Aqmola oblysynyń ákimi Sergeı Kýlagın Qytaı Halyq Respýblıkasy Shensı azyq-túlik jáne agroónerkásiptik tobynyń bas dırektory Han Veı bastap kelgen delegasııany qabyldady.
О́ńir basshysy bul kezdesý barlyq baǵyt boıynsha, onyń ishinde aýyl sharýashylyǵy salasyndaǵy ekijaqty áriptestikti jandandyrýǵa septigin tıgizetinin atap kórsetti.
– Bizdiń oblys elimizdegi agrarlyq-ónerkásiptik óńirlerdiń biri bolyp tabylady. Munda sapaly bıdaıdyń jalpy respýblıkalyq kóleminiń shıregi óndiriledi. Ony óńdeý óndirisi damyǵan. Bıylǵy jyly oblys boıynsha kóktemgi egis alqaby 4,7 mıllıon gektardy quraıdy. Onyń ishinde dándi jáne burshaqty daqyldar 4,3 mıllıon gektar alqapqa ornalastyrylady. О́tken jyly dıqandarymyz 4,6 mıllıon tonna astyq jınady. Eksportqa 2 mıllıon tonna ónim shyǵardyq. Egis alqaby qurylymyn ártaraptandyrý arqyly 207 myń gektarǵa maıly daqyldar, kartop pen kókónis sáıkesinshe 18,7 myń jáne 4,4 myń gektardy qurady.
Qytaımen syrtqy saýda aınalymy 64 mıllıon AQSh dollary kóleminde boldy. Degenmen, biz qytaılyq rynokqa astyqty az tasymaldaýdamyz. Aspanasty elinen bizge hımııalyq ónimder, onyń ishinde gerbısıdter pen pestısıdter jetkizilýde. Qazir bizde mal sharýashylyǵy salasyn jedel damytý máselesine erekshe nazar aýdarylyp otyr. Biz sizderdiń áriptestik qadamdaryńyzdy quptaımyz. Áıtkenmen, ınvestorlar óz qarjysymen kelýi tıis, – dedi S.Kýlagın.
Budan keıin Shensı azyq-túlik jáne agroónerkásiptik tobynyń bas dırektory Han Veı Shensı azyq-túlik jáne aýyl sharýashylyǵy korporasııasynyń damýy jónindegi derekterdi kógildir ekrannan kórsetti. Sondaı-aq, delegasııa basshysy ózderiniń Aqmola óńirinde dándi jáne maıly daqyldar óńdeıtin kásiporyn salǵylary keletinin bildirdi.
Qytaılyq delegasııa Sandyqtaý aýdanynyń aýyl sharýashylyǵy taýarlaryn óndirýshilermen jáne kásipkerlermen kezdesti. Budan soń Jaqsy aýdanynda bolyp, «Ýrojaı» seriktestigindegi elevator kesheniniń jumysymen tanysty.
Baqbergen AMALBEK,
«Egemen Qazaqstan»
Aqmola oblysy