Premer-Mınıstr Kárim Másimov keshe jumys saparymen Aqtóbege keldi.Úkimet basshysy oblys ákimi Berdibek Saparbaevpen birge qalanyń jańa «Batys-2» shaǵyn aýdanyndaǵy kommersııalyq kóp qabatty úıge atbasyn tiredi. Bul jerde olar turǵyn úı qurylysy baǵdarlamasynyń júzege asyrylý qorytyndylarymen tanysty.
Kárim Másimovke memleket jáne jeke qurylysshylar tarapynan turǵyn úı qurylysy salasyna qatysty jasalyp jatqan ınvestısııalyq saıasattyń óńirde paıdalanýǵa beriletin turǵyn úı kólemin tómendetpeýge múmkindik berip otyrǵany týraly baıandaldy. Mysaly, ótken jyly barlyq qarjy kózderi esebinen 536,2 myń sharshy metr turǵyn úı paıdalanýǵa berilip, 4629 otbasy baspanaly bolǵan. Bıyl 580 myń sharshy metr turǵyn úı iske qosylady dep josparlanǵan, onyń 141,9 myń sharshy metri barlyq qarjy kózderinen iske qosylmaqshy.
Oblys ákiminiń orynbasary Jańabaı Beksary Premer-Mınıstrge «Nurly Jol» baǵdarlamasy aıasynda bıyl Ulttyq qor qarajaty esebinen oblıgasııa shyǵarý arqyly turǵyn úı qurylysyn salý qarastyrylǵanyn jetkizdi. Bul maqsattarǵa oblysta 2016 jyly «Nur Aqtóbe» turǵyn úı alabynda 6 joba qurylysyn bastap ketý úshin 4,5 mlrd. teńge qarastyrylǵan. Barlyq jumys 2017 jyly aıaqtalady, 75,9 myń sharshy metr turǵyn úı paıdalanýǵa beriledi, 1278 otbasy baspanaly bolady.
Jumys sapary barysynda Premer-Mınıstr «Azamattarǵa arnalǵan Úkimet» memlekettik korporasııasy» kommersııalyq emes aksıonerlik qoǵamynyń Aqtóbe oblysy boıynsha fılıaly – zeınetaqy tóleý jónindegi ortalyǵy» departamenti keńsesiniń jumysymen tanysty. Atalǵan joba óńirde Memleket basshysy Nursultan Nazarbaevtyń Bes ınstıtýttyq reformasyn júzege asyrý jónindegi «100 naqty qadam» Ult Josparyna sáıkes iske qosylǵan bolatyn. Qazirgi tańda munda 530-dan astam qyzmet kórsetiledi. 2018 jylǵa qaraı munda bir tereze qaǵıdasy boıynsha 709 memlekettik qyzmet túri kórsetiledi dep josparlanyp otyr.
Premer-Mınıstr «Nur Otan» partııasy oblystyq fılıalynda óńirdiń áleýmettik-ekonomıkalyq damý máseleleri boıynsha keńes ótkizdi. Is-sharaǵa birqatar memlekettik organdar jáne ulttyq kompanııalar basshylary, máslıhat depýtattary, úkimettik emes uıymdar, saıası partııalar, jurtshylyq ókilderi qatysty.
B.Saparbaev álemdik ekonomıkalyq daǵdarysqa baılanysty óńirde ónerkásip, ınvestısııa jáne qurylys jumystary kóleminiń sál tómendegenin jetkizdi.
– Qazirgi tańda biz ekonomıkany turaqtandyrý boıynsha sharalardy qolǵa alýdamyz. Bıýdjet 2,3 mlrd. teńgege ońtaılandyryldy. Atalǵan qarajat áleýmettik máselelerdi sheshýge jumsaldy. Sonymen birge, salyq salynatyn bazany 2 mlrd. teńgege keńeıtý jospary bekitildi, onyń 1,3 mlrd. teńgesi bıýdjetke tústi. Búginde bıýdjettiń kiris bóligi 113,3 paıyzǵa, shyǵys bóligi 98,5 paıyzǵa oryndaldy, – dep atap ótti oblys ákimi.
– Elimizdiń ońtústik oblystarymen kooperasııany damytý jóninde jumystar belsendi júrgizilýde. Mysaly, Qyzylorda oblysymen ónerkásip jáne aýyl sharýashylyǵy ónimderin jetkizý jóninde quny 3,3 mlrd. teńge bolatyn 36 kelisimge qol qoıyldy. Keıbir ónim túrlerine aımaqaralyq kooperasııanyń arqasynda baǵa 20-30 paıyzǵa arzandady, – dedi Berdibek Máshbekuly.
