On bir jyl bilim alǵan oqýshynyń biliminiń saralanar sáti keldi. Budan úsh jyl buryn UBT-dan Atyraýdaǵy aǵylshyn tilin tereńdetip oqytatyn tehnıkalyq gımnazııanyń úsh oqýshysy 125 ball alǵan edi. Alaıda, bıyl Atyraý mektepterin bitirgen 4633 oqýshynyń birde biri dál osyndaı eń joǵary kórsetkishke qol jetkizbedi. Olardyń arasynan 3110 oqýshy ǵana UBT tapsyrýǵa nıet etipti. Bulardyń basym bóligi synaqty qazaqsha tapsyrǵan. Qazir mektep bitirýshilerdiń bári de UBT-dan qansha ball alǵanyn biledi. Atyraýlyq túlekter arasynan tek J.Dosmuhambetov atyndaǵy lıseıdiń bitirýshisi Jadyra Qattar ǵana 123 ball jınady. Ol UBT suraqtaryna bergen jaýabynyń ekeýinen qatelesipti.
Oblys ákiminiń orynbasary Álibek Náýtıevtiń málim etýinshe, mektep bitirýshilerdiń UBT-daǵy ortasha kórsetkishi 70 paıyzdy qurap otyr. Oqý jylynyń aıaǵynda 76 túlek «Altyn belgi» alýǵa úmitker bolǵan eken. Alaıda, báriniń birdeı úmiti aqtalmady. Bap ta, baq ta synalǵan sátte 39 túlek qana ózderiniń bilimimen úzdikterdiń úzdigine ǵana beriletin «Altyn belgige» laıyqty ekenin dáleldeı aldy. Al «Úzdik attestatty» tek 6 túlek alatyny belgili boldy. Bastapqyda ataýymen erekshelenip turatyn bul attestatty ıelenýge 18 túlektiń múmkindigi bolǵanymen, synaq qorytyndysynda olardyń tek úshten biriniń ǵana joly ońǵaryldy.
– Mektep bitirýshilerdiń 1 117-si, ıaǵnı, UBT tapsyrýshylardyń 35,9 paıyzy 50 ball jınaı almady. Eń joǵary kórsetkish –123 ball, eń tómengisi – 22 ball, – dep málim etti oblys ákiminiń orynbasary Álibek Náýtıev.
Inder jáne Maqat aýdandarynyń birde-bir túlegi «Altyn belgige» ıe bolǵan joq. Biraq, ótken jylǵyǵa qaraǵanda, UBT tapsyrý kezinde zań buzýshylyq baıqalmapty. Munyń sebebin oblystyq bilim basqarmasy basshysynyń orynbasary Zylıha Dúısekenova tómendegishe túsindirip berdi:
– Oqýshylardyń UBT-ǵa psıhologııalyq beıimdelýin qalyptastyrý, sonymen birge, olarǵa test tapsyrý tehnologııasyn túsindirý maqsatynda oqý jylynyń basynan birneshe ret synama testileý júrgizilgen. Ata-analar men oqýshylarǵa testileý erejesi tolyq túsindirilip, aýdıtorııalarǵa tyıym salynǵan quraldarmen kirýdiń erejege saı emestigi eskertildi. Osynyń nátıjesinde mektep bitirýshi oqýshylar zań buzýshylyqqa soqtyratyn óreskel áreketterge barmady. Olardyń tarapynan zań buzýshylyq bolmaǵannan keıin birde biri aýdıtorııadan shyǵarylǵan joq. Oqýshylar tek ózderiniń bilimine ǵana sendi.
Onyń pikirinshe, byltyrǵyǵa qaraǵanda, «Altyn belgi» ıegerleri 14-ke artyp otyr. 100 baldan joǵary alǵandar qatary 128-ge kóbeıipti. Biraq, «Úzdik attestat» alýshylar 2 oqýshyǵa kemigeni baıqalypty. Qalaı degende de, tek bilimdi oqýshynyń ǵana baǵy janyp, ustazdarynyń da, ata-anasynyń senimin aqtady.
Joldasbek ShО́PEǴUL,
«Egemen Qazaqstan»
ATYRAÝ