Basqa-basqa, jas balanyń shyrqyrap aýyrǵany qıyn. Bul ata-ana úshin de, emdeýshi dáriger úshin de óte aýyr jaǵdaı. №1 Taraz qalalyq balalar aýrýhanasy jyl saıyn 7000-nan asa naýqasty qabyldaıdy. Olardyń 65-70 paıyzyna shuǵyl járdem kerek. Naýqastardyń 95 paıyzy emdelip, aıyǵyp shyǵady.
О́tken jyly ońaltý bólimshesi arqyly 690 aýrý bala ótti. Bólimsheniń negizgi maqsaty – aýrýdyń sozylmalyǵy men asqynýlarynyń aldyn alý, balanyń densaýlyǵyn qalpyna keltirý. Bul úshin aýrýhanada emdik dene shynyqtyrýdyń 3 jabdyqtalǵan kabıneti bar. Ol trenajerlarmen jáne basqa da quraldarmen, fızıo bólmelermen jabdyqtalǵan.
Bólimshe dárigerleri 2015 jyly dısport-terapııa júrgizý úshin arnaıy oqý kýrstarynan ótti. Dısport terapııasy 56 júıke júıesimen aýyratyn balalardy qabyldaıdy. Dári-dármektik emmen qatar Montessorı, eńbek terapııasy, psıholog, logoped, emdik dene shynyqtyrý kabınetterinde 6-dan 18 jasqa deıingi emdelýshilerge arnalǵan áleýmettik-pedagogıkalyq jáne psıhologııalyq ońaltý júrgiziledi. Bul baǵytta ashylǵanyna bir jyl bolǵan sensorlyq bólmeni erekshe maqtanyshpen aıtýǵa bolady. Munda balalar psıhoemosıonaldyq jeńildikter alady. Bosańsý em-sharalary kezinde mı jaraqatynan, depressııadan, qozǵalys buzylýynan soń aǵzany qalpyna keltirý úshin tonýstyq elementter qoldanylady. Odan basqa tıimdi emdeý basseıninde gıdrokınezo emdeýi júrgiziledi. Sondaı-aq, balalardy emdeýge arnalǵan «Atlant» ońaltý kostıýmderi alyndy, bul bala aǵzasynyń bulshyq etteriniń jumysy men nyǵaıýy, olardyń kúshtik sapasyn arttyrý úshin qoldanylady.
Jańa tıptik aýrýhananyń jaqsy jabdyqtalýynyń arqasynda sońǵy 3 jylda úlken ózgerister boldy. Durys kútim kórsetilýimen, qajetti temperatýralyq tártibimen jáne tazalyq saqtalýymen biz burynǵyǵa qaraǵanda shala týǵan balalarǵa neǵurlym kóbirek kómek kórsetýdemiz. Bul saladaǵy kóptegen tájirıbeni Baltyq jaǵalaýynan kelgen áriptesterimizden aldyq. О́skeleń urpaq densaýlyǵy – bizdiń tabysty bolashaǵymyzdyń negizi. Biz ony saqtaýǵa jáne ýaqtyly, sapaly medısınalyq kómek kórsetýge barlyq kúshimizdi salamyz.
Raıymbek NURJANOV,
№1 Taraz qalalyq balalar aýrýhanasynyń bas dárigeri,
medısına ǵylymdarynyń kandıdaty
Taraz