Mine, osymen Jambyl oblysynyń órender qatarynan besinshi jyl bilim saıystarynda júzden – júırik, myńnan tulpar shyǵyp, elimiz boıynsha úzdik atanyp otyr. Osy oqý jylynda halyqaralyq, respýblıkalyq pán olımpıadalary men ǵylymı jarystarǵa qatysqan 272 jambyldyq oqýshynyń 137-si jeńimpaz atandy.
Onyń 63-i halyqaralyq olımpıadalar men ǵylymı jarystarda, 37-si respýblıkalyq pán olımpıadalarynda, 17-si respýblıkalyq ǵylymı jobalar jarystarynda, 3-i Prezıdenttik olımpıadada, 2-i respýblıkalyq Q.Bitibaeva atyndaǵy qazaq tili olımpıadasynda, 15-i respýblıkalyq 2-7 synyp oqýshylary arasynda ótken «Zerde» ǵylymı jobalar jarysynda júldege qol jetkizdi.
Respýblıkalyq pánder olımpıadasynyń sońǵy bes jylǵy jáne ǵylymı jobalar jarysynyń sońǵy tórt jylǵy qorytyndysy boıynsha Jambyl oblysynyń oqýshylary komandalyq birinshi oryndy ıelenip, «Eń úzdik komanda» atandy.
– Men oblystyq daryndy balalarǵa arnalǵan úsh tilde oqytatyn mamandandyrylǵan mekteptiń túlegimin, – deıdi úzdik oqýshy Alına Tarasova. – Halyqaralyq «Matematıka jáne jobalaý» ǵylymı jobalar jarysynyń qola medal ıegeri, respýblıkalyq pán olımpıadasynyń jeńimpazymyn. Kishkentaıymnan qazaq tilin úırendim. Búgingi tańda úsh tilde erkin sóıleımin. Biz bilimdi jastar oblysymyzdy, elimizdi kórkeıtýge úles qosqymyz keledi.
Jambyl oblysynyń ákimi Kárim Kókirekbaev daryndy jastarmen keń otyryp áńgimelesip, oqýshylar men olardy oqytqan ustazdarǵa zor qurmet kórsetti. Keshe ǵana ótken Ulttyq biryńǵaı testileýdiń qorytyndysy boıynsha Jambyl oblysynyń jalpy orta bally 78,5 paıyzdy quraǵan bolatyn. UBT qorytyndysy boıynsha oblysta úsh mektep bitirýshi 124 ball jınady.
Oralhan DÁÝIT,
«Egemen Qazaqstan»
Jambyl oblysy