Oqyrmanyn oıatqan oıly jyr

Aqyn Aqylbek Shaıahmet 14 jasynan bastap óleń jazyp, sóz kıesiniń qudiretin bile bastaǵan eken. Balań aqyn kezinde respýblıkadaǵy jas aqyndar jyrlary toptas­tyrylǵan «Kók­tem tynysy» jınaǵyna: «Aram sózder beınebir kómirtegi, Adal sózder – ottegi, semirtedi. Jaqsy-jaman qasıet aralasqan, Sý sekildi eken ǵoı ómir, tegi. О́tkir tildiń ketpeıdi beker emi, Jyly lebiz kóńildi kóteredi. Keıbireýler qatty aıtqan jalǵyz sózge, Ǵumyr boıy ókpelep óter edi. Bireýlerge sózder bar jaraspaıtyn, Ot basynan sózder bar ári aspaıtyn. El ishinde dýaly aýyzdar bar, Syrqatyńdy boıyńnan alastaıtyn.Úmit kútip otyr-aý dalam menen, Aqyn bolyp, alaýlap, janam dep em. Týǵan jerim, eń asyl, qasıetti. Saqtap júrmin bir sózdi saǵan degen», dep jyrlaǵan óleńi engen edi. Týǵan jer – Aqylbek Shaıahmet shyǵarmashylyǵynyń ózegi bolsa, aqyn ony sózben órnek­tedi. Sondyqtan, aqyn oqyr­manymen kezekti júzdesýin de «Týǵan jerim, eń asyl, qasıetti, saqtap júrmin bir sózdi saǵan degen» dep atady. – Aqylbek azamattyq usta­nymy men aqyndyq qýaty úılesim tapqan aqyn. Onyń taqyryp arnasy keń. Taǵy bir ereksheligi, ol óziniń poe­zııasynda kisilikti kóbirek jyrlaıdy. Qansha naryq zamany dep aıtqanymyzben, qoǵamnyń negizi adamgershilikte bolýy tıis. Al áde­bıetti oqymaı, ónerdi sezinbeı urpaq boıynda adamgershilik ustanymdar qalyptaspaıdy. Aqyn osyǵan qyzmet etedi, – dedi  kórnekti jazýshy Tólen Ábdik. Aqyn keshinde qalamdastary, dos-jarandar, onyń poezııasyn súıetinder jyly lebizderin aıt­ty. Oblystaǵy «Birlik» ázer­baıjan etno birlestiginiń tór­aǵasy Vıvadı Iýsýpov aqyn­ǵa Mahmýd Qashqarı atyn­daǵy halyqaralyq qordyń syılyǵyn tapsyrdy. Aqyn sózine jazylǵan «Qostanaı», «Ádemi» ánderin ánshiler Arystan Qurmanov, aqynnyń nemeresi Bekzat Aqylbek oryndady. Al respýblıkaǵa belgili ánshi Álmyrza Noǵaıbaev­tyń Aqylbek Shaıahmet sózine jazyl­ǵan «Minájat» áni keshke jınalǵandardyń erekshe qurme­tine ıe boldy. Keshten alǵan taǵylym tek aqyn men aqynnyń arasynda emes, aqyn men oqyrman arasynda da kúmis tindeı baılanys bolýy kerektigin moıyndatqandaı boldy. Názıra JÁRIMBETOVA, «Egemen Qazaqstan» QOSTANAI