Úsh qarǵyp sekirýden kópten beri Qazaqstannyń úkilegen úmiti bolyp júrgen Olga Rypakova London jerinde altynnan alqa taǵyp oralǵanda, onyń alǵa qoıǵan bir úlken maqsatynyń oryndalǵanyna bárimizdiń kózimiz jetti. Biraq jeńil atlet sonymen bar bıikti baǵyndyryp boldym dep qarap otyrmaı, jankeshti jattyǵýlaryn odan ári jalǵastyra berdi. Albıon jerindegi alamanǵa deıin 2010 jyly Katardyń Doha qalasynda ótken jabyq manejdegi álem chempıonatynda bas júlde alyp, 2011 jyly Ońtústik Koreıanyń Tegý kentinde jalaý jelbiretken jahandyq jarysta kúmis júldege qol sozǵan, sondaı-aq, 2012 jyly túriktiń Ystanbul shaharynda dúbirletken baspana ishindegi ǵalamdyq saıysta ekinshi tuǵyrdan kóringen tarlanymyz sodan keıin de osyndaı aıtýly synaqtardan syrt qalǵan joq.
Olga Rypakova 2014 jyly Koreıanyń Inchhon qalasynda Azııa oıyndarynda top jaryp, 2015 jyly Beıjińde kerýen kergen álem chempıonatynda qola medaldy qorjynǵa saldy. Al bıyl «Gaýhar lıga» Gran-Prıi jarysynda aldymen kúmis, sosyn altyn medaldardy jeńip aldy. Osynyń bári bizdiń sportshynyń naǵyz sporttyq babynda kele jatqanyn kórsetedi. Demek, Rıo-de-Janeırodaǵy Oıyndardan onyń júldemen qaıtatynyna úmit artýymyzǵa tolyq bolady.
– Men bastapqy kezde jeti saıyspen aınalystym. Ýaqyt óte kele bul sport túrimen aınalysý, ásirese, naıza laqtyrý, ıadro laqtyrý maǵan kóptegen qıynshylyqtar týǵyzdy. Keıin men ózimniń tańdaýymdy uzyndyqqa sekirýge aýystyrdym, bir jyldan keıin úsh qarǵyp sekirýmen aınalysa bastadym. Múmkin tabıǵatym oǵan jaqyn shyǵar, men qarǵyp sekirý tehnıkasyn jyldam meńgerdim. Bul jerde uzyndyqqa sekirýmen salystyrǵanda, jyldamdyqty qatty arttyrý mańyzdy emes, men durys tehnıkanyń arqasynda, bar jyldamdyǵymdy saqtaı alamyn, – deıdi sportshynyń ózi.
Biz onyń osy artyqshylyqtaryn básireli básekelerde tıimdi paıdalana alatynyna sengimiz keledi.
Damır QOJAMQUL