Ońtústik Qazaqstan oblysy elimizde alǵashqylardyń biri bolyp Birikken Arab Ámirlikterine et eksporttaýdyń alǵashqy satysyn bastady.
Jaqynda Shymkent halyqaralyq áýejaıynan 1 myń bas ýaq mal Ámirliktiń Fýdjeıra qalasyna jóneltildi.
Ońtústik – agrarly oblys. Basqa aýyl sharýashylyǵy taýarlarynyń baǵasy kóterilgenimen etke degen suranys anaý aıtqandaı emes edi. Aýyl syrtyndaǵy jaramdy jerler kásipkerlerdiń qolynda ketken, jaıylym tar. Onyń ústine mal basy óskendikten etke degen suranys aıtarlyqtaı emes.
Sondyqtan, keıbir sharýalar óziniń jemshóbin aqtamaıdy dep mal sharýashylyǵynan jerip júrgen jaǵdaıy bar edi.
Sharýa qojalyqtaryn yntalandyrý, mal basyn ósirýdi odan ári jalǵastyrý úshin et eksporttaıtyn memleketter izdeý aýyl sharýashylyǵy basqarmasynyń kún tártibinde turǵan.
Birikken Arab Ámirlikteri ókilderimen bes aıǵa jýyq ýaqytqa sozylǵan kelisimder jemisin berdi.
Osynyń arqasynda tamyz aıyna deıin BAÁ-ge Ońtústikten 80 myń bas ýaq mal jetkiziledi.
OQO Aýyl sharýashylyǵy basqarmasynyń basshysy Serik Turbekov oblys ákimdiginiń uıytqy bolýymen Saýd Arabııasy jáne Iran, Irak memleketterine de et eksporttaý úshin kelissózder júrgizilip jatqandyǵyn aıtady.
Ekijaqty kelissózder nátıje bergen jaǵdaıda bul memleketterge 1,5 myń tonna etti eksporttaýǵa múmkindik týady.
BAÁ-ge alǵashqy myń qoıdy eksporttaǵan «Qaıyp ata» sharýa qojalyǵy. «Qaıyp ata» JShS-niń dırektory Syrym Ertaev «usaq maldy sharýalardan satyp alyp, bordaqylap otyrmyz. Qurban aıtqa deıin suranys óte joǵary, arab aǵaıyndar kúndigine myń basqa deıin surap otyr. Jıyrma myń bas qoıǵa kelisimshartymyz bar. Olarǵa qoıymyzdyń eti unady. Sondyqtan, aldyn ala qarjysyn aýdaryp jatyr. Biz ári qaraı eksportqa shyǵarýǵa daıyndyq jumystaryn júrgizip jatyrmyz» deıdi.
О́sirip jatqan malynyń úlken tutynýshysy tabylǵany sharýalardy qýantyp otyr.
Aýyl sharýashylyǵy basqarmasy jumysty júıeli jolǵa qoıý úshin ýaq mal men múıizdi iri qara maldy ósirý ári eksporttaýǵa daıyndaý maqsatynda arnaıy korporasııa qurmaq.
Irgede otyrǵan Reseı ıt arqasy qııan Kanada men Brazılııadan et tasyp, qońsysy Qazaqstannyń malyna moınyn burmaýshy edi. BAÁ bastaǵan izgi is olarǵa da oı salar. Ondaı jaǵdaıda sharýalarymyzdyń asyǵy alshysynan túsedi.
Baqtııar TAIJAN,
«Egemen Qazaqstan»
Ońtústik Qazaqstan oblysy