Azamat

KazGÝ-diń qalashyǵy keıin ózge fakýltetterdiń jataq­ha­na­larymen jáne oqý ǵıma­rat­tary­men tolyǵa tústi. Jetpisinshi-sek­seninshi jyldardyń jastary men stýdentteri mamandyqtary men fa­kýltetteriniń ártúrli bol­ǵany­na qaramastan, bir-birimen mıdaı aralasyp jatatyn. Bir-birimen tez tanysyp, tez tabysatyn. Mun­daı ádet, ásirese, qala­shyq­taǵy jataq­hanada turatyn stý­dentterge kóbi­rek tán bolatyn.

Sondaı kezde bizdiń tanysyp, keıinnen jaqsy dos, joldas bo­lyp ketken zamandasymyz – onyn­shy jataqhanada turatyn zań fakýltetiniń stýdenti Maqsuthan Ahmetov edi. Sol kezde-aq taý qozǵalsa qoz­ǵal­maıtyn, salmaqty, ornyqty minezdi, dos-joldastaryna degen keńpeıil kóńili men dostyqqa adal­dyǵy onyń adamgershilik beı­nesin tuǵyrlandyra túsetinin baı­qaı­tynbyz. Qazaq poezııasynyń patrıarhy, marqum Qadyr Myrza Áli bir óleńin bylaısha órnektepti: «O bastan-aq jarat, meıliń, jaratpa, Bal qossań da barmaıdy aýzym sharapqa. Seri bolyp qumartpadym shylymǵa, Sulýlarǵa joq edim men buryn da».

Mine, osy Qadekeń aıt­qandaı, Maqsuthan araq-sharapqa da, shylymǵa da áýes bolmady. Keri­sinshe, ashyǵyn aıtqanda, ol kezdiń stýdentteri yńǵaıy kelip turǵanda birer saptyaıaq syra­ny simire salýdan bas tartpaı­tyn. Ol ýaqytynyń denin Pýshkın kitap­hanasynda, qala berdi ýnı­ver­sıtettiń sport zalyn­da ót­ki­zetin. Aq ter, kók ter bolyp aýyr atletı­kanyń patshasy – zil temir  kóterý­­men shuǵyldanyp, sport­tyń bul túri boıynsha táp-táýir nátı­je­ge jetkeni de umytyla qoıǵan joq. Ol bes jyl boıy onynshy jataq­hanadaǵy stýdenttik keńes­tiń tó­raǵasy boldy. Besinshi men onyn­shy jataqhananyń arasy taıaq tastamdaı ǵana. Ekeýiniń ara­syn saıǵa túskendeı tómende jat­qan jaıaý jol ǵana bólip tura­tyn.

Bizdiń baıqaǵanymyz, ol bul qoǵamdyq jumysynda ózin jataq­hanada turatyndarǵa syılat­tyra bilgendigi. Bireýmen artyq-aýyz sózge kelip kerildesip turǵanyn estimeppiz de, kórmeppiz de. Keri­sin­she zamany bir, jastary qatar­las joǵary jáne tómengi kýrs stý­dentteri onyń aıtqanyn jerge tastamaıtynyna da talaı márte kýá bolǵanbyz. Qalashyqtaǵy jataqhana­lar­dyń seksııalyq bóligi eki jáne úsh adamdyq oryndardan tura­tyn. Olar úsheý edi. Birinshisi – búgin­gi keıipkerimiz Maqsuthan Ahmetov, joǵaryda aıtylǵandaı, jataq­hanadaǵy stý­dent­tik keńes­tiń tóraǵasy bolsa, ekinshisi – Sársenbaı Dáýletov jet­pisinshi jyldardyń stýdentterin tártipke baǵyttaı bilgen jedel komsomol drýjınasynyń komandıri. Osy­naý qoǵamdyq stýdenttik qury­lym kezinde OKD degen atpen keń tanymal boldy. Úshinshisi – dos-joldastary arasynda ázil-qal­jyńy jarasqan, kóńili qashanda ashyq-jarqyn, kim-kimdi de ja­tyrqamaı baýyryna tarta bile­tin bolashaq zańger Baqtııar Baı­mýrzın bolatyn.

Ol ózin tóraǵa men komandırdiń ortasyndaǵy «jaıyn jaspyn» dep ataıtyn. Bizdi Kókshetaýdyń syrbaz jigiti Maqsuthanmen tanystyrǵan da osy oraldyq jigit Baqtııar edi. Maqsuthan Ahmetovtyń bo­ıyn­daǵy tapsyrylǵan iske degen jaýap­kershilik, óziniń bolashaq ma­ma­ndyǵyna degen adaldyq, taban­dylyq pen tyndyrymdylyq, aıtq­an sózinde tura bilý sekildi bıik adamgershilik qasıetter stý­dent­tik kezde tolyq qalyptasyp úl­ger­gen. 1982 jyly Qazaq memlekettik  ýnı­ver­­­sı­te­tiniń zań fakýltetin aıaq­­t­a­ǵan­nan keıin ol jas maman retin­de óziniń «Kerbez sulý – Kók­she­taýyna» qaraı baǵyt aldy. Ol munda prokýratýra, sot organdary­na qyzmetke ornalasqannan keıin óz mamandyǵyn qoldyń bes saýsa­ǵyn­daı jetik meńgergen, kási­bı deń­geıi tereń, biliktiligi joǵa­ry zań­ger retinde kórsete bilge­nin, úz­dik sýdıa atanǵanyn estip júrdik. Maqsuthannyń jetistikterine óz jetistigimizdeı qýandyq.

Ol Shortandy aýdandyq sotynyń tóraǵasy bolyp taǵaıyndalǵan kezde quttyqtap, shynaıy dos­tyq kóńilimiz ben peıilimizdi bildirdik. Ol buǵan balasha qýanyp, rı­za­shylyǵyn jetkizdi. Maqsuthan Sálimuly búginde Aqmola obly­syndaǵy Stepnogorsk qalalyq soty­nyń tóraǵasy qyzmetin aby­roımen atqaryp júr. Ol qaı kez­de de, qandaı jaǵdaıda da aza­mattyq bıikten alasaryp kórgen joq. Kerbez sulý Kókshe­taý­dyń tabıǵaty tamasha, ataýy da aıy­ryqsha Kórnekti degen aýy­lynda týyp-ósken, bir kezde­gi stý­denttik dos búgingi kúni respýb­lı­ka­myz­daǵy sot júıesiniń beldi bir ókili.

Temir QUSAIYN, «Egemen Qazaqstan» Batys Qazaqstan oblysy Sýrette: Maqsuthan Ahmetov