birinshi bolyp EKSPO-2017 kórmesine bılet satyp aldy
Taıaýda EKSPO-2017 kórmesiniń bıletteri satylymǵa shyǵaryldy. Osy oraıda, elimizde ótetin halyqaralyq kórmege qyzyǵýshylyq tanytyp, bılet satyp alýǵa nıetti sheteldik azamattar belgili bola bastady. Sonyń biri – Ońtústik Koreıa turǵyny, bıznes salasynyń hanymy Djong Hı Vý.
– Astanada ótetin halyqaralyq kórme jaıynda barlyq maǵlumatty áleýmettik jeli arqyly bilip otyramyn. Sondyqtan da bıletter satylymǵa shyqty degendi estip, satyp alýǵa asyqtym, – deıdi Djong Hı Vý. Sonymen qatar, shetel azamatshasy EKSPO-nyń ashylýyn asyǵa kútetinin de jetkizdi. Sebebi, ol Qazaqstanda bıznes-jobalardy birge júzege asyratyn seriktester tapsam degen nıette.
Búginde Djong Hı Vý basqaryp otyrǵan kompanııa qala ınfraqurylymyn damytýmen, IT-tehnologııa jáne halyqaralyq saýda-sattyq operasııalaryn oryndaýmen aınalysady. Al mekemeniń jyldyq qarjy aınalymy mıllıard dollardy quraıdy.
– Qazaqstan – Ońtústik Koreıanyń strategııalyq seriktesi. Sondyqtan, koreıalyq kompanııalardyń qazaqstandyq mekemelermen seriktes bolýǵa yntaly ekenin bilemin. Bizdiń kompanııa da Qazaqstannan múddeles mekeme tabýdy kózdeıdi, – deıdi Leaders D&C kompanııasynyń prezıdenti Djong Hı Vý.
Aıta keteıik, atalǵan ońtústikkoreıalyq kompanııa elimizdegi iri kásiporyndarmen birge balamaly energııa turǵysynda birqatar jobany iske asyrýǵa yqylas bildirip otyr. Sonymen qatar, ony temirjol jáne «Jibek joly» jobalary da qyzyqtyrady.
Talǵat RAIYMBEK,
«Egemen Qazaqstan»