[caption id="attachment_50284" align="aligncenter" width="560"] Foto: olympic.kz[/caption]
Astanada Mádenıet jáne sport mınıstri Arystanbek Muhamedıuly men Ulttyq Olımpııalyq komıtetiniń prezıdenti Tımýr Qulybaev Qazaqstan ulttyq qurama komandalarynyń múshelerimen kezdesti.
Kezdesýde Olımpııa oıyndaryna daıyndyq máselesi qaraldy. Federasııa basshylary men bas jattyqtyrýshylar sportshylardyń dúbirli dodaǵa daıyndyǵy týraly aıtyp berdi. Bokstan ulttyq qurama komandanyń bas jattyqtyrýshysy Myrzaǵalı Aıtjanov bıylǵy Olımpıadaǵa Qazaqstan sportshylarynyń tolyq quramda qatysatynyn, qazir boksshylar Almaty oblysyndaǵy Halyqaralyq boks akademııasynda jatqanyn, odan keıin daıyndyqty Astanadaǵy boks ortalyǵynda jalǵastyratynyn aıtty. Onyń aıtýynsha, bylǵary qolǵap sheberleri Astanada oqý-jattyǵý jıyny bitken soń osy aıdyń sońynda Rıo-de-Janeıroǵa barady. Al bokstan áıelder quramasynyń jattyqtyrýshysy Qaırat Saǵadıev qyzdardyń Astanada jattyǵyp jatqanyn, odan keıin olar Ispanııada ótetin Gran-Prı jarysyna qatysyp, ári qaraı Brazılııada daıyndyqtaryn jalǵastyratynyn atap ótti.
Jıynda aýyr atletterdiń de Olımpıadaǵa daıyndyǵy týraly áńgime qozǵaldy. Kezdesýde áli jarysqa qatysatyn sportshylardyń tizimi bekitilgeni, Olımpıadaǵa Vladımır Sedovtyń da qatysýy múmkin ekeni habarlandy. Onda Aýyr atletıka federasııasynyń ókilderi sportshylardy taǵy da dopıngke tekserý máselesin qozǵady. Tekserý bolǵan soń onyń qorytyndysyn Dúnıejúzilik dopıngke qarsy agenttiktiń zerthanasyna jiberý kerektigin aıtty. «Sportshylardy dopıngke taǵy da tekserý kerek. Onyń qorytyndysyn Olımpıadaǵa deıin bilip alǵanymyz jón. Eger otandastarymyzdyń taǵy dopıngti qabyldaǵany belgili bolsa, onda olarǵa qatań jaza qoldaný kerek», dedi federasııa ókilderi. Sonymen birge qanynan dopıng dárisi tabylǵan elimizdiń tórt sportshysyna qatysty másele de sóz boldy. Osyǵan baılanysty Ulttyq Olımpııalyq komıtet pen Aýyr atletıka federasııasy sportshylardy qoldaýǵa qolda bar múmkindiktiń barlyǵyn jasaıtyndaryn atap ótti. Sondaı-aq, UOK Halyqaralyq Olımpııalyq komıtettiń dopıngke baılanysty zerttep jatqan jumystaryn qoldaıtynyn jasyrmady.
Kezdesýde jeńil atdetıka, taekvondo, sadaq atý, nysanany kózdeý, qabyrǵaǵa oq atý, sınhrondy júzý, Paralımpıadanyń paýerlıftıng túrinen jarysqa qatysatyn sportshylar men olardyń jattyqtyrýshylary ózderin tolǵandyryp júrgen problemalaryn jetkizdi. Osy máselege baılanysty Ulttyq Olımpııalyq komıtetiniń prezıdenti Tımýr Qulybaev sportshylarymyzdyń Olımpıadada laıyqty óner kórsetýine barlyq jaǵdaıdyń jasalatynyn, otandastarymyzǵa Olımpıadanyń lısenzııasyn alýynyń ózi úlken jetistik ekenin aıtty. Sonymen birge ol dopıng máselesi de qatysty óz oıyn bildirdi. Tımýr Qulybaev Olımpıadaǵa, ásirese, farmokologııa men sportshylardyń tamaǵyna, dopıngtiń synamalaryna úlken jaýapkershilikpen qaraý kerektigin eskertti. Sol sııaqty Ulttyq Olımpııalyq komıtet Dúnıejúzilik dopıngke qarsy agenttiktiń sportshylarǵa qatysty jumysyn qoldaıtynyn málimdedi.
[caption id="attachment_50285" align="aligncenter" width="560"] Foto: olympic.kz[/caption]
Dastan KENJALIN