2015 jylǵy 16 maýsym,Astana qalasy
Hımııalyq ónimdi tirkeý jáne esepke alý qaǵıdalaryn bekitý týraly
«Hımııalyq ónimniń qaýipsizdigi týraly» 2007 jylǵy 21 shildedegi Qazaqstan Respýblıkasy Zańynyń 8-1-babyna sáıkes, buıyramyn:
1. Qosa berilip otyrǵan Hımııalyq ónimdi tirkeý jáne esepke alý qaǵıdalary bekitilsin.
2. Qazaqstan Respýblıkasy Investısııalar jáne damý mınıstrliginiń Indýstrııalyq damý jáne ónerkásiptik qaýipsizdik komıteti (A.Q.Erjanov):
1) osy buıryqty Qazaqstan Respýblıkasy Ádilet mınıstrliginde memlekettik tirkeýdi;
2) osy buıryq Qazaqstan Respýblıkasy Ádilet mınıstrliginde memlekettik tirkelgennen keıin kúntizbelik on kún ishinde onyń kóshirmelerin merzimdi baspa basylymdarynda jáne «Ádilet» aqparattyq-quqyqtyq júıesinde resmı jarııalaýǵa jiberýdi;
3) osy buıryqty Qazaqstan Respýblıkasy Investısııalar jáne damý mınıstrliginiń ınternet-resýrsynda jáne memlekettik organdardyń ıntranet-portalynda ornalastyrýdy;
4) osy buıryq Qazaqstan Respýblıkasy Ádilet mınıstrliginde memlekettik tirkelgennen keıin on jumys kúni ishinde osy buıryqtyń 1), 2) jáne 3) tarmaqshalarynda kózdelgen is-sharalardyń oryndalýy týraly málimetterdi Qazaqstan Respýblıkasy Investısııalar jáne damý mınıstrliginiń Zań departamentine usynýdy qamtamasyz etsin.
3. Osy buıryqtyń oryndalýyn baqylaý jetekshilik etetin Qazaqstan Respýblıkasynyń Investısııalar jáne damý vıse-mınıstrine júktelsin.
4. Osy buıryq onyń alǵashqy resmı jarııalanǵan kúninen keıin kúntizbelik jıyrma bir kún ótken soń qoldanysqa engiziledi.
Qazaqstan Respýblıkasynyń Investısııalar jáne damý mınıstriniń mindetin atqarýshy J.QASYMBEK
«KELISILDI»
Qazaqstan Respýblıkasynyń
Aýyl sharýashylyǵy mınıstri
______________ A.Mamytbekov
2015 jylǵy 9 shilde
«KELISILDI»
Qazaqstan Respýblıkasynyń
Ulttyq ekonomıka mınıstri
______________ E.Dosaev
2015 jylǵy 14 shilde «KELISILDI»
Qazaqstan Respýblıkasynyń
Ishki ister mınıstri
______________ Q.Qasymov
2015 jylǵy 1 shilde
«KELISILDI»
Qazaqstan Respýblıkasynyń
Energetıka mınıstri
______________ V. Shkolnık
2015 jylǵy 14 shilde
Qazaqstan Respýblıkasy Investısııalar jáne damý mınıstriniń mindetin atqarýshynyń
2015 jylǵy 16 maýsymdaǵy №694 buıryǵymen bekitilgen
Hımııalyq ónimdi tirkeý jáne esepke alý qaǵıdalary
1. Jalpy erejeler
1. Osy Hımııalyq ónimdi tirkeý jáne esepke alý qaǵıdalary (budan ári - Qaǵıdalar) «Hımııalyq ónimniń qaýipsizdigi týraly» 2007 jylǵy 21 shildedegi Qazaqstan Respýblıkasynyń Zańynyń 8-1-babyna (budan ári - Zań) sáıkes ázirlendi jáne hımııalyq ónimdi tirkeý jáne esepke alý tártibin aıqyndaıdy.
