Apta sońynda Prezıdent janyndaǵy Ortalyq kommýnıkasııalar qyzmetinde Bilim jáne ǵylym vıse-mınıstri E.Sýhanberdıevanyń, Bilim jáne ǵylym mınıstrligi Mektepke deıingi jáne orta bilim departamentiniń dırektory J.Jontaevanyń jáne Y.Altynsarın atyndaǵy Ulttyq bilim akademııasynyń prezıdenti J.Jylbaevtyń qatysýymen «12 jyldyq bilim berýdi kezeń-kezeńmen engizý, fýnksııalyq saýattylyqty damytý úshin mekteptegi oqytý standarttaryn jańartý» taqyrybynda brıfıng ótti.
«Mınıstrlik «100 naqty qadam»: barshaǵa arnalǵan qazirgi zamanǵy memleket» Ult Josparynyń 76, 79, 89-qadamdaryn jáne Bilim men ǵylymdy damytýdyń 2016-2019 jyldarǵa arnalǵan memlekettik baǵdarlamasyn iske asyrý maqsatynda bilim mazmunyna kezeń-kezeńimen kóshý jumystaryn bastady. Jańa oqý jylynan bastap respýblıkanyń barlyq mektepterine Nazarbaev zııatkerlik mektepteriniń tájirıbesi boıynsha jańartylǵan bilim mazmuny 1-synyptan bastap engiziledi. Oqýshylardyń fýnksııalyq saýattylyǵyn damytýǵa baǵyttalǵan bul jańartylǵan mazmun 30 qanatqaqty mektepte synamalaýdan tabysty ótti. Jańartylǵan bilim mazmuny kelesi kestege sáıkes kezeń-kezeńimen engiziledi: bıyl –1-synyp, 2017 jyly – 2,5,7- synyptar, 2018 jyly – 3,6,8,10-synyptar, 2019 jyly – 4,9,11,12-synyptar, al 2020 jylǵa qaraı 12 jyldyq qurylymmen jańartylǵan bilim mazmunyna kóshý barlyq synyptarda aıaqtalady», – dedi vıse-mınıstr.
Jıyn sońynda E.Sýhanberdıeva úsh tilde bilim berýdi damytýdyń 2015-2020 jyldarǵa arnalǵan Jol kartasy sheńberinde úsh tilde bilim berýdi engizýge daıyndyq bastalǵanyn atap ótti.
Raýan QAIDAR,
«Egemen Qazaqstan»