Mektep túlekteri sport saraıy men stadıon salyp berdi
Ordabasy aýdany Tórtkúl aýyldyq okrýgine qarasty Qyzyljar aýylyndaǵy jalpy orta mekteptiń túlekteri 20 jyldyqtaryna oraı sport zal salyp beripti.
Myńǵyrǵan maldy aıdap júrgen kásipker salsa jarar, al, mektep túlekteriniń jóni basqa ǵoı.
«Qyzyljar» aýylyna tartyp kettik. Eskertpeı kelgenbiz. Biz barǵanda el Táýelsizdiginiń 25 jyldyǵyna oraı jasóspirimder arasynda oblystyq týrnır ótip jatyr eken.
Keriskedeı keń zal. Sharshy alańda 2005-2008 jyly jáne 2003-2004 jyly dúnıege kelgen barmaqtaı balalar soıqan urys salyp jatyr. Qazaqstan álemge boks sportymen de aty shyqqan memleket, dúnıejúzinde úzdik úshtikke san ret kirgen. Sony myna barmaqtaı balalar aqtap jatyr. Bas-kózge tópelep, jabaıy urys salyp júrgen joq, ózderine tán mashyqtary bar, soǵan salǵysy keledi.
Jarystyń bas tóreshisi osy saraıdy salýǵa muryndyq bolǵan azamattardyń biri Erhan Dáýetaımen tanystyrǵan. Eki ıyǵyna eki kisi mingendeı deneli, myǵym sóıleıtin Erhanymyzdyń ózi boksshy eken. 1979 jyly dúnıege kelgen 20 jigit Qyzyljar jalpy orta mektebin bitirgenderine 20 jyl tolý qurmetine ne syı jasaý kerektigine kelgende aqyldasyp, sport saraıyn salyp berýge ýaǵdalasypty.
Qyzyq bolǵanda, syrttan eshqandaı jumysshy tartpaǵan, irgetasty ózderi quıǵan, qabyrǵany ózderi órgen, shatyrdy ózderi japqan. Sylaqshy da, aǵash, temir sheberi de ózderi.
– Ishimizde artyq dúnıesimen erekshelenetin eshkim joq, sondyqtan jaldamaly qurylysshylarǵa aqsha tóleýdi jón kórmedik, – deıdi Erhan. – Qarajat únemdeý kerek boldy. Árıne, biz jumys bastaǵanda tas, qum taǵy basqa kerek qurylys materıaldarynan kómektesken baýyrlarymyz boldy, olarǵa Alla razy bolsyn.
Erhannyń boksshy ekendigin aıttyq. Kórshiles oblystarda jattyqtyrýshy bolyp jumys jasaǵan ol aýylyna kelgende kishkentaı inileriniń boksqa qumartatyndyǵyn, múmkindikteri joqtyǵyn baıqaıdy. Sodan soń bir qora balany úıirmege jazdyryp, ózi boks ónerine daıyndaı bastaǵan. Shaǵyn mekteptiń zaly da shaǵyn. Túrli úıirmelerden bosamaıdy. Erte kóktemnen qońyr kúzge deıin balalardy óz úıiniń aýlasynda jattyqtyrǵan Erhan qabaǵy qatý qys kelgende amalsyz óz úıiniń zalyna kirgizedi. Shákirtteri senimin aqtaǵan. Arasynda oblystyq jarysta oza shaýyp báıge alǵany bar.
Biraq, jaǵdaı kelispegen jerde túpkilikti nátıjege jetý qıyn.
Jumysy ónbegenine narazy bolǵan Erhan qolyn bir siltep, Astanaǵa ketedi.
Mektep túlekteriniń talantty inileriniń sport úıirmelerine qatysa almaı júrgendigi qabyrǵalaryna aıazdaı batsa kerek, sport saraıyn salýǵa bári qulshynady.
Maýyzdaı 20 jigit jan-jaqtan kirisip bergende nar jolynda júk qala ma?!
Erhan, Maqsat, Ábseıit, Dáýlet, Qýandyq, Nurbol, Muhan, Qaırat, Erjan, Kárim, Erǵalı, Bekzat, Qanat, Birjan sııaqty jigitterdiń endigi maqsaty sport saraıyn keńeıtip, qosalqy bólmeler salý. Kúsh-jiger, uıymshyldyq bar, qarjy tabylady.
Erhan Astanadan aýylǵa oralmaqshy. Qyzyljardyń boks dese ishken asyn jerge qoıatyn kógenkózderin ózi baýlymaq.
Jalpy, bul aýyl jigitteriniń bir úıdiń balasy, bir qoldyń salasyndaı uıymshyldyǵy bizge unady.
Budan buryn 1977 jyly dúnıege kelgen túlekter aýyl jastaryna syı retinde ashyq stadıon salyp beripti. Jan-jaǵyna saıasy mol terek egilgen stadıon fýtbol oıynyna laıyqtalǵan. Júgirý, jattyǵý jasaý alańdary bar. Bergi jaǵyndaǵy bos alańqaıǵa 1979 jylǵy órender júz túp alma aǵashyn ekken. О́zderi qudyq qazyp, sý shyǵarǵan. «Bolashaqta bul jerge balalar saıabaǵyn salamyz» deıdi.
Shynyn aıtsaq, Qyzyljardan qatty qýanyp qaıttyq. Oı, mynalar naǵyz azamat qoı. Qarjy tapshylyǵy qysyp, eki qoldy bir ete almaı turǵanda aýyl túlekteri stadıon salǵan. Sport saraıyn salǵan.
Alma baýy bar. Endi balalar saıabaǵyn salmaq.
Eki júzdeı ǵana tútini bar shaǵyn aýyl oblys birinshiligin ótkizip jatyr. 200-diń ústinde boksshy kelgen. Oǵan bapkerlerdi, tóreshilerdi qosyńyz. Shaǵyn aýylda qonaqúı degen atymen joq. Erhan bastaǵan jigitter úı-úıge bólip aldyq deıdi. Namysqa tyrysyp kúnine eki qoı soıyp kútip jatyr.
Bular «Memleket maǵan ne beredi» demeıdi, óziniń Otanynyń kórkeıýine osylaısha úles qosyp jatyr.
Azamattar-aı. Qazaqtyń myqtylyǵy birliginde ǵoı.
Baqtııar TAIJAN,
«Egemen Qazaqstan»
Ońtústik Qazaqstan oblysy,
Ordabasy aýdany