Qudaı qosqan qosaǵy aıaq astynan dúnıe salǵan kezde Bıǵaısha 24 jasqa endi ǵana ıek arta bastaǵan qol-aıaǵy balǵadaı kelisti kelinshek edi. Bul taǵdyrdyń salǵan isine ne shara?! Aqbópe, Eldos jáne Aqmaral atty úıelmeli-súıelmeli úsh perzentimen birge ol azamatynyń artynda botadaı bozdap qala berdi. О́zi jas, ózi kórkem kelinshekke el ishinde otbasyn quraıyq dep sóz salýshylar az bolǵan joq. «Maǵan baı tabylar-aý. Alaıda, ákesiniń artynda qalǵan úsh qarǵashyma qaraǵashtaı pana, báıterekteı saıa bolarlyqtaı asyl azamat tabyla qoıar ma eken?».
Eń aldymen ony osy másele kóbirek tolǵandyryp edi. Osy saýal jeteginde qabyrǵasymen kóp keńesti. Alaıda, túbegeıli de tııanaqty sheshimge kele almady. Áıtse de tekti áýletten shyqqan reseılik qazaq azamat ornyqty da kesimdi sózin aıtqanda Bıǵaısha óziniń keleshektegi taǵdyryn onymen baılanystyrǵandy jón kórdi. Sóıtip, bizdiń búgingi keıipkerimiz sonaý sekseninshi jyldyń jazynda óz júreginiń qalaýyn bildirgen reseılik qazaq azamatyna turmysqa shyǵady. Ári sol jaqqa sol jazda qonys aýdarady.
Osy arada onyń ishki jan dúnıesin qınaǵan bir másele bar edi. Úsh perzentiniń biri Aqmaraldy naǵashy apasy dúnıege kelgennen-aq ózine jaqyn tartyp: «Aqmaral maǵan qyz bolady», dep ózinshe enshilep júrýshi edi. Keterinde ol kisi Bıǵaıshaǵa: «Aqmaraldy maǵan qaldyryp ket. О́zim ósirip ózim tárbıeleımin eshkimnen kem qylmaımyn», degen ótinishin aıtady. Bıǵaısha bul tilekti qaıtara almady.
Bul osydan otyz jyl buryn bolǵan jaǵdaı edi. Jas óspeı me, jarly baıymaı ma degendeı arada biraz jyl ótken kezde Aqmaral da boıjetti. Ońy men solyn tanydy. Osy kezden bastap ony anasyn izdep tabý kerektigi jónindegi oı jıi-jıi mazalaı berdi.
Osy oımen Kaztalov aýdany, Taldyapan aýylynyń turǵyny Aqmaral Omarova 2000 jyldyń bas kezinen anasyna izdeý sala bastady. Respýblıkalyq «Barmysyń baýyrym?» baǵdarlamasyna birneshe ret bas suǵady. Alaıda anasyn izdegen qyzdyń is-áreketteriniń bári eshqandaı nátıje bermeıdi. Degenmen, jyrtyq úıdiń de qudaıy bar degendeı ótken jyly anasynyń bir deregi ashylǵandaı bolady. Bul qýanyshty habardy jetkizýge túrtki ári sebepker bolǵan muraǵattanýshy-jýrnalıst, Jánibek aýdandyq «Shuǵyla» gazetiniń bas redaktory Ahmedııar Batyrhanov bolyp shyǵady. Sonda qalaı bolǵany? Bul arada birinshiden aıtaıyn degenimiz, áriptesimiz Ahmedııar Batyrhanov buǵan deıin de bir birin joǵaltyp alǵan baýyrlardy tabystyrýǵa dáneker bola bilgen qulaǵy túrik izdenimpaz jan ekendigi. Habar Kaztalov aýdanynyń Taldyapan aýylynda turatyn Aqmaral Omarovanyń qulaǵyna jetedi. Sóıtip, ol telefon shalyp oǵan habarlasady. Qulaǵy qashan da túrik júretin azamat qoı. Ahmedııar Aqmaraldyń anasyna qatysty anyqtamany kezdeısoq kezdesken tanystardan estigenin málimdeıdi. Qudaı sátin salǵanda bul anyqtama shyndyqqa aınalady.
Sóıtip, aýdandaǵy áriptesimiz Aqmaraldyń anasynyń qazirgi turatyn mekenjaıyn kózben kórip qolmen ustaǵandaı dálme-dál anyqtap izdeýshige habar beredi. Bul búginde jasy alpystyń ústine shyqqan Bıǵaısha esimdi jasy ulǵaıǵan jan bolyp shyǵady. Ol Reseıdiń Volgograd oblysyna qarasty Bykov aýdanynyń turǵyny eken. Tipti, A.Batyrhanov Aqmaraldyń anasynyń osy aýdandaǵy Katrıchev aýylynda turatynyn da dál anyqtap beripti. Mine, naǵyz azamat naǵyz zerdeli, suńǵyla jan dep osy Ahmedııardy aıtyńyz.
Uzyn sózdiń qysqasy taıaýda anasy men qyzy qaıta tabysty. Reseıge Aqmaraldyń súıip qosylǵan jubaıy Qaýys márttik tanytyp ózi bastap alyp barypty. Sóıtip, qyz arada 36 jyl ótken soń anasynyń aıdaı dıdaryn kórdi. Ottaı ystyq omyraýyna kómildi. Anasy men qyzynyń qushaqtary aıqasyp janarlary jasqa toldy. Ekeýi birin biri aımalap, óbip, birine biri eljireı uzaq qarap turypty. Oblystyq «Oral óńiri» gazetinen osy qaýyshý jóninde Danııar Ospannyń materıalymen tanysqan kezde oqıǵa izimen taǵy bir márte alǵa attaı otyryp tolǵaýy toqsan tirshiliktiń osyndaı bir ıirimderi jóninde áńgime qozǵaǵandy jón kórdik.
Temir QUSAIYN,
«Egemen Qazaqstan»
Batys Qazaqstan oblysy