«Búgingi tańda «Máńgilik El» Patrıottyq aktisiniń oryndalýyna monıtorıng júrgizýdiń basty ınstıtýty retinde Assambleıanyń aldynda jańa keńistikter ashylady» – Konstıtýsııalyq Keńestiń Qazaqstan Respýblıkasyndaǵy konstıtýsııalyq zańdylyqtyń jaı-kúıi týraly joldaýyndaǵy osy tujyrym biregeı qoǵamdyq-memlekettik ınstıtýt – Qazaqstan halqy Assambleıasynyń naqty mindetterin aıqyndaıdy.
Assambleıanyń Májilistegi depýtattyq tobynyń keshe ótken kezekti otyrysynda qaralǵan negizgi másele Bilim jáne ǵylym mınıstrliginiń mektepte bilim berýdiń oqý baǵdarlamalaryna jáne ǵylymı-zertteýlerge «Máńgilik El» jalpyulttyq ıdeıasynyń qundylyqtaryn engizý jónindegi jumysy boldy. Bilim jáne ǵylym mınıstri Erlan Saǵadıev osy mańyzdy másele jónindegi óz oılaryn ortaǵa saldy, qazirgi tańda bul taqyryp boıynsha tereń ǵylymı izdenister jasalyp jatqanyn, jyl sońyna deıin naqty tujyrymdama aıqyndalyp, odan soń jalpyulttyq ıdeıanyń mekteptegi baǵdarlamalarda kórinis tabýy týraly usynystar Parlamenttegi depýttattyq toptyń qaraýyna engiziletinin aıtty, depýtattardyń kóptegen suraqtaryna jaýap berdi. Májilis Tóraǵasynyń orynbasary V.Bojko mınıstrliktiń áýeli irgeli máseleniń mán-jaıyn jan-jaqty talqylaý, naqty sheshimderdi sodan keıin ǵana qabyldaý jónindegi ustanymyna qoldaý bildirdi.
Májilistegi Qazaqstan halqy Assambleıasy depýtattyq tobynyń jetekshisi Saýytbek Abdrahmanov «Máńgilik El» Patrıottyq aktisin nasıhattaý boıynsha alda turǵan mindetter týraly habarlama jasady. Halyq qalaýlylary Qýanysh Sultanov, Sergeı Dıachenko, Abaı Tasbolatov, Anar Jaıylǵanova jaryssóz kezinde depýtattyq toptyń Májilistegi partııaaralyq únqatysýdyń biregeı alańqaıyna aınalyp kele jatqanyn razylyqpen atap ótip, eldegi qoǵamdyq kelisim men jalpyulttyq birlik salasyndaǵy memlekettik saıasatty ázirleý, júzege asyrý turǵysynan parlamentarııler atqarar jumys aýqymdy ekenin aıtty.
«Egemen-aqparat»