«Astana qalasynyń múgedek balalar qoǵamy» qoǵamdyq birlestiginde balalarǵa arnalǵan «Shattyq shuǵylasy» atty qaıyrymdylyq aksııasy ótti. Bul sharany «Astana» ulttyq sýret galereıasy men «Nur Otan» partııasy «Birlik» fılıalynyń «Mádenıet» birinshi partııalyq uıymy uıymdastyrdy.
Sharaǵa daýn sındromy jáne sal aýrýy sııaqty aýyr naýqasqa shaldyqqan balalar qatysty. Emdelýshilerge arnaıy art-terapııa baǵdarlamasy usynyldy. Búldirshinder uıymdastyrýshylarmen birge qaǵaz betine kún beınesin japsyrdy, qarapaıym aq-qara sýretke ártúrli boıaýlar arqyly kóńildi gúlder men kóbelekter saldy, alma jemisinen tasbaqa jasap, qyzyqty tanymdyq oıyndar oınady. Qaıyrymdylyq aksııasy barysynda balalarǵa ertegi keıipkerleri «Qyzyl telpek» pen mýltfılm keıipkeri «Lýntık» esten ketpes áser syılady. Erekshe kútimdi qajet etetin balalarmen jumys barysynda basty másele – emdelýden soń olardyń ýaqytyn tıimdi ári qyzyqty ótkizý. Osy oraıda, beıneleý ónerin balalardyń saýyǵýy úshin ońtaıly paıdalaný kerek. Art-terapııa ádisteriniń bul baǵyttaǵy jetistikteri qazirgi tańda dáleldengen.
Shara sońynda balalar uıymdastyrýshylardan estelikke syılyqtar alyp, shat-shadyman kóńil kúıde boldy. Bı bılep, balalar ánderi de oryndaldy.
Jalpy, ortalyqta 75 naýqas búldirshin bar. Balalardyń em alyp, tynyǵýyna barlyq jaǵdaı jasalǵan. «Astana qalasynyń múgedek balalar qoǵamy» qoǵamdyq birlestigine qarasty 2 ortalyq jumys isteıdi. Birlestik qamqorlyǵyndaǵy balalarǵa óz balasyndaı meıirimdilik kórsetetin 15 qyzmetker bar. Emdelýshiler ortalyqta tańǵy saǵat 8-den keshki 6-ǵa deıin bolady. Tańǵy, túski jáne keshki astary erekshe yqylaspen daıyndalady. Balalar dıagnozyna jáne jas erekshelikterine qaraı 3 topqa bólinip oqytylady.
Urpaq saýlyǵy – ult saýlyǵy. Osyndaı ıgi bastamalar jıirek ótkizilip, balǵyn búldirshinderge qýanysh syılap jatsa, nur ústine nur bolar edi.
Ardaq SAMATQYZY,
Q.A.Iаsaýı atyndaǵy halyqaralyq qazaq-túrik
ýnıversıtetiniń stýdenti