«Nur Otan» partııasynyń qatary qoǵamnyń túrli salasynda eńbek etip júrgen azamattarmen tolyqty. Astana kúnine oraı, «Nur Otan» partııasynyń bas keńsesinde olarǵa partııa bıletterin tapsyrý saltanatty rásimi ótti.
Partııa múshesi atanǵysy kelgenderdiń arasynda «Nazarbaev Ýnıversıtettiń» ǵalymdary men ustazdary, Ulttyq medısınalyq holdıngtiń qyzmetkerleri, «Astana Operanyń» ártisteri, sondaı-aq, memlekettik ındýstrııalyq-ınnovasııalyq damý baǵdarlamasynyń aıasynda salynǵan elimizdiń jańa óndiristik alyptarynyń ınjenerleri men jumysshylary bar.
Is-sharany ashqan «Nur Otan» partııasy Tóraǵasynyń birinshi orynbasary Muhtar Qul-Muhammed rásimge qatysýshylar eńbek etetin mekemelerdiń partııa Tóraǵasy Nursultan Nazarbaevtyń bastamasymen qurylǵanyn, ıaǵnı atalǵan kásiporyndar Astanany Qazaqstannyń ınnovasııalyq ortalyǵy retinde qalyptasýynyń negizin qalaǵanyn aıtty. «Qazirgi tańda «Nur Otan» partııasynyń qataryna ótkisi keletin jastarymyzdyń kóptigi kóńil qýantady. Munyń basty sebebi, Qazaqstan – bıyl óziniń 25 jyldyǵyn toılaıtyn jas memleket. Al «Nur Otan» – jas partııa. Bizge kelesi jyly 18 jyl tolady», – dedi Muhtar Qul-Muhammed.
Sonymen qatar, «Nur Otan» partııasy Tóraǵasynyń birinshi orynbasary Memleket basshysynyń Qazaqstan jastary úshin jańa elordanyń irgesin qalaǵanyn, aldyńǵy qatarly óndiris oryndary, magıstraldar men biregeı jobalar salynyp jatqanyn aıta kele: «Búgin bizdiń qatarymyzdy mádenıettiń, ónerdiń, ǵylymnyń, bilimniń jáne medısınanyń jas ókilderi tolyqtyryp otyr. Sizderdiń árqaısyńyz Astana ómirindegi asa mańyzdy salalardyń ajyramas bir bólshegisizder. Bul tańǵajaıyp jobalardyń barlyǵy bizdiń Elbasymyzdyń tikeleı bastamasymen quryldy. Aralaryńyzda Astanadaǵy jańa kásiporyndardyń jas jumysshylary men ınjenerleri de bar. Ol kásiporyndar da Prezıdenttiń ındýstrııalyq-ınnovasııalyq damý baǵdarlamasynyń arqasynda salyndy», – dedi.
Buǵan qosa, Muhtar Qul-Muhammed Memleket basshysy jastarǵa senim artyp otyrǵanyn, al bul údeden shyǵý olarǵa úlken jaýapkershilik júkteıtinin jetkizdi. Ol: «Elbasymyz sizderge zor senim artyp otyr. Sondyqtan, Prezıdenttiń ozyq, údemeli saıasatynyń basty jalǵastyrýshylary da dál sizder bolýlaryńyz kerek», – dedi jáne jastardyń óz isteriniń úzdigi jáne qatarlarynyń aldy bolýlaryna tilektestigin bildirdi.
Sonymen, «Nur Otan» partııasynyń bıletterin bokstan Qazaqstan ulttyq quramasynyń múshesi Zarına Soloeva, «Slavıanskıı bazar-2015» halyqaralyq án baıqaýynyń Gran-prı ıegeri Dinmuhammed Qudaıbergen, «Karer Aksaı» JShS dırektorynyń orynbasary Sergeı Drozdov, Shyǵys Qazaqstan oblysynan kelgen jumysshy-mehanık Ivan Podkorytov, zańger Gúlnár Kóshekova, fermer Áset Rahmatýllın, sýretshi-dızaıner Maqsat Aıdúısenov, KTK komandasynyń múshesi Ǵalymjan Keńshilik, kásipker Aıdos Baltaev, telejúrgizýshi Sandýǵash Sultanova, dáriger-revmatolog Aıgúl Aıtmaǵanbetova, qazaq tili men ádebıeti pánderiniń muǵalimi Alena Pavloves, «Astana Opera» balet teatrynyń jetekshi solısi Jandos Áýbákirov, «Astana Opera» opera teatrynyń jetekshi solısi Súndet Baıǵojın, kolledj stýdenti Rýstam Zaınekeev, medısına ǵylymdarynyń kandıdaty Aıgúl Saparbekova, Astana medısına ýnıversıteti dekanynyń orynbasary Nurbek Músirepov, Eýrazııa ulttyq ýnıversıtetiniń stýdenti Arýjan Qabykenova, «Astana zelenstroı» AQ sheberi Ińkár Naýryzbaeva, lokomotıv deposynyń sheberi Asyljan Jakeshov jáne metallýrg Nurlan Manarbekov aldy.
