Aqtóbede bolashaqta Eýropalyq qaıta qurý jáne damý bankiniń (EQDB) yqpal etýimen suıytylǵan gaz paıdalanatyn avtobýstar parki paıda bolady. Oblys ákimi Berdibek Saparbaev Eýropalyq qaıta qurý jáne damý bankiniń Qazaqstandaǵy ókiliniń dırektory Djanet Hekmanmen bolǵan kezdesýinde osyndaı kelisimge qol jetkizdi. О́ńir basshysy Hekman hanymdy qarsy ala otyryp, Qazaqstan men EQDB yntymaqtastyǵy eldiń ekonomıkalyq jaǵdaıyn damytýdaǵy basym baǵyttardyń bri ekenin atap ótti. Qazaqstanda jumys istegen 20 jyldan astam ýaqyt aralyǵynda elimizdiń túrli sektorynda jalpy quny 6,5 mıllıard eýro bolatyn 210 joba júzege asyryldy.
– Oblys ákimdiginiń Eýrazııalyq qaıta qurý jáne damý bankimen Aqtóbe qalasynyń kommýnaldyq sharýashylyǵy júıesin damytý boıynsha ekijaqty yntymaqtasyp jumys atqarýda tájirıbesi bar. Aımaqta Eýrazııalyq banktiń qoldaýymen birneshe joba júzege asyrylýda. 2015 jyldyń qazan aıynda Aqtóbe qalasynyń jylý jáne sý júıelerin jańǵyrtý jáne qaıta salynýy boıynsha jobany júzege asyrýǵa shamamen 7 mıllıard teńge ınvestısııa tartyldy, – dedi aımaq basshysy.
Aqtóbede shaǵyn jáne orta bızneske qoldaý kórsetetin EQDB keńsesi jumys isteıdi, ol kásipkerlerge konsýltasııalyq qyzmetter kórsetedi. Bul keńseniń ereksheligi Aqtóbe oblysymen qatar Atyraý, Mańǵystaý jáne Batys Qazaqstan óńirleriniń bıznes ókilderine de qoldaý kórsetedi. Qazirgi tańda aımaqta 32 keńesshi jumys isteıdi, olardyń kómegimen 105 joba júzege asyrylýda.
– Biz suıytylǵan gazben qatynaıtyn avtopark qurý jóninde birlesken jańa jobany júzege asyrý úshin shamamen 4,3 mıllıard teńge ınvestısııa salǵymyz kelip otyr. Bul qarajat kommýnaldyq avtobýs parkiniń ınfraqurylymyn damytýǵa jumsalady, tabıǵı gaz paıdalanatyn 100 zamanaýı avtobýs satyp alady, gaz quıý stansasy salynady, avtobýs deposy ashylyp, elektrondy bılet júıesi engizilmek, – dedi aımaq basshysy.
Búgingi tańda bizdiń qalada 50 baǵytta syıymdylyǵy úlken, ortasha jáne shaǵyn 433 avtobýs qatynaıdy. Jolaýshylarǵa kórsetiletin qyzmet sapasy men kóliktegi apattylyq deńgeıine kólik quraldarynyń tehnıkalyq jaǵdaıy men tozyǵy áser etedi. Zamanaýı avtobýstar satyp alynǵanda kólikterdiń qatynaý jıiligi artady, aýa qabatyna bólinetin zııandy qaldyqtar kólemi azaıady, jolaýshylar tasymalynyń yńǵaılylyq deńgeıi artady.
Sonymen birge, EDQB sýarmaly alqap kólemin 9 myń gektarǵa arttyrý jónindegi jobany júzege asyrýdy qoldaýǵa daıyn. Bul maqsattarǵa shamamen 5,8 mıllıard teńge qajet. О́z kezeginde Eýropalyq bank tarapynan barlyq jobanyń qoldaý tabatynyn jetkizgen Djanet Hekman sýarmaly alqap kólemin keńeıtý týraly máseleniń taıaýda QR Úkimetinde talqylanǵanyn atap ótti. Kezdesý sońynda taraptar aldyn ala kelisimderge qol qoıdy.
Djanet Hekman hanym sondaı-aq, EQDB-nyń shaǵyn jáne orta kásipkerlikti qoldaý boıynsha jańa keńsesiniń ashylý saltanatyna qatysyp, ındýstrııalyq aımaq pen birqatar ónerkásiptik kásiporyndardy aralap kórdi.
Satybaldy SÁÝIRBAI,
«Egemen Qazaqstan»
AQTО́BE