Keshe Prezıdent janyndaǵy Ortalyq kommýnıkasııalar qyzmetiniń alańynda tehnıkalyq retteý jáne metrologııa salasynda kadrlardy daıarlaý máselesi talqylanǵan brıfıng ótti.
Zaman talabyna saı ekonomıkanyń túrli salasyna mamandardy daıyndaý kún tártibindegi negizgi máselelerdiń biri ekendigi ras. Bul rette jastardy tehnıkalyq retteý jáne metrologııa baǵytyna tartýdyń mańyzy zor. Degenmen, bilikti kadr daıyndaýda kóptegen túıtkilderdiń joq emestigi taǵy bar, oǵan sebep – kópshiliktiń osy salaǵa umtylys tanytpaýy bolyp otyr.
Is-shara barysynda atalǵan salaǵa jastardy tartý men olardyń búgingi tańda kásibı maman bolýy úshin qajetti alǵysharttardy keńinen ataǵan IDM Tehnıkalyq retteý jáne metrologııa komıteti tóraǵasynyń orynbasary Ǵalymjan Doǵalov birqatar derekterdi alǵa tartty. Onyń aıtýy boıynsha, Bilim jáne ǵylym mınıstrliginiń aqpary kórsetip otyrǵandaı ótken jyly «Standarttaý, metrologııa jáne sertıfıkattaý» mamandyǵyn 451 stýdent bitirgen. Al, bul kórsetkish respýblıkalyq deńgeıde salanyń qajettiligin óteýde tipti de az. Osy másele jyl saıynǵy metrologtar keńesinde kóterilip júr», dedi ol ári qaraı. Sonymen qatar, búgingi tańda fızıka-hımııa quraldaryn qoldana biletin mamandardyń jetispeı otyrǵanyn aıta kele, onyń ishinde elektrondy mıkroskoptar, spektrometrler men hromatograftardy erkin paıdalanatyn kadrlardyń joq ekendigin jetkizdi. Osy rette joǵary oqý oryndarynyń bilim baǵdarlamalary men kadrlyq áleýeti qajettilikke saı bolýy tıistigin atap ótti.
Bıyl sala boıynsha mamannyń tapshy bolýyna baılanysty komıtettiń usynýymen oqý oryndarynda bakalavrıattarǵa «Metrologııa» páni engizilmek. Jáne de bizdiń komıtet elimizdiń jetekshi joǵary oqý oryndarymen seriktestik baılanys ornatýda. Qazirgi tańda L.N.Gýmılev atyndaǵy Eýrazııa ulttyq ýnıversıteti, S.Seıfýllın atyndaǵy Qazaq agrotehnıkalyq ýnıversıteti jáne Qaraǵandy memlekettik tehnıkalyq ýnıversıteti men Qazaq-Brıtan tehnıkalyq ýnıversıteti jáne ál-Farabı atyndaǵy QazUÝ-men kelisimsharttarǵa qol qoıyldy. Aıtar bolsaq, respýblıkamyzda «Standarttaý, metrologııa jáne sertıfıkattaý» salasy boıynsha bar-joǵy 42 joǵary oqý orny ǵana maman daıyndaýda, dedi Ǵ.Doǵalov.
Bul rette atalǵan kelisimsharttar aıasynda stýdentter «Qazaqstan metrologııa ınstıtýty» respýblıkalyq memlekettik kásipornynda jáne «Qazaqstan standarttaý ınstıtýty» RMK-da óndiristik tájirıbeden ótetin bolady. Indýstrııalyq-ınnovasııalyq damý baǵdarlamasynyń engizilýine baılanysty óndiristi metrologııalyq baǵytta qamtamasyz etýde talaptar da kúsheıip otyr. Bul degenimiz, kez kelgen ólsheýish quralymen jumys isteıtin mamannyń biliktilik deńgeıine de baılanysty.
Jıyn aıasynda metrologııa salasynda basqa salada oqyp kelgen mamandardyń jumys istep jatqandyǵy aıtyldy. Olardyń basym bóligi arnaıy kýrstardy oqyǵan qyzmetkerler. Sol sebepti, olardyń metrologııa baǵytynda tolyqqandy jumys isteýge bilimi jetpeıdi. Bul máseleniń túıinin aǵytý úshin qazirgi tańda oqý baǵdarlamalaryn taldaý júrgizilip jatyr.
Elmıra MÁTIBAEVA,
«Egemen Qazaqstan»