L.N.Gýmılev atyndaǵy Eýrazııa ulttyq ýnıversıtetiniń ǵalymdary men ónerpazdary Astana kúni merekesi kezinde qala turǵyndaryna erekshe kóńil-kúı syılady.
Qaladaǵy Sh.Imanbaeva kóshesindegi aýlaǵa halyq kóp jınaldy. Merekelik dýman-toıdy bastap jibergen turǵyndar aldynda EUÝ-diń áleýmettik-mádenı damý jónindegi prorektory D.Qamzabekuly sóz sóıledi. Alashtanýshy ǵalym Astanadaǵy №14 saılaý okrýginen EUÝ rektory Erlan Sydyqov qalalyq máslıhatqa depýtat bolyp saılanǵanyn aıta kelip, shırek ǵasyrda qazaq eliniń halyqaralyq qoǵamdastyqta laıyqty oryn alyp, bıik beleske kóterilgenin, kók baıraǵymyz kókte samǵap, álemge tanylǵanyn jetkizdi. Al tarıhshy-ǵalym, «Qazaqstan tarıhshylary ulttyq kongresiniń» jaýapty hatshysy Zııabek Qabyldınov pen memleketimizdiń Eltańba avtory, professor Jandarbek Málibekov jalpyhalyqtyq merekege aınalǵan Astana kúniniń mán-mańyzyna toqtaldy. Sondaı-aq, EUÝ-diń «Samuryq» shoý-balet teatry, «Tańsholpan», «Qazaq qyzdary» án-bı toptary jergilikti turǵyndar aldynda óner kórsetti.
«Arman qala – Astana» atty dýmandy keshten úlkender jaǵy rýhanı lázzat alsa, balǵyndar belgili ǵalymdar men Eltańba avtorynyń qolynan tegin balmuzdaq jedi. Sońynan estelik sýretke tústi.
«Egemen-aqparat»