Keshe Aqordada Memlekettik hatshy Gúlshara Ábdiqalyqovanyń jetekshilik etýimen Qazaqstan Respýblıkasy Táýelsizdiginiń 25 jyldyǵyn merekeleý jónindegi memlekettik komıssııanyń kezekti otyrysy ótti. Jıynda aıtýly jyldy aıryqsha jaǵdaıda uıymdastyrý is-sharalarynyń jospary talqylandy.
Gúlshara Naýshaqyzy eń aldymen Qazaqstannyń BUU Qaýipsizdik Keńesiniń eki jylǵa turaqty emes múshesi bolyp saılanýyna arnaıy toqtaldy. «Bizdiń elimizdiń BUU Qaýipsizdik Keńesiniń 2017-2018 jyldardaǵy turaqty emes múshesi bolyp saılanýy – Elbasynyń, jalpy Qazaqstan halqynyń jeńisi. Osy jeńispen sizderdi quttyqtaımyn», – dedi Memlekettik hatshy.
Sodan keıin jýyrda ǵana ótken eldiń áleýmettik-ekonomıkalyq damýynyń 4 aılyq qorytyndysyna arnalǵan jıynda Elbasynyń Táýelsizdiktiń shırek ǵasyrdaǵy tarıhı mańyzyna aıryqsha toqtalǵanyn eske túsirgen G.Ábdiqalyqova bul mereıtoı jalpyulttyq deńgeıde uıymdastyrylýy tıis jaýapty mindettiń biri ekendigin atap kórsetti.
«Biz shırek ǵasyrlyq mereıtoı aıasynda syndarly únqatysýǵa negizdelgen, kez kelgen máseleni sheshýge qabiletti ekenimizdi kúlli álemge tanytýymyz qajet jáne aldaǵy órshil maqsattarǵa jumylǵan judyryqtaı birge umtylatyn el ekendigimizdi kórsetýimiz kerek. Sondyqtan da atalǵan uly merekeni jalpyulttyq deńgeıde uıymdastyrý jáne laıyqty ótkizý barshamyzǵa júktelgen jaýapty mindet bolyp tabylady», – dedi ol.
Alqaly jıynda jyl sońyna deıin júzege asyrylatyn merekelik sharalar men aýqymdy jumystar týrasynda Mádenıet jáne sport mınıstri A.Muhamedıuly jan-jaqty aıtyp berdi. Al Bilim jáne ǵylym vıse-mınıstri B.Asylova mereıtoılyq basqosýlarǵa jastar men jastar uıymdaryn tartý jónindegi, Aqparat jáne kommýnıkasııalar mınıstri D.Abaev aqparattyq-ımıdjdik súıemeldeý jónindegi josparlarymen bólisti.
Jalpy, Memlekettik hatshy búgingi basqosý barysynda Qazaqstan Táýelsizdiginiń shırek ǵasyrlyq mereıtoıyn erekshe leppen atap ótýdi uıymdastyrýda jergilikti jerler men aýyl-aımaqtardy keńinen qamtý jaıy talqylanatyndyǵyn eskertken bolatyn. Osyǵan oraı, onlaın-rejimde ótken otyrysta Batys Qazaqstan oblysy ákiminiń orynbasary M.Toǵjanov óńirde Táýelsizdiktiń 25 jyldyǵyn merekeleýdi uıymdastyrý isine toqtaldy. Degenmen, is-sharalardy ótkizý boıynsha memlekettik organdardyń jumysyn ózara úılestirý men yqpaldastyqtyń negizgi máseleleri jóninde pikir almasýda Aqparat jáne kommýnıkasııalar mınıstri D.Abaev jetekshilik etetin vedomstvonyń maqsat-mindetteri aýqymdy bolyp shyqty. Sonyń biri retinde ol – Táýelsizdiktiń 25 jyldyǵyn kórsetýde shırek ǵasyrdaǵy el jetistigi erekshe mańyzǵa ıe ekendigin atap ótti.
«Al aqparattyq naýqannyń basty qaǵıdaty – halyqtyń otansúıgishtigin arttyrýǵa baǵyttalatyn bolady. Biz elimizdiń negizgi jetistikterin kórsetýge tyrysamyz. Sondyqtan da qazirgi ýaqytta arnaıy túzilgen medıa-jospar aıasynda jumystar júrgizilip jatyr», dedi mınıstr. Onyń aıtýynsha, mundaı medıa-jospardan bólek aqparattyq jumystardyń tásilin ózgertý de kózdelgen. «Osy rette tek medıa-jospardy ǵana paıdalanbaı, targetteý dep atalatyn tásildi de qoldanbaqpyz. Iаǵnı, halyqtyń árbir sanatyna jeke-jeke joba usynylady. Menińshe, bul tásil ózin ózi barynsha aqtaýy tıis», – dedi mınıstr.
Sonymen qatar, 25 jyldyq aıasyndaǵy aqparattyq qoldaý sharalarynyń quramynda realıtı-shoý ótkizý josparlanypty. «Osy baǵytta arnaıy basymdyqqa ıe 25 ǵajap joba usynamyz. Qazir onyń barlyǵy da daıyndalý ústinde. Taıaý ýaqytta bul jobalar teledıdardan kórsetilip, gazetterde jarııalanatyn bolady. Biz elimizdiń Táýelsizdigine arnalǵan, júlde qory qomaqty qyzyqty fotobaıqaý da ótkizbekpiz», – degen Dáýren Áskerbekuly BAQ ókilderiniń saýalyna oraı, el Táýelsizdigi mereıtoıyn atap ótýge qosymsha qarjy qarastyrylmaıtynyn da qaperge salyp ótti. «Barlyǵy da josparlanǵan bıýdjetke saı uıymdastyrylady. Odan tys eshqandaı qarjy josparlanyp jatqan joq. Menińshe, másele aqshada emes, aqparatty el-jurtqa jetkize bilýde», – dedi ol sózin nyqtap.
Memlekettik hatshy otyrysty qorytyndylaı kele, josparlanǵan is-sharalardy sapaly jáne merziminde iske asyrý qajettigin atap ótip, jumysty ári qaraı uıymdastyrý jóninde tıisti organdarǵa birqatar tapsyrma júktedi.
Nurlybek DOSYBAI,
«Egemen Qazaqstan»