol onkodertterdiń ári qaraı jaıylmaı, damýyn turaqtandyryp, isikti regressııalyq jolmen birtindep qurtýǵa baǵyttalǵan. Bul em sharalaryn aýyrtpaıtyn preparattardy qoldanbaı-aq jasaýǵa múmkindik beredi jáne pasıentterdiń ómirin uzartady. Osy jobanyń sheńberinde mıynda paıda bolǵan qaterli isikten 95 adam emdelip shyqty. Jańa tásildiń tıimdiligi 65 paıyz ekendigine kózimiz jetip otyr.
Qazaqstandyq jobanyń tıimdiligine sheteldik mamandar da nazar aýdaryp, ortalyqta birneshe halyqaralyq semınarlar ótkizildi. Álemniń belgili neırohırýrgteri oǵan ózderiniń joǵary baǵalaryn berdi.
Osyndaı qol jetkizgen tabystyń keıingi taǵdyry endi ne bolyp jatyr deısiz ǵoı. Daǵdarys talaptaryna sáıkes jobany qarjylandyrý 2015 jyldan bastap toqtatyldy. «Altyn shyqqan jerdi belden qaz» degen bar emes pe, elimiz úshin ǵana emes, búkil álemdik deńgeıde úlken jetistik bolyp tabylatyn jobany jappaıyq, kerisinshe, odan ári damytaıyq dep qarajat surap, Densaýlyq jáne áleýmettik damý mınıstrligine barǵan ótinishimiz aıaqsyz qaldy. Osy máselelerdiń bárin aıta otyryp, Densaýlyq jáne áleýmettik damý mınıstriniń atyna taǵy da depýtattyq saýal joldadyq. Halyqtyń áleýmettik damýy men densaýlyǵynyń jaqsarýyna múmkindik jasaýǵa tıisti vedomstvo tıimdi jobany jalǵastyrýǵa qarjy tabar degen úmittemiz.
Quralaı QARAKEN,
Májilis depýtaty