Jalpy, Astana kúnine oraılastyrylǵan partııa bıletterin tapsyrý rásimi Qazaqstannyń barlyq óńirinde ótkizilýde. Qazirdiń ózinde «Nur Otan» partııasy músheleriniń sany mıllıonnan asyp jyǵylady.
Dinmuhammed QUDAIBERGEN,
ánshi, Aqtóbe:
– Men «Nur Otan» partııasyn birinshi kezekte, jastar partııasy dep esepteımin. Sebebi, táýelsizdiktiń 25 jyly ishinde elimizdiń qol jetkizgen jetistikteriniń barlyǵy aldymen bizderge, ıaǵnı jastarǵa óz paıdasyn tıgizýde. Sondyqtan, biz «Nur Otan» partııasynyń basty qozǵaýshy kúshi bolýymyz kerek.
Maqsat AIDÚISENOV,
sýretshi-dızaıner,
Ońtúistik Qazaqstan oblysy:
– Sulý elordamyzdyń tórinde partııa qataryna qosylyp otyrǵanyma óte qýanyshtymyn. Oǵan qosa, partııalyq bıletti elordamyzdyń týǵan kúni qarsańynda qolǵa alyp otyrǵanym úshin ózimdi eki ese baqytty sezinemin. Nebári 18 jyldaı merzimde Elbasymyzdyń dál osyndaı ǵajaıyp megapolısti salǵanyna áli kúnge deıin tańǵalamyn. Elordany aıryqsha sáýlet jarasymdylyǵy, dızaınerlik jáne sáýlet sheberliginiń shyńy dep bilemin.
Aıdos Baltaev,
Jastar kásipkerlik komıtetiniń tóraǵasy, Astana:
– Qazaqstannyń barlyq kásipkeri «Nur Otan» partııasyn 100% qoldaıtynyna senimdimin. Sebebi, bizdiń Elbasymyz kásipkerlerge, ásirese, óndirýshilerge árdaıym qoldaý kórsetip keledi. 25 jasymda kıim-keshek tigýmen aınalysatyn kásiporyn quryp úlgerdim dep senimmen aıta alamyn. Alaıda, memlekettiń qoldaýynsyz bul múmkin bolmas edi. Elimizde adal eńbek etip júrgenderge kómek kórsetilip otyrǵany óte qýantady.
Alena PAVLOVES,
qazaq tili men ádebıeti pánderiniń muǵalimi, Astana:
– «Nur Otan» partııasy úshin mańyzy jaǵynan birinshi orynda halyqtyń birligi turady. Sol sebepti de, men partııa qataryna qosylýdy jón sanadym. Bul jaıynda Elbasymyz Nursultan Nazarbaev ta árdaıym aıtyp júr. Eger, halyqtyń bereke-birligi bekem bolsa, Qazaqstannyń kez kelgen bıikti baǵyndyratynyna senimdimin. Elimizdiń óskeleń urpaǵy halqymyzdyń basty baılyǵy – birlik ekenin eshqashan jadynan shyǵarmaýy úshin óz tarapymnan qolymnan kelgen barlyq múmkindikti jasaımyn.
Arýjan QABYKENOVA,
L.N.Gýmılev atyndaǵy EUÝ stýdenti:
– Memleket basshysy jáne «Nur Otan» partııasy jastardy aıryqsha nazarda ustaıtyny qýantady. Baǵymyzǵa oraı, biz táýelsiz Qazaqstan jerinde týyp, elimizdiń kúnnen-kúnge damyp, gúldenip kele jatqanynyń kýágerlerimiz. Ol úshin aǵa býynǵa rahmetimizdi aıtyp, ózimiz de qol qýsyryp otyrmaýymyz qajet dep bilemin. Barymyzdy baǵalap, ony iske asyrýymyz qajet. «Nur Otan» partııasynyń qataryna qosylý týraly sheshimimniń basty sebebi de osynda.
Súndet BAIǴOJIN,
«Astana Opera» teatrynyń jetekshi solısi:
– Shetelde oqyp júrgen kezimde bizdiń Astanada «Astana Opera» syndy sán-saltanaty kelisken záýlim teatr salynsa ǵoı dep armandamaıtyn da edim. Elimizdiń barlyq ártisi osyndaı mádenıet pen ónerdiń altyn ordasy úshin Memleket basshysyna sheksiz rızashylyqtaryn bildiredi. Ol barsha qazaqstandyqtyń ónerge degen qushtarlyqtaryn arttyrady.
Láıla EDILQYZY,
«Egemen Qazaqstan»