Astana –oryndalǵan arman

Almatyda Qazaqstan Respýblıkasy Prezıdenti arhıvinde Astana kúnine oraı «Astana – Táýelsiz Qazaqstannyń jetistigi men gúldenýiniń, bolashaǵynyń sımvoly» atty tarıhı-derekti kórme ashylyp, memleket jáne qoǵam qaıratkerleri men tarıhshylardyń qatysýymen dóńgelek ústel ótti. Astananyń týǵan kúni degende almatylyqtar bir kezderi ózderiniń astanalyqtar bolǵanyn mindetti túrde eske alatyny bar. Alataýdyń etegindegi jasyl jelekke oranǵan «gúl-qalany» qalaı ǵana qıyp ketti eken degen jedel oı jetegindegilerdiń ózi bir shoǵyr. Saǵym oınaǵan sary dalada kókpen talasqan eń bıik záýlim ǵımarattar alǵash ret Ortalyq Azııa aımaǵynda, tipti, TMD keńistiginde turǵyzylatynyna senetin jan bolmady. «Astana Almatyǵa qaıta kóship keledi» degen jelsózge de tyıym salynbady. Biraq, Astana jazdyń aptabyna, qystyń boranyna, sáýegeılik sózdiń «ystyǵy men sýyǵyna» «tótep berip» kún sanap ósken jas sábıdeı, býyny qataıyp órkendeı berdi, órkendeı berdi... Uly kósh qalaı bastalyp edi? Qas-qaǵym sáttik kórinisterdi qaltqysyz qamtyǵan fotoshejire arhıv foıesinde, onyń ár qabatynda, ǵımarattyń aýlasynda kelýshi kó­rermenderge keńinen tanystyrylý úshin barlyq sánimen jasaqtalyp qoıylypty. Ár sýret – tarıh. Ár sýret tunǵan shejire. – Qazaqstan Respýblıkasynyń elordasy – Astananyń týǵan kúni jáı tarıhı data emes. Astana – Dúnıejúzilik kartada Qazaqstan Respýblıkasy atty jańa respýblıkanyń dúnıege kelýi arqyly Uly Dalada saltanat qurǵan jasampazdyq pen jańashyldyqtyń rýhyn pash etken shyraıly shahar. Astana – HHI ǵasyrdyń qalasy, – dep dóńgelek ústel basynda sóz bastaǵan Prezıdent arhıviniń dırektory, tehnıka ǵylymdarynyń doktory, professor Borıs Japarov, Elbasy Nursultan Nazarbaevtyń usynysy boıynsha sol jyldary eń durys balama retinde Aqmola qalasynyń tekten-tek tańdalmaǵanyna aı­ryqsha toqtaldy. –Astananyń álemge tanylýy – tý­ǵan elimizdiń, qazaqtyń tanyl­ýy dep uǵynýymyz kerek, – dep só­zin túıindegen dóńgelek ústeldiń bas moderatory Borıs Álikenuly jınalǵandardyń nazaryn «Astana – oryndalǵan arman» atty derekti fılm­ge aýdarýyn ótindi. Tarıhı taspadan soń dóńgelek ústel basyna jınalǵandar, olardyń kóbi tarıhı sol oqıǵaǵa birden-bir qatysqan azamattar, ishki oılaryn irkip qalmaı ortaǵa saldy. Memleket jáne qoǵam qaıratkeri Bolat Baekenov, professorlar Georgıı Kan men Ákimjan Áripovtiń, QHA músheleri Shahısmaıl Ásıev, Pavel Feodorıdı, Knıaz Mırzoev pen basqa da sheshenderdiń sheshile aıtqan oı-pikirleri Elbasynyń batyl sheshimi men eren eńbegine arnaldy. Saıası mándi pikirtalas merekelik konsertke ulasty. Qazaqstannyń bolashaǵy jas búldirshinder, Otan-Ana, Elorda-Astana týraly shyrqalǵan shýaqty ánmen kelýshilerdiń kóńilin jadyratty. Talǵat SÚIINBAI, «Egemen Qazaqstan»  ALMATY