Aýyl sharýashylyǵy mınıstrligi, Aqtóbe, Batys Qazaqstan, Qostanaı oblystary jáne transulttyq «InalcaEurasia» kompanııasy arasynda ettik baǵyttaǵy mal sharýashylyǵynda óńiraralyq kooperasııa qurý, ınvestısııalyq quny 100 mln. eýro bolatyn bordaqylaý alańdaryn salý jóninde kelisimge qol qoıyldy. Sonymen qatar, aımaqta shaǵyn ferma qurý jóninde joba tabysty túrde júzege asyrylyp keledi, atalǵan joba aıasynda 1,4 mlrd. teńge ıgerildi.
О́ńir basshysy Úkimettiń qoldaýyn qajet etetin birqatar máselelerdi alǵa tarta sóıledi. Sýarmaly jerlerdi 11 myń gektarǵa arttyrý, pılottyq jobany júzege asyrý úshin jáne respýblıkadaǵy birinshi «Mal bırjasynyń» qurylysyna ınvestısııalyq sýbsıdııa bólý, jeke turǵyn úı qurylysyna jer bólý máselelerin sheshýde óńirdiń Úkimet kómegin qajet etetini áńgime ózegine aınaldy.
Alqaly jıynda shyǵyp sóılegender jer, mektep, onkologııalyq aýrýlardy emdeıtin aýrýhana, jol máselelerine qatysty oılaryn ortaǵa salyp, usynystaryn aıtty. Keńes qorytyndysy boıynsha K.Másimov áleýmettik máselelerdi sheshýge, eńbekpen qamtý, mektepter men balabaqshalardyń qurylysy, jastarmen jumys máselelerine basa nazar aýdardy. Kárim Qajymqanuly kóterilgen birqatar máselelerdiń sheshimin tabatynyn jetkizdi, tıisti mınıstrlikterge tapsyrmalar berdi.
Úkimet basshysy tústen keıin «Aqtóbequrylyshımmontaj» JShS-inde boldy. Zaýyt iske qosylǵannan beri 22 myń tonna polıetılen qubyryn shyǵardy. Munda qazir 90 adam eńbek etedi. Kásiporyn «Bıznestiń jol kartasy-2020» jáne «Damý-О́ndiris» memlekettik baǵdarlamalarynyń ıgiligin kórdi, qarjylaı qoldaýyn paıdalandy.
Premer-Mınıstr Aqtóbe rels arqalyqtary zaýytynyń jumysymen de tanysty. Zaýyt dırektory Andreı Kýzmın kásiporynnyń ótken jyly paıdalanýǵa berilgenin, jylyna 430 tonna ónim óndiretinin, onyń 200 myń tonnaǵa jýyǵy temirjol relsi, qalǵan 230 myń tonnasy bir qalypta quıylǵan prokat ekenin jetkizdi.
Premer-Mınıstr Aqtóbedegi saparynyń sońynda óńirdegi tamshylatyp sýarý júıesin qoldanyp jumys isteıtin iri sharýashylyq – «Prıgorodnoe» JShS-inde boldy. Seriktestik dırektory Ermek Jumaǵazın ústimizdegi jyly 150 gektarǵa kartop, 15 gektarǵa kókónis ósirip jatqanyn málimdedi. Splınkerlik jáne tamshylatyp sýarý tehnologııasynyń sońǵy býyndaryn paıdalanyp jatqanyn, sol arqyly sapaly da mol ónim alyp júrgenin jetkizdi. О́tken jyly sharýashylyqqa eginshilik salasy boıynsha 15,9 mln. teńge sýbsıdııa tólengen. Sońǵy úsh jylda seriktestikke 700 mılıon teńge ınvestısııa salynǵan. Seriktestik «Qazagroqarjy» AQ jáne «Agroservıs» JShS arqyly jalpy somasy 56,6 mıllıon teńgege tehnıka jáne 3 myń tonnalyq osy zamanǵy kókónis qoımasyn salǵan. Sharýashylyq oblystyń turaqtandyrý qoryn qamtamasyz etýge qatysady.
Úkimet basshysy óńirdegi júzege asyrylyp jatqan jumystarǵa oń baǵa berdi.
Satybaldy SÁÝIRBAI,
«Egemen Qazaqstan»
Aqtóbe oblysy