Jer máselesine qatysty zań jobasy

maquldanyp, Parlament Senatyna qaraý úshin joldandy Keshe Parlament Májilisinde Spıker Baqtyqoja Izmuhambetovtiń tóraǵalyǵymen palatanyń kezekti jalpy otyrysy ótip, onda kún tártibine sáıkes birneshe másele qaraldy. Sonyń ishinde halyqtyń alań­daýshylyǵyn týǵyzǵan byltyrǵy jylǵy Jer kodeksine engizilgen keıbir normalardyń toqtatyla turýy týraly zań jobasy birinshi kezek­te qaraldy. Bul zań jobasyn ázirleýge Prezıdent N.Nazar­baev­tyń ústimizdegi jylǵy 6 mamyr­daǵy «Jer zańnamasynyń keıbir normalaryn qoldanýǵa moratorıı engizý týraly» Jarlyǵy negiz boldy. Zań jobasy boıynsha baıan­­damany Premer-Mınıstr­diń oryn­basary – Aýyl sharýa­shy­lyǵy mı­nıstri Asqar Myrzah­metov ja­sap, qujat jobasy boıyn­sha Prezıdent Jarlyǵyn júze­ge asyrý maq­satynda 2016 jyl­dyń 31 jeltoq­sanyna deıin «Qa­zaqstan Respýb­lıkasynyń Jer kodeksine ózgerister men to­lyq­tyrýlar engizý týraly» 2015 jyl­ǵy 2 qarashadaǵy Zańnyń keı­bir normalarynyń jáne Jer ko­deksiniń jekelegen nor­malary­nyń qoldanysy toqta­tyla tura­tynyn kóldeneń tartty. Atap aıtqanda, olar shetel­dikterge, azamattyǵy joq adam­dar­ǵa, sheteldik zańdy tulǵa­larǵa, sondaı-aq, jarǵylyq kapıtalyn­daǵy sheteldikterdiń, azamattyǵy joq adamdardyń, sheteldik zańdy tulǵalardyń úlesi 50 paıyzdan asatyn zańdy tulǵalarǵa aýyl sha­rýa­shylyǵy maqsatyndaǵy jerdi ýaqytsha jer paıdalaný quqy­ǵyn berýge, sondaı-aq, Qazaq­stan Respýblıkasynyń azamat­tary men zańdy tulǵalaryna mem­le­kettik menshiktegi aýyl sharýa­shylyǵy maqsatyndaǵy jerge jeke­menshik quqyǵyn berýge baılanysty normalar. Zań jobasy barlyq quzyrly organ ókilderimen kelisilgen, oryndalýyna qosymsha shyǵyn talap etpeıdi, dedi baıandamashy. Qosymsha baıandamany Májilis depýtaty, Agrarlyq máseleler jónindegi turaqty komıtet múshesi Sergeı Zvols­kıı jasap, zań jobasy boıynsha jumys tobynyń 3 otyrysy jáne Bas komıtettiń keńeı­tilgen otyrysy ótkizilgenin, Májilistiń barlyq komıtetteri oń qorytyndylaryn bergenin alǵa tartty. Osydan ári kóp talqylanbaı zań jobasy birinshi oqylymda maquldandy. Osy kezde Agrarlyq máseleler jónindegi komıtettiń tóraǵasy Saparhan Omarov sóz surap, atalǵan qujatty ústimizdegi jyldyń 1 shildesinde qabyldaý qajettigin aıtty jáne zań jobasynyń jan-jaqty talqylanǵanyn eskere otyryp, ony ekinshi oqylymda qaraýdy usyndy. Usynys depýtattar tarapynan qoldaý taýyp, tıisti talqylaýdan keıin basqa má­seleler qaralyp bolǵan soń ekinshi oqylymda da maqul­danyp, Senatqa joldandy. Kún tártibindegi basqa máse­lelerdiń arasynda 1998 jylǵy 6 shildedegi Reseı Fe­derasııasymen Jer qoınaýyn paı­dalanýǵa arnalǵan egemen­dik quqyqtardy júzege asyrý maqsatynda Kaspıı teńizi sol­tústik bóliginiń túbin mejeleý týraly kelisimge Hatta­maǵa ózgeris engizý týraly Hattamany ratıfıkasııa­laý týraly zań jobasy ma­qul­dandy. Bul Hattama Qazaqstan Respýblıkasy men Reseı Fe­derasııasynyń atynan ýáki­letti uıymdar arqyly Kaspıı teńiziniń soltústik bóli­giniń túbindegi kendi Qazaq­stan Respýblıkasynda «Qurmanǵazy» («Qulaly»), Reseı Federasııasynda «Sen­tral­naıa» jáne «Hvalynskoe» ken orny qurylymdarynda bir­le­sip ıgerýge quqyqtyq negiz­derdi belgileıdi. Sondaı-aq, jalpy otyrys­ta ósimdikter men janýarlar dúnıesi máseleleri boıynsha, áýe keńistigin paıdalaný men avıasııa qyzmetine qatysty túzetýlerge arnalǵan zań jobalary jumysqa qabyldandy. Kún tártibindegi taǵy bir másele – 1994 jylǵy 15 sáýir­degi Uly Otan soǵysynyń qa­tysýshylary men múgedek­terine, basqa memleketter­diń aýmaǵyndaǵy urys qımyl­daryna qatysýshylarǵa, qaza tapqan áskerı qyzmetshilerdiń otbasylaryna arnalǵan jeńildikter men kepildikterdi ózara taný týraly kelisimge ózgerister men tolyqtyrýlar engizý týraly Hattamany ratıfıkasııalaýǵa baılanysty qorytyndy ázirleý jóninde bolǵan edi. Bul másele boıynsha da tıisti sheshim qabyldandy. Sońynan depýtattar ortalyq atqarý organdaryna arnalǵan ózderiniń depýtattyq saýaldaryn jarııalady. Jaqsybaı SAMRAT, «Egemen Qazaqstan»