AQSh-tyń Kalıfornııa shtatynda ornalasqan Google X keńsesinde kıiz úı tigildi. Bul jańalyqty alǵash bolyp kompanııa qyzmetkeri, Qyrǵyzstan azamaty Tilek Mamýtov facebook áleýmettik jelisindegi jeke paraqshasynda habarlady.
– Google X keńsemizde kıiz úıdiń ornatylýyna Emılı jáne Rıchard esimdi áriptesterim kómektesti. Olarǵa alǵysym sheksiz. Internet arqyly baılanysqanymyzda ótinish-tilegimizdi jerge qaldyrmady. Aldaǵy ýaqytta bul oryn meımandarmen kezdesýge arnalǵan bólme retinde paıdalanylady, – dedi Tilek Mamýtov.
2014 jyly Qazaqstan men Qyrǵyzstannyń birlesýimen kıiz úıdi jasaýdyń dástúrli maǵlumaty jáne óneri IýNESKO-nyń tizimine engen bolatyn.
Google X qazirgi tańda Alphabet holdınginiń quramynda. Negizinen perspektıvti tehnologııalar shyǵarýmen aınalysady. Olardyń arasynda júrgizýshisiz júretin avtomobıl, shynaıy ómir kózildirigi, atmosferanyń stratosfera qabatynda ınternetke kirý, adam sózin tanýdy, sonymen qatar vıdeodaǵy, ǵalamtordaǵy nysandardy anyqtaıtyn oqytý neıtron jelisi bar.
Aıta keteıik, kóshpeli halyqtardyń baspanasy bolǵan kıiz úı búginde kópshiliktiń qyzyǵýshylyǵyn týdyrýda. Máselen, osydan birneshe aı buryn Kanadada Maıkl Djeffrı esimdi stýdent yqshamdylyǵy, únemdiligi, qolaılyǵy úshin ejelgi jurttar baspanasyn quryp alǵan. Al Gollıvýd juldyzy Leonardo Dı Kaprıo 10 kúndik demalysyn Mońǵolııada kıiz úıde ótkizgen.
Aıan ÁBDÝÁLI,
«Egemen Qazaqstan»