«QazMunaıGaz» ulttyq kompanııasynyń «Suńqar» balalar saýyqtyrý lageri Kókshe óńirindegi Zerendi kóliniń jaǵalaýyndaǵy «Kókshetaý» ulttyq saıabaǵynda ornalasqan. Munda eki apta ishinde kompanııaǵa qarasty enshiles uıymdar qyzmetkerleriniń 2 myńǵa jýyq balalary demalyp, densaýlyqtaryn túzetedi. Ásirese Qyzylorda, Mańǵystaý jáne basqa oblystardan kelgen jetkinshekterdiń alǵan áserlerin taýysyp aıta almaısyń. Jaqynda lagerde ekinshi maýsymnyń saltanatty ashylýy boldy.
– Eki apta tez óte shyǵady, men balalardyń jaqsylap demalyp, tynyǵýlaryna tilektespin. Tabıǵatty aıalap, óz elderińizdi shyn súıińizder. Demalysty jaqsy ótkizip, oqýda ozat bolyńyzdar, – dedi «QazMunaıGaz» ulttyq kompanııasynyń bıznesti qoldaý jónindegi basqarýshy dırektory Serik Keýlimjaev.
«Suńqar» saýyqtyrý lagerinde tolyqqandy demalý úshin jan-jaqty jaǵdaı jasalǵan. Balalar jaıly turǵyn korpýstarda turady. Ár nómirde sanıtarlyq torap, dýsh bólmesi jumys isteıdi. Keshen aýmaǵynda basketbol, voleıbol, fýtbol oınaýǵa arnalǵan alańdar bar. Sýǵa túsip júzemin deseń eki basseın ashylǵan. Sondaı-aq, trenajer, kıno zaldary da tolyq qyzmet kórsetedi. Jetkinshekter súıikti isterimen aınalysyp, ýaqyttaryn mándi ótkizedi.
Demalys kezinde balalar Býrabaı ulttyq saıabaǵyna baryp saıahatqa shyǵady. Abylaı hannyń alańynda bolyp, tabıǵat mýzeıiniń jádigerlerimen tanysady. Árıne, jaıaý joryqta gıtaraǵa qosylyp án shyrqaıdy. Túrli konsertter men dıskotekalarǵa qatysyp, ónerlerin kórsetedi.
– «Suńqar» saýyqtyrý kesheninde kóptegen balalarmen tanysyp, dostastym. Olarmen birge óz ónerimdi kórsetip, kópshiliktiń kóńilinen shyqtyq. Jalpy alǵanda lagerde demalyp tynyǵý óte kóńildi. Keshen qyzmetkerleri bizge talaı nárseni úıretti. О́ıtkeni, mundaǵy tabıǵattyń ózi ǵajaıyp emes pe. Bári shynaıy ári áserli, – deıdi 2-shi jasaqtyń múshesi Mereı Muhametjan.
2001 jyldan beri «Suńqar» saýyqtyrý kesheni jazǵy maýsymda 23 myńnan astam balany qabyldap, jaqsy tynyǵýlaryna jaǵdaı jasady. Negizinen olar «QazMunaıGaz» ulttyq kompanııasyna qarasty enshiles kásiporyndar men bólimshelerdiń balalary. Jetkinshekterdiń kópshiligi tabıǵaty qataldaý Qyzylorda, Jańaózen, Mańǵystaý sııaqty óńirlerden keldi. Árıne, olardyń bárine Aqmola oblysynyń aýmaǵyndaǵy qaraǵaıly ormandardyń kórkemdigi kóńilderinen shyǵyp, densaýlyqtaryn shyńdaýǵa sebebin tıgizgeni sózsiz.
Balalar bir-birimen shúıirkelesip jatqan sátte, bir kezdegi lagerde ótken kúnderin ulttyq kompanııanyń basqarýshy dırektory Serik Keýlimjaev ta esine túsirdi.
– Men keńestik kezeńde týyp-óstim. Jyl saıyn jazǵy kanıkýl kúnderin pıoner lagerinde ótkizetinmin. Keı kezde bos oryn taba almaı shatyrlarda jatqanbyz. Ol ýaqyttaǵyny qazirgimen salystyra almaısyń. Ekeýiniń arasy jer men kókteı. О́ıtkeni, búgingi kúnniń lagerleri zamanaýı jabdyqtarmen jabdyqtalǵan. Kerekti nárseniń bárin tabasyń. Jalpy alǵanda lagerde demalǵanǵa ne jetsin. Jańa dostar taýyp, oı-órisiń keńeıetini óz aldyna. Bir sózben aıtqanda, lagerde bári tamasha, – deıdi Serik Keýlimjaev.
Kórkimen kóz tamsandyratyn Kókshe óńirindegi balalar lagerlerinde qazir naǵyz qyzyqty shaq. Jaz jaınatyp, kún kúldirip, máre-sáre bolǵan jetkinshekterdiń qýanyshtary sheksiz bolǵaı. Olardyń alańsyz demalýyna jaǵdaı jasaǵan «QazMunaıGaz» ulttyq kompanııasynyń jumysy atap aıtýǵa ábden laıyq.
Nurbaı ELMURATOV,
«Egemen Qazaqstan»