Ilıa Ilın aqyryna deıin kúresedi

Taıaýda Ilıa Ilınniń Lon­don-2012 Olımpıadasy ke­zinde ruqsat etilmegen esirtki paı­dalanǵany jóninde dopıng-synamada anyqtaldy. Sonymen qatar, qazaqstandyq aýyr atletter Svetlana Podobedova, Maıa Maneza jáne Zúlfııa Chınshanlo da dopıng daýynyń qurbanyna aı­naldy. Olar atalǵan másele to­­lyq sheshilmeıinshe, aldaǵy óte­tin jarystardan alastatyldy. Dese de, sańlaqtarymyz HOK ta­ratqan málimetke moıymaı, Olımpıadaǵa qatysý úshin daıyndyqty jal­ǵastyra beretinin aıtyp otyr. Osy rette Syr tolaǵaıy, álem­di moıyndatqan Olımpııa oıyn­darynyń eki márte chempıony Ilıa Ilın dopıng daýyna baılanysty óz málimdemesin jasady. «Bul aqparat tóbemnen jaı túskendeı eseńgiretip tastady. Halyqaralyq aýyr atletıka federasııasynyń erejesine saı, men týraly barlyq aqparat ha­lyqaralyq ADAMS júıesinde ornalasqan. Onda meniń ár­bir kúnim saǵat-saǵatpen jazylyp, jat­tyǵýda, ne basqa jerde júrgenim tolyq kórsetiledi. Meni dopıngke qarsy agenttiktiń baqylaýshylary ońaı taba alady. Bıyldyń ózinde eki ret – Polshada jáne Almatyda dopıngke qarsy synama tapsyrdym. О́zderińiz biletindeı, eshbir halyqaralyq jarys dopıngtik tekserissiz ótpeıdi. Men de ózge sportshylar sekildi, 2004 jyldan beri dopıngke synaq tapsyramyn. Qazir Rıo Olımpıadasyna daıyndyǵymdy jalǵastyryp jatyrmyn jáne beriletin oıym joq. Maǵan qatysty aqylǵa qo­nymsyz sheshimniń burystyǵyn dáleldeımiz dep senemin. Qandaı shara qoldanylsa da, sizderdiń 20 jyl boıy ómirimdi sport zalynda ótkizip, qan men terim shyqqansha kúnine 3 ret jattyǵý jasaıtynymdy bilgenderińizdi qalaımyn. Men barlyq ýaqytta ózime ar­tylǵan júkti sezinip, sizderdiń qoldaýlaryńyzdy kórip keldim. Qazir de sol qoldaýlaryńyz maǵan qajet bolyp tur. Sizderdiń Ilıa Ilınderińiz», – dep jazǵan Ilıa Ilın óziniń Instagram paraq­shasynda. Osy oraıda, Qazaqstannyń aýyr atletıka federasııa­sy arnaıy málimdeme jasap, sport­shylarymyzdyń óz zańdy qu­qyqtaryn qorǵaýdyń barlyq deńgeıinde jáne prosestiń ár­bir kezeńinde quqyqtyq kómek kór­setetinin jetkizdi. Aıta keteıik, jýyq arada Ha­lyq­aralyq Olımpıada komıteti chempıondardyń Olımpıadadaǵy marapaty men olardy Rıo-2016 Olımpııa oıyndaryna qatystyrý jóninde máseleni tártiptik keńeste qaraıtyn bolady. Mádenıet já­ne sport vıse-mınıstri Sáken Musaıbekovtiń aıtýynsha, Halyq­aralyq Olımpıada komıteti qa­zaqstandyq atletterdiń taǵdyryn 27 maýsymda sheshetin bolady. Talǵat RAIYMBEK, «Egemen Qazaqstan»