Qaraǵandy oblysynyń Aqtoǵaı aýdanynda «Áýen» balalar ansambli bar. Osy jas ónerpazdar toby Astanada tuńǵysh ret ótken «Jaryq juldyz» halyqaralyq televızııalyq óner baıqaýynda «Estradalyq vokal» atalymy boıynsha Gran-prı ıegeri atandy.
Saıysqa elimizdiń ár aımaǵyndaǵy irikteý kezeńinde úzdik atanǵan ónerpazdar qatyssa, «Áýen» ansambli de «Saryarqa daryny» oblystyq baıqaýynda bas júldeni jeńip alyp, Astanadaǵy osy báıgege joldama alǵan bolatyn.
Bizben áńgimesinde ansambl jetekshisi Salamat Múbárak: «Áýenniń» qurylǵanyna kóp bola qoıǵan joq, – dedi. – Bıyl naýryz aıynan beri jumys istep jatyrmyz. Jalpy, Aqtoǵaı aýdanynda «Ardagerler» ansambli, «Toqyraýyn» án-bı, «Arman» estradalyq jastar, «Balbyraýyn» bı ansambli, «Saryjaılaý» ulttyq aspaptar orkestri, «Aqtoǵaı» jáne «Shalqar» halyq teatrlary bar edi. Tek balalar óner ujymy joq bolatyn. Sondyqtan, «Áýen» ansamblin uıymdastyrdyq».
Onyń quramyndaǵy segiz balanyń árqaısysy ártúrli baıqaýlarda jeńimpaz bolǵandar. Mysaly, Samal Maǵaýına Táttimbettiń 200 jyldyǵyna arnalǵan respýblıkalyq kúıshiler saıysynda ozyp shyqsa, Ámına Esim Astanadaǵy «Kúnshýaq» qorynyń uıymdastyrýymen ótken respýblıkalyq «Sálem, Astana» baıqaýynda Gran-prı ıelengen. Madııar О́mirǵaly bolsa «Sálem, Astana!» baıqaýynda I oryn, Elnara Mirásil Almaty qalasyndaǵy halyqaralyq óner festıvalinde I oryn, Ǵabıt Serik, Arýjan Boranqul, Móldir Moldasheva sııaqty jetkinshekter de túrli konkýrstarda júldeli orynnan kóringender».
Negizinde, Aqtoǵaı aýdandyq «О́ner» mektebi alǵash 2003 jyly qurylǵanda 60 oqýshy bolsa, búginde mektepte 230 ul-qyz oqıdy. Olar dombyra, estradalyq vokal, dástúrli án, kórkemsýret synyptarynda bilim alyp, qabiletterin shyńdaýda. Aqtoǵaı – óreli óner tunǵan, nebir dúldúl ónerpazdar shyqqan meken. Sondyqtan, «Áýen» balalar ansambliniń de tarıhy uzaq, alar asýlary bıik bolady dep senemiz.
Ernat QAShQYNOV
Qaraǵandy oblysy,
Aqtoǵaı aýdany