Qytaıda óz úıinen qashyp, bir apta boıy ınternet klýbtan shyqpaǵan 19 jastaǵy jigit múgedek bolýdyń az-aq aldynda qaldy. Dárigerlerdiń aıtýynsha, ol osy ýaqyttyń bárinde oıyn oınap, qozǵalyssyz otyrǵandyqtan, eki aıaǵy irińdep ketken.
Birneshe kún as ishpeı, ornynan da turmaı, kompıýterge táýeldi bolǵan bozbalany jurt temirjol mańaıynda esin bilmeı, qulap jatqan jerinen taýyp alǵan. Ony kórgender tipti, úısiz-kúısiz júrgen qańǵybas adam dep oılap qalǵan kórinedi.
Uzaq ýaqyt qozǵalyssyz otyrý men kompıýterdiń zardaby ótip ketkendikten, aıaǵyndaǵy ınfeksııa denege taralyp ketse, ómirimen qosh aıtysýy múmkin bolar edi. Biraq aq halattylar der kezinde kómek kórsetip úlgergen.
Qumar oıynǵa táýeldilikten búginde qaıtys bolyp jatqandar az emes. Máselen, ótken jyly dál osy Aspanasty elinde 19 saǵat boıy kompıýterdiń aldynda telmirip otyrǵan jasóspirim til tartpaı ketken.
Al Bashqurtstanda 2015 jyly tamyz aıynyń sońynda 22 kún boıy úzdiksiz oıyn oınaǵan 17 jasar bala qaıtys boldy. Málimetterge sáıkes, ol 2014 jyldan beri kompıýterge 2 myń saǵat ýaqytyn jumsaǵan. Ata-anasy úıde bolmaǵan kezderi eski áýenine basyp, tek uıyqtap alý úshin ǵana úzilis jasaǵan.
Aıan ÁBDÝÁLI,
«Egemen Qazaqstan»