Keshe Joǵarǵy Sot Tóraǵasy Qaırat Mámı BAQ basshylary men qyzmetkerlerin, sottardyń baspasóz qyzmetiniń ókilderin kele jatqan kásibı mereke – Baılanys jáne aqparat qyzmetkerleri kúnimen quttyqtady.
Kezdesýde Q.Mámı: «Zamanaýı demokratııalyq jáne quqyqtyq memleket úshin qoǵamnyń barlyq ókilderin saıası ómirge belsendi aralastyrý mańyzdy. Al bul mass-medıanyń qatysýynsyz múmkin emes. Osy rette BAQ halyq pen bılik arasyndaǵy altyn kópir ispetti. Bir jaǵynan olar adamdardy tolǵandyratyn máselelerdi aıtsa, ekinshi jaǵynan olardy sheshýdiń joldaryn habarlaıdy», dedi.
Sottardyń BAQ-pen ózara is-qımylynyń mańyzdylyǵyn aıta kele, ol sottar qoldanystaǵy zańnama negizinde BAQ-pen jumys isteýge daıyn ekendigin atap ótti. Bul úshin barlyq qajetti jaǵdaı jasalǵan. Sottardyń BAQ-pen ózara is-qımylynyń jańa tujyrymdamasy qabyldandy, óńirlerde úılestirýshi-sýdıalar men baspasóz qyzmetteri belsendi jumys isteýde. 2015 jyldyń qorytyndysy boıynsha BAQ-ta 53 myńnan astam materıal jaryq kórdi.
Kezdesý barysynda Joǵarǵy Sot Tóraǵasy «100 naqty qadam» Ult Josparynyń zań ústemdigin qamtamasyz etý bóligin iske asyrý barysy týraly aıtyp ótti. Atap aıtqanda, sot júıesine júktelgen 11 qadamnyń barlyǵy oryndaldy. Osy jumystyń nátıjesinde otandyq sot júıesi jańǵyrtyldy. Máselen, 2016 jylǵy 1 qańtarda sottar úsh satyly sot tóreligi júıesine kóshti, Joǵarǵy Sot janynan Sot tóreligi akademııasy, Halyqaralyq keńes pen mamandandyrylǵan sot alqasy quryldy. Prokýrorlardyń azamattyq ister boıynsha sotqa qatysýy zańnamalyq turǵyda qysqartyldy. Tergeý sýdıalarynyń quzyreti keńeıtildi.
Sýdıalardyń jańa ádep kodeksiniń jobasy ázirlendi. Joba Joǵarǵy Sot janyndaǵy Halyqaralyq keńestiń otyrysynda maquldandy. Bul qujat boıynsha Eýropalyq Keńestiń Venesııa komıssııasy sarapshylarynyń qorytyndysy alyndy. Kodeks aǵymdaǵy jyldyń kúzinde ótetin sýdıalardyń sezinde qabyldanady dep kútilýde.
Kezdesý sheńberinde joǵary sot organynyń BAQ-pen ózara is-qımylyn úılestiretin sýdıa Baǵlan Maqulbekov sóz sóıledi. BAQ ókilderin kásibı merekelerimen quttyqtaı kelip, ol: «Sot júıesiniń aqparattyq ashyqtyǵy men aıqyndyǵy – sýdıalardyń VI sezinde Memleket basshysy aıqyndaǵan jumystyń basym baǵyttary. Mundaǵy mańyzdy mindet – sotqa qujattar kelip túskennen bastap, sheshim qabyldanǵanǵa deıingi kezeńdegi sot jumysyn qoǵamǵa durys túsindirý», dedi. Buǵan qosa, ol jıynǵa qatysýshylardy sottardyń qyzmetin aqparattyq súıemeldeý boıynsha aǵymdaǵy jumystyń barysymen tanystyrdy.
Barlyq oblystyq jáne oǵan teńestirilgen sottarda óńirdegi sot korpýsynyń basty spıkerleri retinde BAQ-pen ózara is-qımylǵa jaýapty úılestirýshi-sýdıalar qyzmeti engizildi. Olar barlyq óńirlik jáne respýblıkalyq BAQ úshin barynsha ashyq ári ózara baılanysty qamtamasyz etýi tıis. Atalǵan sýdıalar BAQ-ta jarııalanǵan barlyq synı materıaldar, túıtkildi máseleler jóninde únemi bilip qana qoımaı, olar boıynsha den qoıý sharalaryn ázirleýi qajet.
Kezdesýde sot júıesiniń aqparattyq jumys bóligindegi keıbir jetistikteri ashyp aıtyldy. Atap aıtqanda, ınternette júıeli jumys alǵa qoıyldy. Joǵarǵy Sot pen jergilikti sottardyń resmı veb-saıttarynyń jumysy jańǵyrtyldy. 2014 jáne 2015 jyldardaǵy «Qazkontent» AQ-tyń reıtıngisiniń qorytyndysy boıynsha Joǵarǵy Sottyń resmı ınternet-resýrsy barlyq ortalyq memlekettik organdardyń veb-saıttary arasynda qatarynan eki márte birinshi oryndy ıelendi. Joǵarǵy Sottyń baspasóz qyzmeti sottar jumysynyń ózekti taqyryptary boıynsha beıneblog júrgizip keledi. Osy rette 15 beıneblog ázirlendi. Olardy kórýdiń jalpy sany shamamen 400 myńdy qurady.
Saltanatty sharada jınalǵan BAQ ókilderi atynan «Egemen Qazaqstan» respýblıkalyq gazeti» aksıonerlik qoǵamynyń Basqarma tóraǵasy Erkin Qydyr sóz sóıledi. Ol sózinde búginde Joǵarǵy Sot Elbasynyń tapsyrmalary negizinde quqyqtyq jáne sot reformalaryn tyńǵylyqty júrgizip kele jatqanyn, munyń bári zań ústemdiginiń artyp, ádildiktiń saltanat qurýyna jetelep otyrǵanyn atap ótti. «Osy arqyly halyqtyń sotqa senimi artady, osy senim arqyly memleket bedeli ósedi», dedi ol.
Is-sharada Qaırat Mámı BAQ ókilderine qurmet gramotalary men estelik syılyqtar tapsyrdy. Olardyń arasynda mundaı qurmetke «Egemen Qazaqstannyń» sholýshysy Aleksandr Tasbolatov ta ıe boldy.
Nurlybek DOSYBAI,
«Egemen Qazaqstan»