2. Osy Qaǵıdalardyń qoldanysy aınalamyna, óńdeýine, qaıta óndeýine, óndirýine, satyp alýyna, ótkizýine, saqtaýyna, paıdalanýyna, joıýyna qatysty «Ruqsattar jáne habarlamalar týraly» 2014 jylǵy 16 mamyrdaǵy Qazaqstan Respýblıkasynyń Zańyna (budan ári - «Ruqsattar jáne habarlamalar týraly» Zań) sáıkes ruqsat berý tártibi belgilengen hımııalyq ónimderge qoldanylmaıdy:
1) esirtki quraldar, psıhotroptyq zattar, prekýrsorlar;
2) jarylǵysh jáne pırotehnıkalyq zattar;
3) ýlar;
4) pestısıdter (ýly hımıkattar);
5) boıaǵyshtar, sıntetıkalyq jýǵysh quraldar;
6) dezınfeksııalaý, dezınseksııalaý jáne deratızasııalaý quraldary;
7) tamaqqa qospalar.
3. Osy Qaǵıdalardyń talaptaryna sáıkes tirkelmegen hımııalyq ónim, Zańnyń 3-babynyń 2-tarmaǵynda kórsetilgen hımııalyq ónimdi qospaǵanda, Qazaqstan Respýblıkasynyń aýmaǵynda aınalymǵa jiberilmeıdi.
4. Osy Qaǵıdalarda Zańda paıdalanylatyn negizgi uǵymdar, sondaı-aq mynadaı uǵymdar qoldanylady:
1) hımııalyq ónimdi tirkeý týraly kýálikter tizilimi (budan ári – tizilim) – onyń tirkelýi týraly qajetti málimetterdi qamtıtyn jáne hımııalyq ónimniń qaýipsizdigi salasyndaǵy memlekettik retteýdi júzege asyratyn ýákiletti organ (budan ári - ýákiletti organ) júrgizetin hımııalyq ónimniń tizbesi;
2) hımııalyq ónimdi tirkeý - ýákiletti organnyń málimdelgen qujattardy qaraý nátıjeleri boıynsha tizilimge hımııalyq ónim týraly málimetterdi engizý jáne hımııalyq ónimdi tirkeý týraly kýálikti berý;
3) hımııalyq ónimdi tirkeý týraly kýálik - hımııalyq ónimge onyń tirkeý rastaý jáne tizilimge engizý maqsatynda ýákiletti organ beretin qujat.
2. Hımııalyq ónimdi tirkeý jáne esepke alý tártibi
5. Hımııalyq ónimdi tirkeý jáne esepke alý prosesi ózine mynalardy qamtıdy:
1) hımııalyq ónimdi tirkeý úshin ótinim berýshi (óndirýshi, jetkizýshi, ımporttaýshy) usynatyn qujattardy qabyldaý;
2) qujattardy qaraý jáne hımııalyq ónimdi tirkeý nemese bas tartý týraly sheshim qabyldaý;
3) hımııalyq ónim týraly málimetterdi tizilimge engizý nemese dáleldi bas tartýdy daıyndaý;
4) Osy Qaǵıdalarǵa 1-qosymshaǵa sáıkes hımııalyq ónimdi tirkeý týraly kýálikti nemese dáleldi bas tartýdy berý.
6. Hımııalyq ónimdi esepke alý tizilimge málimetterdi engizý arqyly ýákiletti organ júrgizedi.
7. Hımııalyq ónimdi tirkeý jáne esepke alý úshin ótinim berýshi (óndirýshi, jetkizýshi, ımporttaýshy) ýákiletti organǵa mynadaı qujattardy usynady:
1) osy Qaǵıdalarǵa 2-qosymshaǵa sáıkes nysan boıynsha hımııalyq ónimdi tirkeý týraly kýálikti alýǵa ótinim;
2) Zannyń 15-babynda belgilengen talaptarǵa sáıkes keletin, memlektettik jáne orys tilderinde hımııalyq ónim qaýipsizdiginiń pasporty.
8. Shetel tulǵalary jáne sheteldik zańdy tulǵalar Qazaqstan Respýblıkasynyń azamattarymen jáne zańdy tulǵalarymen teń dárejede ótinim berýshi (óndirýshi, jetkizýshi, ımporttaýshy) bola alady.
