Ádebıetshilersiz ádebı baıqaý

Osydan jeti jyl buryn bir top azamat aqyldasa kele «Altyn qalam» ádebı júldesin taǵıyndaý týraly bastama kóter­gen bolatyn. Maqsat – elimizdiń rýhanı-mádenı damýyna el patrıoty retinde óz úlesin qosý jáne jas daryndar men jańa esimderdiń qalyń jurtqa tanylýyna yqpal etý. Keıin baıqaýdy uıymdastyrý komıtetiniń qura­myna basqa da belgili azamattar, kásipkerler qosyla bastady. Sonymen, Qazaqstan baspasóz klýbynda ótken máslıhatta«Altyn qalam» ulttyq ádebı júldesi besinshi maýsymynyń bastalǵany málim boldy. Bul kúnde báıgeniń túr-túri bolǵanymen, úzdikterdi anyqtaýǵa oqyrmandardyń atsalysýy osy baıqaýdyń basty ereksheligi sanalady. Shyǵarmalardy baǵalaý eki kezeńnen turady. Alǵash ret oqyrmandar daýys berip, ár kórkem týyndyǵa qatysty óz pi­kirlerin bildiredi. Budan keıin jumystarmen qazylar ta­nysady. Aıta ketetin jaıt, qazylar quramynda kásibı qalamgerler, ádebıetshiler joq. Kóptiń talqysyna usynylǵan ádebı shyǵarmalardyń avtory da kórsetilmeıdi. Mundaı talaptar júldeniń ádil ótýine kepildik beredi. Qysqasy, biz sóz etip otyrǵan baıqaý – jumystaryna jazýshylar emes, oqyrmandar baǵa beretin Qazaqstandaǵy birinshi ádebı júlde. «Altyn qalam» ulttyq áde­bı júldesi alǵash ret alty jyl buryn ıelerin tapqan edi. Úmitkerlerden ádebı týyndylar «Jyldyń úzdik prozasy», «Jyldyń úzdik poezııasy», «Jyldyń úzdik ǵylymı basylymy», «Jyldyń úzdik iskerlik basylymy», «Jyldyń úzdik balalar kitaby», «Blogomanııa» («E-Kitap»), «Jyldyń úzdik aýdarmasy» atalymdary boıynsha qabyldandy. Alǵashqy báıgege úsh aıda elimizdiń ár óńirinde turatyn 75 avtordan 92 shyǵarma kelip túsken. «Altyn qalam» ekinshi ret 2011 jyly uıymdastyryldy. Baı­qaýǵa 115 avtor 240 shyǵar­masyn joldady. Úshinshi baıqaý 2014 jyly ótti. Al byltyrǵy uıym­dasty­rylǵan báıgede 170 adam baq synady, 355 jumys oqyrman súzgisinen ótti. О́tken jylǵy baıqaý atalymdary «Jyldyń úzdik satırasy», «Jyldyń úzdik fantastıkasy jáne detektıv shyǵarmasy» atalymdarymen tolyqty. Bul jumystardyń deni www.akalam.kz veb-portalyna ornalastyryldy. Bıyl «Altyn qalam» ádebı júldesimen «Arýna» baspasy yntymaqtastyq ornatyp, júldege qatysqan avtorlardyń biriniń balalarǵa arnalǵan kitabyn shyǵarýǵa daıyndalyp jatyr. Aınash ESALI, «Egemen Qazaqstan» ALMATY