Qazaqstan Respýblıkasynyń Ulttyq mýzeıi Qazaqstan halqy Assambleıasymen birlesip, Astana kúnine tartý retinde «Qazaqstan – meniń Otanym» atty qoldan toqylǵan monýmentaldi-dekoratıvtik týyndy – ólshemi 430h600 santımetrlik gobelendi kópshilik nazaryna usyndy.
Kompozısııanyń naq ortasynda, Qazaqstanda turatyn etnostardyń ulttyq kıimderin kıgen adamdar músinderi beınelengen oıý-órnekti sheńberdiń fonynda Beıbitshilik jáne kelisim saraıy qasbetiniń Qazaqstan halqy Assambleıasynyń logotıpi bar sýret ornalasqan.
Ulttar ókilderinen turatyn sheńberdiń ortasynda, qonaqjaılyq pen keńpeıildilikti bildirip, qolyn qýana kóterip turǵan Qazaqstan Respýblıkasynyń Prezıdenti Nursultan Ábishuly Nazarbaevtyń sýreti toqylǵan.
Sheńberdiń tóbesi Qazaqstan halqynyń birligine negizdelgen memlekettik bıliktiń sımvoly retinde Aqordanyń qasbetiniń beınesine kelip tireledi. Gobelenniń búıir bólikteri taǵdyr tálkegimen Qazaqstanǵa kelip pana tapqan kóptegen ulttardy týǵanyndaı baýyryna basqan halyqtyń jan sulýlyǵyn beıneleıtin, basqurlardaǵy qazaq oıý-órneginiń áshekeılengen sýretterimen toltyrylǵan.
El birligin toqyma óneri arqyly beınelegen erekshe jobanyń avtorlary – Qazaqstan Respýblıkasy Sýretshiler odaǵynyń músheleri, «Daryn» memlekettik syılyǵynyń laýreattary Aıdar Jamhan men Málik Muqanov.
Bul óner týyndysynyń kórkemdik máni de sonda – gobelende Qazaqstan halqynyń birligi ıdeıasy qazaq halqynyń dástúrli qolóneri arqyly shyǵarmashylyq tásilmen berilip, Táýelsiz Qazaqstandy sıpattaıtyn ózindik ereksheligi mol sımvolıkalar úılesimdi túrde kompozısııa retinde kórinis tapqan.
Gobelen Azııadaǵy ózara is-qımyl jáne senim sharalary jónindegi keńes (AО́SShK) ulttyq-mádenı ortalyqtarynyń Qazaqstan Respýblıkasy Táýelsizdiginiń 25 jyldyǵyna arnalǵan «Álem. HHI ǵasyr»: AО́SShK elderi yntymaqtastyǵynyń jańa perspektıvalary» atty azamattyq forým aıasynda jurtshylyqqa tanystyrylyp, tusaýy kesildi.
Merekelik sharaǵa qatysqan Qazaqstan halqy Assambleıasy Tóraǵasynyń orynbasary Eraly Toǵjanov, Parlament Májilisiniń depýtaty, depýtattyq toptyń jetekshisi Saýytbek Abdrahmanov, Qazaqstan Respýblıkasy Ulttyq mýzeıiniń dırektory Darhan Myńbaı, L.N.Gýmılev atyndaǵy Eýrazııa ulttyq ýnıversıteti QHA kafedrasynyń meńgerýshisi Anatolıı Bashmakov óz sózderinde gobelende beınelengen qazaqstandyqtardyń jalpyulttyq birligi, dostyǵy men qoǵamdyq kelisimin bildiretin kompozısııanyń tereń maǵynasyna mán berdi. Sharaǵa Qyrǵyz Respýblıkasy men Taıland koroldiginiń resmı delegasııasy, Reseı men Tájikstannyń sarapshylyq qaýymdastyq ókilderi, Belarýs, Ázerbaıjan, Aýǵanstan men Japonııanyń Qazaqstandaǵy dıplomatııalyq mıssııalarynyń ókilderi, AО́SShK elderi ulttyq-mádenı ortalyqtarynyń ókilderi, Parlament depýtattary, Qazaqstan halqy Assambleıasynyń músheleri, belgili qoǵam jáne saıası qaıratkerler qatysty.
«Egemen-aqparat»