9. Ýákiletti organ ótinim túsken kúnnen bastap bes jumys kúni ishinde qujattardy qaraıdy jáne hımııalyq ónimdi tirkeý nemese dáleldi bas tartýdy berý týraly sheshim qabyldaıdy.
Bas tartylǵan jaǵdaıda, ýákiletti organ ótinim berýshi (óndirýshi, jetkizýshi, ımporttaýshy) usynǵan barlyq qujattardy qaıtarady jáne ony bas tartý sebebin kórsete otyryp, jazbasha túrde habardar etedi.
10. Hımııalyq ónimdi tirkeýden bas tartý úshin negiz mynalar bolyp tabylady:
1) hımııalyq ónimniń qaýipsizdigi salasyndaǵy Qazaqstan Respýblıkasy zańnamasynyń talaptaryna hımııalyq ónimniń sáıkessizdigi;
2) hımııalyq ónimniń qaýipsizdigi pasportynda Zannyń 15-babynda kórsetilgen tolyq emes aqparatty usyný;
3) hımııalyq ónimniń qaýipsizdigi pasportynda hımııalyq ónim týraly durys emes málimetter usyný.
11. Hımııalyq ónimdi tirkeýden bas tartý týraly sheshimge «Ruqsattar jáne habarlamalar týraly» Zańnyń 20-babynyń 1-tarmaǵynyń 2) tarmaqshasyna sáıkes ótinim berýshi (óndirýshi, jetkizýshi, ımporttaýshy) shaǵymdana alady.
12. Ýákiletti organnyń eskertýlerin joıǵan jaǵdaıda, ótinim berýshi (óndirýshi, jetkizýshi, ımporttaýshy) osy Qaǵıdalarda bekitilgen tártipte ýákiletti organǵa qaıta júginedi.
13. Hımııalyq ónimdi tirkeý týraly kýáliktiń qoldanylý merzimi bes jyl.
Hımııalyq ónimdi tirkeý jáne esepke alý qaǵıdalaryna 1-qosymsha
nysan
Hımııalyq ónimdi tirkeý týraly kýálik
QR-HP-N_________ ____________________
(ótinim berýshi, el)
Qoldaný salasy ________________________________________________________________________________
______________________________________________________________________________________túrindegi
(shyǵarý nysany)
_____________________________________________________________________________________________
(óndirýshi fırma)
_______________________________________________________________________________________________
(hımııalyq ónimniń tolyq ataýy)
_________________________________________________hımııalyq ónimi Qazaqstan Respýblıkasynda tirkelgen.
Tirkelgen kúni _____________________________________________________
Qujat _______________________________________________ deıin jaramdy.
Ýákiletti tulǵa__________________________________M.O.
Hımııalyq ónimdi tirkeý jáne esepke alý qaǵıdalaryna 2-qosymsha
nysan
Qazaqstan Respýblıkasy Investısııalar jáne damý mınıstrliginiń
Indýstrııalyq damý jáne ónerkásiptik qaýipsizdik komıteti
________________________________________________________
(kórsetiletin qyzmetti alýshynyń tolyq ataýy)
Mekenjaıy ______________________________________________
(ındeks, qala, aýdan, oblys, kóshe, úı №, telefon)
Kórsetiletin qyzmetti alýshynyń derektemeleri ________________
(ZT/DK memlekettik tirkeý týraly kýálik №, BSN, JSN)
Hımııalyq ónimdi tirkeý týraly kýálikti alýǵa arnalǵan ótinim
________________________________________________hımııalyq ónimdi tirkeý týraly kýálik berýdi suraımyz.
qaǵaz tasyǵyshta ______ (eger, kýálikti qaǵaz tasyǵyshta alý qajet bolsa, H belgisin qoıý)
Qosymsha: ____ paraqta.
Aqparattyq júıelerde qamtylǵan, zańmen qorǵalatyn qupııany quraıtyn málimetterdi paıdalanýǵa kelisemin
20___ jylǵy «___»___________ _____________ (qol qoıý)
Buıryq Qazaqstan Respýblıkasynyń Ádilet mınıstrliginde 2015 jylǵy 23 shildedegi Normatıvtik quqyqtyq kesimderdi memlekettik tirkeýdiń tizilimine № 11737 bolyp engizildi.