Sýpermemleket degenimiz osyndaı ma?
Germanııa men Fransııa Eýroodaqty reformalaý jobasyn daıyndaǵan. Bul týraly TVP Info telearnasy habarlady. Telearnanyń qolyna eki el syrtqy ister mınıstrleri qol qoıǵan qujat túsken sekildi.
Bul jerde áńgime Parıj ben Berlınniń Eýroodaqtaǵy basqa elderge qoıyp otyrǵan ýltımatýmy týraly bolyp otyr. Joba boıynsha, oǵan qatysýshy elderdiń is júzinde ózderiniń jeke armııasyna, arnaıy qyzmetterine, qylmystyq kodeksi men ulttyq valıýtasyna quqy bolmaıdy eken. Sondaı-aq, birtutas arnaıy qyzmetter men salyqtyq jáne vızalyq júıe qurý josparlanyp otyrǵanǵa uqsaıdy. Buǵan qosa, jobada ortaq syrtqy saıasat júrgizý men NATO-nyń Eýropa qurlyǵyndaǵy rólin shekteý týraly másele qarastyrylypty. Osylaısha jańa odaqqa múshe memleketter is júzinde óz shekaralaryn baqylaýdan da aıyrylatyn tárizdi.
Túrkııa men Izraıldiń ýaǵdalastyǵy
Túrkııa men Izraıl qarym-qatynastaryn jaqsartý týraly ýaǵdalastyqqa keldi. Bul týraly Túrkııa premer-mınıstri Bınalı Iyldyrym málimdedi, dep habarlady «Reıter» agenttigi.
Kelisim sheńberinde taraptar endi jaqyn arada elshilerimen almasatyn bolady. Túrkııa premeriniń sózine qaraǵanda, Izraıl 2010 jyly oryn alǵan qaqtyǵys kezinde qaza tapqan nemese zardap shekken túrik azamattarynyń otbasylaryna 20 mıllıon dollar ótemaqy tóleýge kelisimin bergen. О́z kezeginde Túrkııa Gaza sektoryna áskerı emes ónimdermen gýmanıtarlyq kómek kórsetpekshi. Al 2010 jyly Gaza sektoryna qoıylǵan blokadany buzýǵa barǵan túrik korablderine ızraıldik áskerıler basa-kóktep kirip, Túrkııanyń toǵyz azamatyn atyp óltirgeni belgili. Janjal sodan týǵan bolatyn.
Elızaveta II-niń densaýlyǵy qandaı?
Ulybrıtanııa patshaıymy Elızaveta II Soltústik Irlandııaǵa sapary kezinde densaýlyǵyna qatysty qoıylǵan suraqqa qaljyńmen jaýap qaıtarypty. Muny The Telegraph habarlady.
Patshaıym Soltústik Irlandııanyń astanasy – Belfast qalasyndaǵy Hıllsboro zamogynda osy el birinshi mınıstriniń orynbasary Martın Makgınnesspen kezdesken bolatyn. Sol kezde birinshi mınıstrdiń orynbasary 90 jastaǵy patshaıymnan «hal-jaǵdaıyńyz qalaı?» dep suraǵan ǵoı. «Ázirshe áıteýir tirimin» dep jaýap qaıtarypty Elızaveta II. Makgınness bolsa, buǵan qosa búginde Birikken Koroldikte adam túsinip bolmaıtyn oqıǵalar oryn alyp jatqanyn kóldeneń tartqan. Patshaıymnyń eki kúndik sapary Ulybrıtanııanyń Eýroodaqtan shyǵý máselesine arnalǵan bolatyn.
Qysqa qaıyrǵanda:
Túrkııa premer-mınıstri Bınalı Iyldyrym óz eliniń Reseıdiń atyp túsirilgen Sý-24 ushaǵy úshin ótemaqy tóleýden bas tartatynyn málimdedi. «О́temaqy týraly áńgime qozǵalǵan emes, Túrkııa tek keshirim suraǵan bolatyn», dep atap kórsetken úkimet basshysy. Muny «Reıter» habarlady.
AQSh-tyń Mıssısıpı shtatyndaǵy Djekson okrýginde ornalasqan gaz óńdeıtin zaýytta jarylys boldy. Kýágerlerdiń sózderine qaraǵanda, jarylystan soń birden órt shyqqan. Ázirshe opat bolǵandar men zardap shekkender týraly naqty aqparat joq.
