Memlekettik qyzmet isteri mınıstriniń №104 buıryǵymen «B» korpýsynyń ákimshilik memlekettik laýazymyna ornalasýǵa konkýrs ótkizý erejelerine ózgerister engizildi.
Bul ózgerister Birinshi ınstıtýttyq reformany júzege asyrý jónindegi vedomstvoaralyq jumys tobynyń otyrysynda maquldandy. Olar konkýrstyq komıssııalardyń jumysyn jetildirýge, sondaı-aq, konkýrs ótkizý merzimderin ońtaılandyrýǵa baǵyttalǵan.
Engizilgen túzetýlerge sáıkes, ortalyq memlekettik organdardy qospaǵanda, memlekettik organdarǵa konkýrstyq komıssııalar qurýǵa ruqsat beriledi. Onyń quramyna keminde bes adam tartylýy múmkin. Bul jańalyq aýdandyq jáne aýyldyq deńgeıdegi memlekettik organdarda qurylymdyq bólimshelerdiń jetkiliksizdiginiń saldarynan týyndaıtyn konkýrstyq komıssııa qurý máselesin sheshýge múmkindik beredi.
Sonymen birge, memlekettik apparattyń úzdiksiz jumysyn jáne bos laýazymdardyń ornyn ýaqtyly almastyrý maqsatynda qujat qabyldaý merzimderi: ishki konkýrs ótkizý kezinde – 5 jumys kúninen 3 jumys kúnine deıin, jalpy konkýrs kezinde – 10 jumys kúninen 7 jumys kúnine deıin qysqartyldy. Ishki jáne jalpy konkýrstarǵa qatysatyn úmitkerlerdiń áńgimelesýden ótý merzimi de sáıkesinshe 5 jumys kúninen 3 jumys kúnine deıin qysqartyldy. Nátıjesinde, konkýrstyń barlyq úsh kezeńin ótkizý merzimderi jalpy 13 jumys kúnine azaıatyn boldy.
Eske sala keteıik, merzimderdi qysqartý máselesi ústimizdegi jyldyń 8 maýsymynda ótken mınıstrdiń halyqpen eseptik kezdesýinde kóterilgen edi.
«Egemen-aqparat»