Reseıden Túrkııaǵa baryp demalatyndar aǵyny osy jyldyń birinshi toqsanynda ótken jyldyń sáıkes kezeńimen salystyrǵanda 71 paıyzǵa qulap, bar bolǵany 20,9 myń adamdy quraǵan. Bul aqparatty Reseı týrıstik ındýstrııa odaǵynyń baspasóz hatshysy Irına Tıýrına taratty.
Polısııa Japonııanyń Japan Airlines áýe kompanııasynyń ekinshi ushqyshyn qamaýǵa aldy. Ol reıs aldynda laıner kapıtanymen birge spırtti ishimdik iship, onymen iligisip qalǵan. Janjaldasyp jatqan ekeýge arasha túsken polıseıdi 42 jastaǵy Soıtı Tasýmı judyryqtyń astyna alǵan. Sóıtip, Kanadzavadan Tokıoǵa ushatyn reıs keıinge qaldyrylypty.
Gastarbaıterler uıymdastyrǵan tóbeles
Shamamen 100 gastarbaıter Lenıngrad oblysynyń Kýdrovo eldi mekenindegi qurylys alańynda tóbeles uıymdastyrǵan. Judyryqtasýǵa qatysqandar armatýra men taıaqtar jáne tastar qoldanyp, bir-birine travmatıkalyq qarýdan oq atqan.
Keıbir tóbeleskender jaraqat alǵan. Polısııa 20 adamdy qamap tastaǵan. Al tóbelesti qurylys alańynyń janynan ótip bara jatqan Daǵystannyń týmasy uıymdastyrsa kerek. Ol Ortalyq Azııadan barǵan mıgranttarmen sózge kelip, kerisip qalypty. Oqıǵaǵa kýá bolǵandardyń aıtýlarynsha, daǵystandyq mingen avtomobıl sol mańda turǵan gastarbaıterdiń biriniń ústine jańbyrdyń laı sýyn shashyratyp ketken. Saldarynan, júrgizýshi soqqyǵa jyǵylsa, keıin ol ózimen birge «qosymsha kúsh» ertip kelgen...
Júk kóliginen 17 kg. geroın tabyldy
Reseıdiń Ekaterınbýrg qalasynda Federaldyq qaýipsizdik qyzmetiniń Sverdlov oblysy boıynsha basqarmasynyń qyzmetkerleri Qyrǵyzstannan keletin geroınnyń jolyn japty. Bul týraly basqarmanyń baspasóz qyzmeti habarlady.
Basqarmanyń aqparatyna qaraǵanda, Qyrǵyzstan azamaty óziniń sybaılastarymen esirtki ákelýdiń syzbasyn daıyndaǵan. Sóıtip, esirtkiniń osy kúshti túri Ekaterınbýrgke federaldy kólik kompanııasymen jetkizilip turǵan. «Kólik kompanııasynyń qyzmetkerleri taýar toltyrylǵan júk kóliginde esirtki bar dep esh kúdiktenbegen de», dep atap ótedi arnaıy qyzmettegiler. Basqarma qyzmetkerleri júk tıelgen avtokólikti kompanııanyń arnaıy turaǵynda kútip alyp, 33 jastaǵy Qyrǵyzstan azamatyn tutqyndaǵan. Teksere kelgende júk kóliginen 17,5 kg. geroın shyqqan.
Tanzanııadaǵy gelıı qory
Ulybrıtanııalyq jáne norvegııalyq geohımıkter Tanzanııa aýmaǵynan gelııdiń orasan mol qoryn tapqan. Shyǵys Afrıka memleketindegi jerasty ken ornynda osy elementtiń 1,5 mıllıard tekshe metr qory bar ekeni belgili bolyp otyr.
Ǵalymdar gelııdi ony izdeýdiń arnaıy daıyndalǵan tásili arqyly tabýǵa qol jetkizgen. Bul gaz jer betine výlkandyq belsendilik nátıjesinde kóteriledi eken. Suıyq gelıı negizinen joǵary ótkizgishti magnıtterdi sýytý úshin, atap aıtqanda, magnıtti-rezonansty tomografııa úshin paıdalanylady. Qazirgi kezde jylyna shamamen 220 mıllıon tekshe metr gelıı iske jaratylady. Ony satatyn álemdegi negizgi iri el AQSh sanalady. Bul eldegi barlanǵan gelıı qory 4,3 mıllıard tekshe metrdi quraıdy. Biraq ol jyl ótken saıyn tez azaıyp kele jatyr eken.
Internet materıaldary negizinde ázirlendi